Oku Bagalatiya 1:1-24
1 Nyono Paulo, ndi ntumwa arhali erhengere emw’abantu changwa kugerera omuntu, si kugerera Yesu Kristu na Mungu Darha wa mufulaga,
2 nyono na bene-berhu boshi bali haguma nani, na mayandikira ebibaga bye Galatiya:
3 Darha Mungu na Waliha Yesu Kristu babahe olukogo rhurhakwanene n’omurhula.
4 Achihaanire eju y’ebyaha byerhu y’arhuchungula kurhenga mw’elila gulu libi omu kukulikiza obulonza bwa Mungu werhu kandi Darha,
5 okwanene kuhaabwa obukuuze esiku n’amango. Ame.
6 Nsomerwe okubona mwahindamukire juba-juba mwaleka olala wabahamagalaga oku lukogo rhurhakwanene lwa Kristu, mwashimba eyindi-yindi myazi minja.
7 Arhali k’okuderha oku haba eyindi myazi minja, si hali bantu baguma bali babavuruga n’okulonza kuhindamula emyazi minja elolere Kristu.
8 Aliko, chiro muguma mu rhwewe changwa malayika orhengere embingu ayinja, akabatangaziza emyazi minja erhashushire n’emyazi minja rhwabatangazizaga, avumwe.*
9 Nk’okurhwanabaga rhwaderhere, na mashuba kuderha, hakajira omuntu wabatangaziza emyazi minja erhashushire n’eyi mwabaga mwayemerere, avumwe.*
10 Omu bukweri, ndi nalonza kuyemerwa n’abantu changwa ndi nalonza kuyemerwa na Mungu? Bantu ba ndi nalonza kusimisa si? Nka nabaga eyi bantu ba ndi nagenderera kusimisa, ntakabere eyi ndi muja wa Kristu.
11 Bobola bene-berhu, ndonzeze mumenye oku emyazi minja nabatangazizaga erharhengaga emw’abantu,
12 bulala nta yihaabwaga n’omuntu, arhanali muntu wayinyigirizaga, si nayipataga kugerera okubishulirwa na Yesu Kristu.
13 Okuderha okuli, mwayunvirhe oku bilolere olugenzi lwani lwa mira amango nalichili omu dini ly’Abayahudi, okuntu naliri nagenderera kulibuza echibaga cha Mungu bwenene n’okuchishandaza,
14 naliri najira n’amajambere manene omu dini ly’Abayahudi kulusha bantu banene b’omu shanja lyani baliri omu lugero lwani, bulala naligwerhe bushiru bunene oku bilolere emigenzo ya badarha.
15 Aliko Mungu wanchaga oku munyonyo gwa nyama n’okumpamagala kugerera olukogo lwage rhurhakwanene, abere abona oku kuli kwinja
16 abishule Omugala kungererako, omu kuntu ntangazize abantu b’amashanja emyazi minja oku bimulolere, nta muntu nalijire kubaza ahola han’aho;
17 ntanazamukiraga e Yerusalemu kulola ababaga ntumwa embere zani, si nalijire e Arabiya n’enyuma waho nagaluka e Damasko.
18 Myaka esharhu enyuma waho, naja nazamukira e Yerusalemu kurhangula Kefa,* nabera naye siku 15.
19 Aliko nta yindi ntumwa nalibwene, olekere Yakobo mwene-wabo Waliha.
20 Oku bilolere ebintu ndi nabayandikira, namayemeza embere za Mungu oku ntali naderha obubeshi.
21 Enyuma z’ahola naja omu materitware me Siriya ne Kilikiya.
22 Aliko ebibaga bye Yudeya byaliri omu buguma na Kristu, birhalinyinji.
23 Baliri bafa chakuyunva abantu bali baderha ntya: “Olola muntu waliri arhulibuza mira, akala ali atangaza emyazi minja elolere obwemere aliri ashandaza.”
24 Bava barhondera kukuuza Mungu eju yani.
