Oku Bagalatiya 6:1-18

  • Murhwazane oku mizigo elemerere (1-10)

    • Okushalula ech’omuntu abyalaga (7, 8)

  • Okukatwa ntacho kumalire (11-16)

    • Echilemwa chihyahya (15)

  • Ebinwa by’okumaliriza (17, 18)

6  Bene-berhu, amango omuntu amajira egosa buzira kumenya oku agoseze, mwe mukulire ekiroho mulonze okuntu mwakagorora oyola muntu n’omurhima g’obwirhonzi. Aliko ey’onali wachilanga yi nawe orharhogera omu chigeregezo. 2  Mugenderere kurhwazana emizigo elemerere, nantyo mwanayeneza amarhegeko ma Kristu. 3  Bulala nka hali oli wawaza oku hali ech’amalire nobo ntacho amalire, ahola ey’ali achirhebeka. 4  Aliko buli muntu agenderere kulola bwinja ebijiro byage, naho agwarha empanvu y’okuchishinga oku bimulolere yewe yenyine, s’arhali omu kuchihuzanya n’owindi muntu. 5  Bulala buli muntu nj’aheka omuzigo gwage. 6  Echindi, omuntu bayigirize echinwa cha Mungu, agabane ebintu binja byoshi aherhe n’owamuhere ezola nyigirizo. 7  Murharhebekwaga, Mungu arhali wakushinyagulirwa. Bulala echintu choshi omuntu ali abyala,* chi nji anashalula; 8  bulala omuntu oli wabyala* omu kukulikiza omubiri, nj’ashalula okuharabiswa kulerherwe n’omubiri gwage; aliko omuntu oli wabyala omu kukulikiza eroho, nj’ashalula akalamo k’esiku n’amango kalerherwe n’eroho. 9  Bobuno, rhurhalekaga kujira ebinja, bulala omu kasanzi kakwanene nji rhwashalula akaba rhurhachokere. 10  Che chirhumire, amango moshi rhuherhe orozo, rhukolere abantu boshi amenja, aliko ahanene balala bali bachi berhu omu bwemere. 11  Mubwene gurhe nabayandikiire omu herufi zizibuzibu n’efune yani nyenyine. 12  Balala boshi banalonza babonekane bwinja oku mubiri, ba bali balonza babaseze mukatwe.* Banafa chakujira ntyo yi barhayemera balibuzwa eju y’omurhi gw’amateso gwa Kristu. 13  Bulala chiro na balala bali bakatwa,* nabo bonyine barhali bakulikira Amarhegeko, si bali balonza mukatwe yi bapata empanvu y’okuchitapira* omubiri gwenyu. 14  Aliko nyono ntahira nkachitapa,* akaba arhali kuchitapira omurhi gw’amateso gwa Waliha Yesu Kristu. Nyono mbwene oku kugerera yewe, egulu lyachirirwe echihano ch’olufu,* n’egulu libwene oku nani nachirirwe echihano ch’olufu kugerera yewe. 15  Bulala okukatwa n’okurhakatwa* ntacho bimalire, aliko okuba chilemwa chihyahya bye by’akamaro. 16  Boshi bali bakulikira obula bwerekezi bulolere okuchigendesa, omurhula n’olukogo bibe kubo, nechi, ku Izraeli wa Mungu. 17  Kurhangirira bunola na kugenderera ntaye ombuzage omurhula, bulala mperhe ebimenyeso by’omuja wa Kristu oku mubiri gwani. 18  Bene-berhu, olukogo rhurhakwanene lwa Nahamwerhu Yesu Kristu lube haguma n’omurhima muli mwayerekana. Ame.

Mahugulo m'efo

^ Ao “arhwera.”
^ Ao “warhwera.”
^ Ao “mukembulwe.”
^ Ao “bakembulwa.”
^ Ao “y’okuchihalira; y’okuchivugira.”
^ Ao “nkachihala; nkachivuga.”
^ Ao “lyamanikirwe oku murhi gw’amateso.”
^ Ao “okurhakembulwa.”

Copyrights for this publication