Dua John 1:1-13
1 Aku, ke udah tuai tu,* nulis surat tu ngagai indu* ke dipilih sereta bala anak iya, ke amat-amat dikerinduka aku. Ukai aja aku, tang semua sida ke udah nemu pemendar mega rinduka kita,
2 laban pemendar bisi ba kitai sereta deka seruran bisi ba kitai nyentuk ke belama iya.
3 Petara ti Apai sereta Jesus Kristus, iya nya Anak Apai, meri kitai pemanah ati ti besai, pengasih, sereta nulung kitai bebaik enggau Petara. Seduai iya deka rinduka kitai sereta ngajar kitai pemendar.
4 Aku balat amat gaga ati laban nemu sekeda ari bala anak nuan bejalai dalam pemendar, sejalai enggau pesan ke udah diterima kitai ari Apai.
5 Nya alai diatu, aku minta ngagai nuan, indu ke dipilih, ngambika kitai rinduka pangan diri. Utai ke ditulis aku tu, ukai pesan ti baru, tang pesan ke udah dikembuan kitai kenyau ari pun.
6 Tu meh reti pengerindu, iya nya kitai terus bejalai nitihka semua pesan Iya. Tu meh pesan ke udah didinga kita ari pun, terus meh ngayanka pengerindu.
7 Nya ketegal bisi mayuh penipu udah bisi ba dunya, lalu sida enggai ngaku Jesus Kristus kala datai nyadi mensia. Sida nya meh penipu sereta bala munsuh Kristus.*
8 Bejimat meh, enggaika kita lenyau utai ke udah dikereja kami enggau bebendar, ngambika kita nerima upah ti penuh.
9 Tiap iku orang ke ngelui ari ajar Kristus sereta enda nitihka ajar nya, enda diterima Petara. Tang orang ke terus nitihka ajar nya, diterima Apai enggau Anak.
10 Enti orang datai ngagai kita lalu enda madahka utai ke sejalai enggau ajar nya, anang nerima iya ngagai rumah kita tauka meri jaku tabi ngagai iya.
11 Nya ketegal enti orang meri jaku tabi ngagai iya, reti nya, orang nya nyukung pengawa iya ti jai.
12 Bisi mayuh utai ke deka dipadah aku ngagai kita, tang aku enggai madahka nya nengah surat. Aku ngarapka aku ulih datai ngagai kita lalu bejaku enggau kita empu, ngambika kita penuh laban pengaga ati.
13 Bala anak menyadi indu nuan, iya nya indu ke dipilih, ngirumka salam ngagai nuan.
Nota Kaki
^ Tauka “ke tuai gempuru.”
^ Engka ditujuka ngagai siku indu tauka siti raban gempuru Kristian.
^ Peda Penerang Leka Jaku, “Anti-Kristus.”
