Oku Bagalatiya 2:1-21
2 Enyuma wa myaka 14, nashuba kuzamukira e Yerusalemu eyi ndi na Barnaba, narhola na Tito rhwagenda naye.
2 Najagayo bulala ntyo kunalibishulirwe; nabamenyesa emyazi minja naliri nahubiri omu bantu b’amashanja. Omu bwihunze nayibwira abalume bakengerwe bwenene, bulala naliri nalonza kumenya akaba kweri akasi naliri nakola kaliri kenja. Bulala akaba arhali ntyo, akasi koshi naliri nakola n’obushiru kakabere ka busha.
3 Na chiro akaba oku Tito walimperekeze aliri Mugiriki, ntaye walimusezeze akatwe.*
4 Aliko echola chibazo charhengereraga eju y’abalumbwa mpu bene-berhu balerhwaga bwibisho barhujamo, basheshera ahakagarhi kerhu omu kuntu bayinje baneeka obuhuru rhunasiimira omu buguma na Kristu, yi bagala kurhujira baja loshi-loshi;
5 rhurhabayemereraga, rhurhanachichaga bufi embere zabo chiro haba na mu kasanzi kageke, y’obukweri bw’emyazi minja bugenderera kuba haguma nenyu.
6 Aliko oku bilolere balala baliri babonekana nka bali b’akamaro; chiro akaba baliri bantu bali gurhe, nyono nta tofauti nalibwene bulala Mungu arhalola okuntu omuntu abonekene embuga. Abola bantu balikengerwe ntacho chihyahya balinyongerere.
7 Ahubwe, babwene oku nahaabirwe akasi k’okuhubiri emyazi minja oku barhakatirwe,* nk’oku Petro naye ahaabwaga akasi k’okuhubiri emyazi minja oku bakatirwe;
8 bulala olala wahaaga Petro emisi y’okuba ntumwa oku bakatirwe,* ye wampaga emisi nani y’okuba ntumwa oku bantu b’amashanja.
9 N’amango barhegera olukogo rhurhakwanene nahaabirwe, Yakobo, Kefa* na Yowane balibonekene nka nkingi z’echibaga, barhuha okuboko kw’ekulyo nyono na Barnaba, omu kuyerekana oku rhuli rhwakola omu buguma, omu kuntu rhwabo rhuje emwa bantu b’amashanja aliko bowe baje emwa bantu bakatirwe.*
10 Echintu balirhuhemere chonyine, balirhubwirire oku rhurhayibagiraga abakene, nanachihanganire bwenene kujira ntyo.
11 Aliko amango Kefa* ayinja e Antiyokiya, nalimupingire masu oku masu bulala byalibonekene bwinja oku ali omu magosa.
12 Bulala embere abantu barhengaga emunda Yakobo ali bahike, aliri asangira n’abantu b’amashanja. Aliko babere bahika, aleka kusangira nabo achiheba eburhambi, bulala aliyubahire ab’omu chigusho ch’abakatirwe.*
13 Abandi Bayahudi nabo bachihira haguma naye m’obola bulyalya, chiro na Barnaba ashumikwa akole obola bulyalya haguma nabo.
14 Aliko nabere nabona k’olugenzi lwabo lurhapatene n’obukweri bw’emyazi minja, nabwira Kefa* ntya embere zabo boshi: “Akaba woyo, chiro akaba k’oli Muyahudi olamire nk’oku abantu b’amashanja banalama, s’arhali nk’oku Abayahudi banalama; gurhe wakaja waseza abantu b’amashanja balame omu kukulikiza emigenzo y’Abayahudi?”
15 Rhwabo nka Bayahudi b’akaburhano, s’arhali banyabyaha barhengaga omu mashanja,
16 rhumenyere oku omuntu anatangazwa kw’ali munyakunali, arhali kugerera ebijiro by’amarhegeko, si kugerera obwemere mu Yesu Kristu bonyine. Bobola rhwabo rhwahebere obwemere bwerhu mu Yesu Kristu yi rhutangazwa oku rhuli banyakunali kugerera obwemere mu Yesu Kristu s’arhali kugerera ebijiro by’amarhegeko, bulala nta muntu n’omuguma watangazwa kw’ali munyakunali mp’okwenge akolere ebi amarhegeko maderhere.
17 Bobola akaba rhwabo rhwabonekene oku rhuli banyabyaha amango rhuli rhwalonza rhutangazwe oku rhuli banyakunali kugerera Kristu, k’okuderha oku Kristu ali arhuhira omurhima rhujire echaha si? Nanga haba n’akatyu!
18 Nka nshubire kuyumbaka ebi nabaga nashandwize, eyi namayerekana oku ndi nyankolamaligo.
19 Bulala naliri nakulikira amarhegeko, nafire oku bilolere amarhegeko, omu kuntu embere za Mungu mbe y’indamire.
20 Namanikirwe oku murhi haguma na Kristu. Arhachili nyono nye ndamire, si Kristu ye lamire omu buguma nani. Kweri, akalamo ndamire zene omu mubiri, nkalamire omu bwemere mu Mugala wa Mungu, wanzigiraga ayemera afe eju yani.
21 Ntali nalahira olukogo lwa Mungu rhurhakwenene, bulala akaba okunali kunalerhwa n’amarhegeko, ahola eyi Kristu afirire busha.
