1 Samuel 13:1-23
13 Saul beumur . . .* taun lebuh iya nyadi raja, lalu iya merintah Israel pengelama dua taun.
2 Saul milih 3,000 iku orang ari Israel. Dua ribu iku orang enggau Saul ba Mikmas sereta ba kawasan ke begunung ba Bethel. Seribu iku orang enggau Jonatan ba Gibeah, ba kawasan Benjamin. Saul ngasuh sida ke bukai pulai ngagai kem diri empu.
3 Udah nya, Jonatan munuh seraban soldadu orang Pilistin ba Geba, lalu orang Pilistin ninga pasal nya. Saul lalu ngasuh orang nyepu terumpit* ba serata menua, lalu ku iya bejaku: “Dingaka tu kita orang Hebrew!”
4 Semua orang Israel ninga berita tu: “Saul udah munuh seraban soldadu orang Pilistin, lalu diatu, orang Pilistin balat begedika orang Israel.” Nya alai, bala orang mayuh diasuh nitihka Saul ba Gilgal.
5 Orang Pilistin mega begempuru deka beperang ngelaban orang Israel. Sida bisi 30,000 iti kerita kuda, 6,000 iku orang ke nepan kuda, enggau raban soldadu ti mayuh baka pasir ke ba tebing tasik. Sida datai lalu nirika kem ba Mikmas, ba timur Bet-aben.
6 Lebuh orang Israel nemu diri kena penusah ketegal situasi sida balat nekan sida, sida belalai dalam gua, ba selepak batu, ba bukit batu, endur ba baruh tanah, enggau dalam lubang.
7 Sekeda orang Hebrew meraka Sungai Jordan ngagai kawasan Gat enggau Gilead. Tang Saul agi ba Gilgal, lalu semua orang ke enggau iya balat takut.
8 Saul nganti pengelama tujuh hari nyentuk ngagai maya ke ditetapka Samuel. Tang Samuel bedau ga datai ba Gilgal, lalu bala orang nya belabuh ninggalka Saul.
9 Ku Saul bejaku: “Bai pemeri tunu enggau pemeri bebaik ngagai aku.” Saul pan lalu nyerahka pemeri tunu nya.
10 Tang, pengudah iya tembu nyerahka pemeri tunu, Samuel pan datai. Saul mansang ngagai iya lalu ngelaluka penatai iya.
11 Samuel lalu nanya: “Nama utai ti udah dikereja nuan?” Ku Saul nyaut: “Bala orang nyau ninggalka aku, lalu nuan bedau ga datai ba maya ti udah ditetapka. Nambahka nya, orang Pilistin benung begempuru ba Mikmas.
12 Nya alai, aku berunding: ‘Orang Pilistin deka nyerang aku ba Gilgal, tang aku lalu bedau minta tulung ari Jehovah.’ Nya alai, aku terpaksa nyerahka pemeri tunu nya.”
13 Samuel bejaku ngagai Saul: “Nuan udah ngereja utai ti beli. Nuan enda ngasika pesan ke diberi Jehovah, Petara nuan. Enti nuan ngasi, Jehovah tentu deka ngasuh nuan enggau bala peturun nuan merintah Israel belama iya.
14 Tang diatu, perintah nuan enda ulih tan belama iya. Jehovah deka ngiga siku lelaki ke ngagaka ati Iya, lalu Jehovah deka ngelantik lelaki nya nyadi tuai atas bala nembiak Iya, laban nuan enda ngasika pesan Jehovah.”
15 Udah nya, Samuel mupuk ari Gilgal ngagai Gibeah ba kawasan Benjamin. Saul ngitung penyampau orang ke agi enggau iya, lalu penyampau sida kira-kira 600 iku orang.
16 Saul enggau anak iya, Jonatan, sereta bala orang ke agi enggau seduai iya, agi ba Geba ba kawasan Benjamin, lalu orang Pilistin ba kem sida ba Mikmas.
17 Bala soldadu orang Pilistin pansut ari kem sida deka nyerang orang Israel. Sida dibagi ngagai tiga iti raban. Seraban nengah jalai ke nuju ngagai Oprah enggau kawasan Shual.
18 Raban ti kedua nengah jalai ke nuju ngagai Bet-horon, lalu raban ti ketiga nengah jalai ke nuju ngagai sempadan ke betunga enggau lebak ba Seboim, tunga ke menua puang.
19 Maya nya, nadai tukang besi ba serata menua Israel, laban orang Pilistin enggai orang Hebrew begagaka pedang tauka sangkuh.
20 Nya alai, enti orang Israel deka ngansah pengeradu tanah, changkul, kapak, tauka sabit sida, sida patut ngiga orang Pilistin.
21 Upah ngansah pengeradu tanah, changkul, gerepu tanah, kapak, enggau ngaduka tungkat ke dikena ngiring jelu bejalai nya satu pim.*
22 Nya alai, ba hari sida beperang, semua orang ke enggau Saul seduai Jonatan nadai mai pedang tauka sangkuh. Semina Saul enggau anak iya Jonatan aja ke bisi senyata.
23 Ba maya ti sama, seraban soldadu orang Pilistin nengah jalai ti mit semak lebak ba Mikmas.
