Oku Baefeso 6:1-24
6 Mwabo bana, mukenge abazere benyu omu buguma na Waliha, bulala okujira ntyo kukwanene.
2 “Okenge yisho na nyoko” lye rhegeko lirhanzi liherhe echilagane:
3 “Y’ebintu byoshi bikugendera bwinja, onalame siku zinene oku gulu.”
4 Nenyu badarha, murhagendaga mwagayisa abana benyu, aliko mugenderere kubalemba omu mpanulo n’enyigirizo za Yehova.
5 Nenyu baja, mukenge banahamwenyu ba kunola gulu, omu kuyubaha n’okudirhimana kurhenga oku murhima gurhali mu bulyalya, nk’oku munakenga Kristu,
6 arhali amango bali bababona monyine mpu yi musimisa abantu, s’aliko mukole nka baja ba Kristu omu kujira obulonza bwa Mungu n’omurhima goshi.
7 Mukolere banahamwenyu n’omurhima gwinja, nka Yehova yi muli mwakolera s’arhali bantu,
8 bulala mumenyere kw’amenja buli muguma anakola, Yehova nj’amujuhamo, abe muja changwa muntu wabere huru.
9 Nenyu bakulu b’akasi, mugenderere kukolera abaja oko kon’okola, buzira kubayubahisa, bulala muyinji oku mweshi muherhe Nahamwenyu muguma omu mbingu, arhanajira kabolo.
10 Ech’obuzinda, mugenderere kugwarha emisi mu Waliha n’omu buhashe bw’emisi yage.
11 Muyambale entwaro zoshi zirhengere emwa Mungu yi mugala kusimika n’okulwisa ebijiro by’amayeri* ma Ibilisi;
12 bulala rhuli rhwalwa evita arhali n’abantu b’omubiri n’eshagama, si rhuli rhwalwisa oburhegesi, abakulu, abami b’elila gulu ly’omwizimya, n’abazimu banene bali omu chalege.
13 Che chirhumire murhole entwaro zoshi zirhengere emwa Mungu, yi mugala kuhimana oku lusiku l’obubi, n’enyuma y’okumala kuyeneza buli chintu, muyorhe muserere.
14 Che chirhumire, muyorhe muserere, eyi mushwekere omukaba g’obukweri omu mankinya,* eyi munayambere olugogorho l’okulanga echifuba k’okuderha ehaki,
15 n’amagulu menyu mabe yi mayambere ebirato, omu kuba tayari kutangaza emyazi minja y’omurhula.
16 Olekere ebyola byoshi murhole empenzi nzibuzibu y’obwemere mwakolesa yi mugala kuzimya emyambi yoshi eli yakolera y’olala mubi.
17 Echindi, muyemere esapo y’echuma y’obuchunguke; n’engorho y’eroho, k’okuderha echinwa cha Mungu,
18 eyi munali mwasalira buli buko bw’amasala, n’okulakirira Mungu; mu buli hali, mugenderere kusalira kugerera emisi y’eroho. M’ogola muhigo gon’ogola, muyorhe muzene, eyi munali mwalakirira Mungu buzira kuleka oku bilolere abachesibwa boshi.
19 Nani munsalirire, omu kuntu amango namabumbula obunu mpate ebinwa, y’ingala kuderha buzira buba amango ndi namenyesa esiri nchesibwa y’emyazi minja,
20 ndi nakolera nka murhumwa oli m’obulegule, n’omu kuntu ngale kuderha oku bilolere eyola myazi minja buzira buba, nk’oku nkwanene kuderha.
21 Yi nenyu mumeya emyazi yani na gurhe ndi, Tikiko mwene-werhu muzigirwa onali mukozi mwimana wa Waliha, abamenyesa ebintu byoshi.
22 Echola che chirhumire namurhuma emunda muli, yi mumenya emyazi yerhu, anarhulirize emirhima yenyu.
23 Bene-berhu bagwarhe omurhula n’obuzigire haguma n’obwemere burhengere emwa Darha Mungu n’emwa Waliha Yesu Kristu.
24 Olukogo rhurhakwanene lube ku boshi bagwerhe obuzigire burhakahwa ku Nahamwerhu Yesu Kristu.
