Oku Baefeso 5:1-33
5 Nantyo, mube bantu banayiganya Mungu bulala muli bana bage bazigirwa,
2 munagenderere kulama omu buzigire, nka kulala Kristu arhuzigiraga achihaana nka ntulo, kandi nka nterekero eju yerhu, mpumulo nyinja emwa Mungu.
3 Obubaraga, na buli buko bw’ezinga changwa obuhugu birhayunvikanaga chiro ahakagarhi kenyu, nk’oku abachesibwa bakwanene kuchigendesa;
4 harhayunvikanaga chiro olungezi lukozeze eshoni, ebinwa by’obuhwinja, emizaha ebihire; k’okuderha, ebintu birhakwanene, s’ahubwe mubwire Mungu koko.
5 Bulala muyinji, munamenyere mwenyine oku nta mbaraga, omuntu orhachere, changwa omuntu w’obuhugu, k’okuderha onaharamya esanamu, wakashokoola omu Bwami bwa Kristu n’obwa Mungu.
6 Ntaye obarhebekage n’ebishugu by’ebinwa, bulala ebintu bili nk’ebyola bye byarhuma Mungu alerha oburhe bwage oku bantu barhakenga.
7 Che chirhumire, nta chintu mushangirage nabo;
8 bulala burhanzi mwaliri mwizimya, aliko zene mukala muli mwangaza oku bilolere Waliha. Mugenderere kuchigendesa nka bana b’omwangaza,
9 bulala omwangaza gunalerha amatunda ma buli buko b’obwinja, okunali n’okuli.
10 Mugenderere kulola bwinja bichi biyemererwe emwa Waliha;
11 muleke okukola haguma nabo ebijiro birhayana matunda by’omwizimya, s’ahubwe mubibishule bibonekane gurhe biba.
12 Bulala ebintu banajira omu siri, bikozeze eshoni chiro okubiderha.
13 Ebintu bibi byoshi bili byabishulwa kugerera omwangaza, nantyo byanabonekana oku bili bibi.
14 Che chirhumire, byaderherwe: “Woyo muntu oliro, zuka; yimanga orhenge omu bafu, na Kristu akukolezeza.”
15 Bobola mugenderere kuchilanga yi murhachigendesa nka bantu barhaherhe bwengehe si nka bantu bayengehere,
16 omu kukolesa bwinja bwenene akasanzi kenyu, bulala zinola siku zabihire.
17 Che chirhumire muleke okuba bantu barhaherhe bwenge, si mugenderere kurhegera obulonza bwa Yehova buli buhe.
18 Echindi, muleke okulaluka edivayi, enarhuma omuntu akola ebintu bibi bwenene,* aliko mugenderere kuyunjuzwa eroho lichesibwa.
19 Muganire n’abandi kugerera enyimpo, okusingiza Mungu, enyimpo z’okuharamya, eyi muli mwayimpira Yehova n’omurhima goshi omu kukulikiza omuziki.
20 Esiku zoshi mubwire Mungu werhu kandi Darha koko oku bintu byoshi, omu zino lya Nahamwerhu Yesu Kristu.
21 Buli muntu achiche bufi oku wabo omu kuyubaha Kristu.
22 Abakazi bachiche bufi ku b’eba nk’oku banachicha bufi ku Waliha,
23 bulala omulume ali shefu wa mukage nk’oku Kristu ali shefu w’echibaga, na yewe yenyine ali muchunguzi w’ogola mubiri.
24 Omu bukweri, nka kulala echibaga chinachicha bufi ku Kristu, abakazi nabo bachiche bufi ku b’eba mu buli chintu.
25 Mwabo balume, mugenderere kuzigira bakenyu, nk’oku Kristu naye alizigiire echibaga, achihaana yewe yenyine eju yacho,
26 omu kuntu achese echibaga omu kuchishuka n’amenji; k’okuderha kugerera echinwa cha Mungu,
27 y’alerha echibaga embere zage eyi chiherhe obukuuze, chili buzira tashe na buzira mifunyenye changwa echindi chintu choshi chili nk’echola, si chibe chichesibwa na buzira shembo.
28 Intyo kon’okola abalume bakwanene kuzigira bakabo nk’oku banazigira emibiri yabo bowe bonyine. Omulume onazigira mukage ey’achizigiire yewe yenyine,
29 bulala nta muntu onashomba omubiri gwage, s’ahubwe anagulisa n’okugushishikala omu buzigire nka kulala Kristu anakolera echibaga,
30 bulala rhuli birumbu by’omubiri gwage.
31 “Che chirhumire omulume nj’aleka eshe na nyina anachishwekera ku mukage, bombi banaba mubiri muguma.”
32 Eyila siri nchesibwa egalihire bwenene. Bunola ndi naderha oku bilolere Kristu n’echibaga.
33 Chiro akaba ntyo, buli muguma wenyu akwanene kuzigira mukage nk’oku anachizigira; oku bwindi, omukazi naye bihemere agwarhe bukenge bunene kw’eba.
Mahugulo m'efo
^ Ao “enarhuma omuntu akaranguka anagambwa kuchigalula.”
