Oku Bagalatiya 3:1-29
-
Obwemere bulushire okukulikiza Amarhegeko (1-14)
-
Omunyakunali nj’alama kugerera obwemere (11)
-
-
Echilagane bahaaga Abrahamu chirhayeneraga kugerera Amarhegeko (15-18)
-
Oluburho lwa Abrahamu, Kristu (16)
-
-
Aha Amarhegeko marhengereraga n’omuhigo gwamo (19-25)
-
Bagala ba Mungu kugerera obwemere (26-29)
-
Oluburho lwa Abrahamu, balala bali bantu ba Kristu (29)
-
3 Ego Bagalatiya barhaherhe bwenge! Nde wabahirire mw’amala mashumi mabi, mwe bantu mwaliyunvirhe bwinja-bwinja okuntu Kristu amanikwagwa oku murhi?
2 Ngwerhe chibazo chiguma nababaza: Mwapataga eroho kugerera ebijiro by’amarhegeko, changwa kugerera obwemere mwagwarhaga omu bintu mwayunvaga?
3 Gurhe mwakava mwabula obwenge ntyo? Burhanzi mwaliri mwayerekezwa n’eroho, gurhe mwakaja mwazinda eyi muli mwayerekezwa n’omubiri?
4 Mwahuranaga malala malibuko moshi oku busha si? Nchizerere oku kweri murhalibukiraga busha!
5 Obola si, olala onabaha eroho n’okujira ebisomerene ahakagarhi kenyu, anajira ntyo bulala mwakolere eby’amarhegeko maderhere, changwa eju y’obwemere bwenyu omu bimwayunvaga?
6 Bili nka kulala Abrahamu “agwarhaga obwemere mu Yehova, n’eju y’echola aganjwa oku ali munyakunali.”
7 Kweri mumenyere oku balala banafarha obwemere bwenene ba bagala ba Abrahamu.
8 Mungu abaga aderhere omu Mandiko oku akatangazize abantu b’amashanja oku bali banyakunali kugerera obwemere bwabo. Alibere atangaziza Abrahamu emyazi minja amango aderhaga ntya: “Amashanja moshi nji magishwa kugerera woyo.”
9 Bobola balala banafarha obwemere bwenene bali bagishwa haguma na Abrahamu, waligwerhe obwemere.
10 Buli yeshi olangalire okukola eby’amarhegeko mahemere, avumirwe;* bulala Amandiko maderhere ntya: “Buli muntu orhagenderera kukola byoshi biyandikirwe omu chitabu ch’omuzingo ch’Amarhegeko avumirwe.”
11 Echindi, bibonekene oku nta muntu onatangazwa munyakunali embere za Mungu kugerera amarhegeko, bulala “omunyakunali alama kugerera obwemere.”
12 Amarhegeko marhayumangiire oku bwemere, s’ahubwe “omuntu onakola ebyola bintu alama kubigererako.”
13 Kristu arhugulire, arhukula omu muvumo* gw’Amarhegeko, avumwa ahali herhu; bulala amandiko maderhere: “Buli muntu wamanikwa oku murhi avumirwe.”*
14 Ebyola byabaga ntyo y’emigisho ya Abrahamu eyinja oku bantu b’amashanja kugerera Kristu Yesu, omu kuntu kugerera obwemere bwerhu rhupate eroho lyalaganywaga.
15 Bene-berhu, ndi naderha omu kukolesa omufano g’omu kalamo ka buli lusiku: Amango endagano yamayemerwa, chiro akaba yayemerwaga na muntu muguma, ntaye wakayishanda changwa mpu ayongere mw’ebindi.
16 Abrahamu n’oluburho lwage ba bahaabwaga ebilagane. Amandiko marhaderhere, “n’oku bana bawe,” wamenya nka bali banene. S’ahubwe maderhere, “n’oku luburho lwawe,” omu kuyerekana oku ali muguma, yekala Kristu.
17 Echindi naderha che chinola: Amarhegeko mabagaho myaka 430 enyuma waho, marhavunaga endagano Mungu ajiraga burhanzi, nantyo marhashandaga echilagane.
18 Bulala akaba enshokano* eyimangiire oku Marhegeko, ahola eyi erhachiyimangiire oku chilagane; aliko Mungu oku bwinja bwage aliyihere Abrahamu kugerera echilagane.
19 Bobuno Amarhegeko mali ma bichi? Mayongerwaga y’amagosa mabonekana bwinja kuhika amango oluburho bahaaga echilagane lwakahikire; n’amola marhegeko mahaanwaga kugerera bamalayika omu kukolesa efune y’omunvisikanyi.
20 Omu bilolere muntu muguma harhakaba omunvisikanyi, aliko amango Mungu ahaanaga echilagane, ajiraga ntyo yenyine.
21 K’okuderha oku Amarhegeko manapinga ebilagane bya Mungu si? Nanga haba n’akatyu! Bulala nk’erhegeko lyahaanwaga lyakagalire kuhaana akalamo, okunali kwakabereho kugerera amarhegeko.
22 Aliko Amandiko mahebere ebintu byoshi omu burhegesi bw’echaha, omu kuntu abagwerhe obwemere bapate ebintu binja byalaganywaga balala bagwerhe obwemere mu Yesu Kristu.
23 Aliko embere obwemere buhike, rhwaliri rhwalangwa omu marhegeko, eyi rhushwekerwe omu kulindira obwemere bwaliri hofi kubishulwa.
24 Bobola Amarhegeko maliyinjire kuba mulembi werhu w’okurhuyerekeza kugera ku Kristu, omu kuntu rhutangazwe oku rhuli banyakunali kugerera obwemere.
25 Aliko lero bulala obwemere bwahikire, rhurhachili rhwalangwa n’omulembi.
26 Kweri, mweshi muli bagala ba Mungu kugerera obwemere bwenyu mu Kristu Yesu.
27 Bulala mweshi mwabatizwaga mu Kristu, mwayambere Kristu.
28 Nta tofauti echiliho ahakagarhi k’Omuyahudi n’Omugiriki, ahakagarhi k’omuja n’orhali muja, ahakagarhi k’omulume n’omukazi, bulala mweshi muli muntu muguma omu buguma na Kristu Yesu.
29 Echindi akaba muli bantu ba Kristu, kweri muli luburho lwa Abrahamu, bantu bashokoola echilagane Mungu alaganyaga.
