Amos 2:1-16
2 “Ku Jehovah bejaku:
‘“Ketegal Moap udah suah ngelaban sereta nunu tulang raja Edom kena ngaga kapur,Nya alai, Aku enda ngubah pemutus Aku.
2 Aku deka ngirumka api ngagai Moap,Lalu api nya deka nganguska menara-menara Keriot ti teguh.
Moap deka mati maya orang benung charut.
Maya nya, panjung perang deka didinga, sama enggau bunyi terumpit.*
3 Aku deka muai raja* sida,Lalu munuh iya sama enggau bala pegawai iya,” ku Jehovah bejaku.’
4 Ku Jehovah bejaku:
‘Judah udah suah ngelaban;Sida nulak adat* Aku, lalu enda ngasika atur Aku.
Sida ditesatka pemula ke udah dititihka aki ini sida.
Nya alai, Aku, Jehovah, enda ngubah pemutus Aku.
5 Aku deka ngirumka api ngagai kuta Judah,Lalu api nya deka nganguska menara-menara Jerusalem ti teguh.’
6 Ku Jehovah bejaku:
‘Israel udah suah ngelaban; sida nyual orang ti lurus kena ngulihka pirakSereta nyual orang ke miskin kena ngulihka sepasang selipar.
Nya alai, Aku enda ngubah pemutus Aku.
7 Sida ngindik pala orang ke baruh pendiau ngagai tanah,Lalu mempang jalai orang ke baruh ati.
Apai enggau anak lelaki iya tinduk* enggau indu ti sama,Nyentukka nama Aku ti kudus nyau kamah.
8 Sida gali ngimbai alta* belapikka gari ke diambi sida ari orang ke miskin nyadika jamin utang,Lalu ba rumah* petara sida, sida ngirup wain ke dibeli ngena duit ke diulih ari orang ke didenda sida.’
9 ‘Aku meh ke ngemunaska orang Amor,Ke tinggi baka pun sidar sereta kering baka pun oak.
Aku ngemunaska buah iya sereta urat iya ketegal bala nembiak Aku.
10 Aku udah mai kita pansut ari Ejip,Lalu Aku ngiring kita lebuh kita bejalai ba menua puang pengelama 40 taun,Ngambika kita ulih bempu menua orang Amor.
11 Aku udah milih sekeda ari bala anak lelaki kita nyadi nabi.
Aku mega udah milih sekeda orang ke biak ari bala kita nyadi orang Nasir.*
Enda pia iya, orang Israel?’ ku Jehovah bejaku.
12 ‘Tang kita majak meri orang Nasir wain ke diirupSereta nagang bala nabi madahka pesan Aku.
13 Nya alai, Aku deka nganchurka kita ba endur kita,Baka kerita sapi ke penuh laban bijirin ke nganchurka semua utai ke ditengah iya.
14 Orang ke laju belanda nadai endur ngerarika diri.
Orang ke kering deka lenyau pengering,Lalu nadai siku pan pahlawan ke ulih nyelamatka nyawa diri.
15 Orang ke landik ngena panah enda ulih tan.
Orang ke laju belanda enda ulih ngerarika diri,Lalu orang ke nepan kuda enda ulih nyelamatka nyawa diri.
16 Ba hari nya, indah pahlawan ke pemadu berani panDeka belanda telanjai-lanjai ngerarika diri,’ ku Jehovah bejaku.”
Nota Kaki
^ Jaku Asal, “tanduk.”
^ Jaku Asal, “hakim.”
^ Tauka “iring.”
^ Iya nya, ngereja pengawa seks.
^ Peda Penerang Leka Jaku.
^ Tauka “kuil.”
^ Peda Penerang Leka Jaku, “Orang Nasir.”
