Oku Bagalatiya 4:1-31
4 Mbabwirire oku amango moshi owashokoola achili mwana mudorho, ntaho alekene n’omuja chiro akaba oku ye waliha w’ebintu byoshi.
2 Anaba eyi ali omu fune z’abalembi bage n’abemangizi b’ahamwabo kugera oku kasanzi eshe alipangire.
3 Ntyo kon’okola, amango nerhu rhwalichili badorho, rhwaliri baja b’okuntu egulu linawaza n’okuntu linachigendesa.
4 Aliko akasanzi kalipangirwe kabere kayenera, Mungu arhuma Omugala, aburhwa n’omukazi, aba n’eshishi w’amarhegeko,
5 omu kuntu alikule abali eshishi w’amarhegeko omu kubagula, yi rhujirwa bagala ba Mungu.
6 Bobuno, bulala muli bagala, Mungu arhumire eroho ly’Omugala omu mirhima yerhu, n’elyola roho lili lyahamagala n’omulenge: “Abba,* Darha!”
7 Nantyo, orhachili muja s’okala mugala; n’akaba oli mugala, k’okuderha oku nawe washokoola kugerera Mungu.
8 Chiro akaba ntyo, amango murhaliyinji Mungu mwaliri baja ba bamungu b’obubeshi.
9 Aliko bunola mukala mumenyere Mungu, changwa bunola Mungu akala abayinji, bulagurhe mwakashuba kugalukira ebintu bizambire birhanagwerhe echi bimalire n’okulonza kushuba kubikolera nka baja?
10 Munakenga bwenene esiku, emyezi, ebihe n’emyaka.
11 Ndi nabayubahira oku nkabaga byoshi najirire eju yenyu byafire busha.
12 Bene-berhu, mbahemere mube nk’oku ndi, bulala nani burhanzi naliri nk’oku muli. Nta chibi mwalinkolere.
13 Aliko muyinji oku bulwala bo bwampaga orozo l’okubatangaziza emyazi minja ob’oburhanzi.
14 Na chiro akaba ok’obulwala bwani chaliri chigeregezo ku mwabo, murhankoleraga oku kasuzaguro changwa mukanyunvira eshinya;* si mwalinkaribisize nka malayika wa Mungu, nka Kristu Yesu.
15 Ngahe bulala busime mwaligwerhe bwajire? Bulala nakayemeza oku nka byakagalikene, mwakayomwere amasu menyu mwanamampa.
16 Bobuno, nazindire eyi nabere mwanzi wenyu bulala nababwirire obukweri si?
17 Bali bajira okwabo koshi yi muja oku lunda lwabo, aliko arhali omu muhigo gwinja. Balonzeze babankuleko yi mugwarha enyorha y’okubakulikira.
18 Amango moshi, kuli kwinja omuntu ajire okwage koshi yi muja oku lunda lwage, aliko ajire ntyo omu muhigo gwinja, arhanali amango ndi haguma nenyu monyine,
19 mwabo bana bani badorho, ndi nashuba kuyunva emikero y’okuburhwa kwenyu kuhika amango oborhere bwa Kristu bwabajamo.
20 Ndi nachifija oku nakabere haguma nenyu mw’akala kasanzi omu kuntu nganire nenyu omu yindi-yindi njira, bulala ebyenyu byanvurugire obwenge.
21 Mumbwirage, mwabo muli mwalonza kuba eshishi w’amarhegeko, murhayunva eby’Amarhegeko maderhere si?
22 Omufano, biyandikirwe oku Abrahamu aligwerhe bagala babiri. Aburhaga muguma oku mujakazi n’owindi oku mukazi oli huru;
23 aliko ey’aburhaga oku mujakazi, aburhwaga nk’oku abandi bana banaburhwa, n’ey’aburhaga oku mukazi oli huru, aburhwaga kugerera echilagane.
24 Ebyola byaliherhe echindi chintu bishushanyize; bulala abola bakazi bombi bashushanyize ndagano ebiri. Ndagano nguma eli y’oku Musozi* Sinayi, enarhuma abana baburhwa eyi bali baja, enashushanyize Hagari.
25 Hagari ashushanyize Sinayi, musozi muguma g’omu Arabiya, anashushanyize e Yerusalemu ya zene bulala eli omu buja n’abana bayo.
26 Aliko Yerusalemu w’enyanya ali huru, ye na nyaama.
27 Bulala Amandiko maderhere: “Ochishinge, woyo mukazi w’engumba orhasaga kuburha; obande empundu, woyo mukazi orhasaga kuyunva emikero y’okuburha; bulala abana b’omukazi wali walekerwe bali banene bwenene kulusha ab’omukazi ogwerhe omulume.
28 Bobola bene-berhu, muli bana b’omu chilagane kuguma na Isaka.
29 Aliko nka kulala owaburhwaga nk’oku abandi bana banaburhwa arhonderaga kulibuza owaburhwaga kugerera eroho, ntyo kubinali na zene.
30 Chiro akaba ntyo, bichi Amandiko maderhere? “Ofukuze omujakazi n’omugala, bulala mugala w’omujakazi arhashokoola chiro haba n’akatyu haguma na mugala w’omukazi oli huru.”
31 Bobola bene-berhu, rhurhali bana b’omujakazi si rhuli bana b’omukazi oli huru.
