Oku Bagalatiya 5:1-26
5 Bulala Kristu arhukulire omu buja yi rhuba omu buhuru buli nk’obola. Che chirhumire muyorhe buzira kushaganyika, murhanachiyemeraga mwashuba kuja m’obola buja.
2 Mulole! Nyono Paulo mbabwirire oku nka mukatirwe,* eyi ntacho Kristu achibamalire.
3 Kandi namahamiriza oku buli muntu okatirwe* akwanene kukenga Amarhegeko moshi.
4 Mwe munalonza mutangazwe oku muli banyakunali kugerera amarhegeko, mwahirirwe hale na Kristu; mwachibirwe oku lukogo lwage rhurhakwanene.
5 Ku rhwabo, kugerera eroho, rhuli rhwalindira na nyorha nene rhunalangalire oku rhwahikira kuba banyakunali kugerera obwemere.
6 Ku balala bali omu buguma na Kristu Yesu, okukatwa* n’okurhakatwa ntacho bimalire, s’ahubwe obwemere bunayerekezwa n’obuzigire b’obw’akamaro.
7 Mwaliherhe olugenzi lwinja.* Nde wajire ababuza kugenderera kukenga okuli?
8 Amashumi mali nk’amola marharhengere em’olala wabahamagalaga.
9 Levire* ngeke yonyine enarhundisa epate yoshi yapondwaga.
10 Nchizerere oku mwabo muli omu buguma na Waliha, murhagwarha amandi-mandi mawazo; aliko owabalerha m’okurhayunvikana, chiro aba nde nj’ahaabwa obuhane akwanene.
11 Bene-berhu, akaba nchili nahubiri okukatwa,* bulagurhe nchili nalibuzwa? Akaba ntyo ku bili omurhi gw’amateso chirhachili chintu ch’okusirhaza.
12 Nakasimire abantu bali balonza kubavuruga bachikule mw’erumerume.*
13 Bene-berhu, mwahamagerwe omu buhuru, aliko murhakolesaga obola buhuru nka rozo l’okukulikiranya enyifinjo z’omubiri; s’oku buzigire, buli muguma akolere owabo nka muja.
14 Bulala Amarhegeko moshi mashwekerwe mw’elila rhegeko liguma liderhere: “Okwanene kuzigira omuturanyi wawe nk’oku ochizigira.”
15 Mukagenderera kujigulana n’okulyana, muchilange murhamalana.
16 Aliko mbabwirire, mugenderere kulambagira omu roho, nantyo murhakola enyifinjo z’omubiri haba n’akatyu.
17 Bulala eju y’enyifinjo zago, omubiri gunalwisa eroho, n’eroho linalwisa omubiri; byombi binapingana, nantyo eyi murhachikola ebi mwalilonzeze mukole.
18 Echindi, akaba muli mwayerekezwa n’eroho, murhali eshishi w’amarhegeko.
19 Ebijiro by’omubiri binabonekana bwinja; biheberwe m’obubaraga, ezinga, olugenzi lubi,
20 okuharamya esanamu, obushake,* obushombanyi, entonganyi, obongwa, oburhe buvire bwakabya, obuhaka, okurhayunvikana, okulerha ezindi-zindi nyigirizo omu bantu,
21 okuchifija eby’abene, obulalu, efete zichubusize olugero, n’ebindi bintu binali nk’ebyola. Nabere nabakomereza oku bilolere ebila bintu, nk’oku nabahaga omukonge, oku abanajira ebintu bili nk’ebyola barhakashokoola Obwami bwa Mungu.
22 Oku bwindi, engeso zinalerhwa n’eroho lichesibwa* ze zinola: Obuzigire, obushagaluke, omurhula, okulindira, olukogo, obwinja, obwemere,
23 obwirhonzi, okuchigalula. Nta rhegeko lyakapinga ebili nk’ebyola.
24 Echindi, balala bali bantu ba Kristu Yesu bamanikire omubiri, amawazo n’enyifinjo zago oku murhi gw’amateso.
25 Akaba rhulamire kugerera eroho, muleke rhugenderere kulambagira n’obukenge kugerera eroho.
26 Rhurhabaga bantu b’okuchihira embere, bantu b’okuhigizana, rhurhanayunviranaga obongwa.
Mahugulo m'efo
^ Ao “mukembwirwe.”
^ Ao “okembwirwe.”
^ Ao “okukembulwa.”
^ Chinwa oku chinwa, “mwaliri mwalibirha bwinja.”
^ Ao “engezo.”
^ Ao “okukembulwa.”
^ Ao “bachikone; bachisaye,” nantyo eyi barhakachigala kukenga amarhegeko bowe bonyine baliri bashigikira.
^ Ao “obulozi.”
^ Chinwa oku chinwa “etunda ly’eroho.”
