Oku Baefeso 4:1-32
4 Che chirhumire, nyono mushwekwa mu Waliha, mbahemere muchigendese bwinja omu bulyo bupatene n’empamagalo mwapataga;
2 oku bwirhohye boshi n’obwirhonzi, omu kulindira, okulemberana omu buzigire,
3 eyi munali mwachihangana bwenene muyorhe omu buguma bw’eroho omu chifundo ch’omurhula.
4 Hali mubiri muguma, na roho liguma, nka kulala mwahamagerwe ku bulangalire buguma;
5 Waliha muguma, bwemere buguma, bubatizo buguma;
6 Mungu muguma na Darha wa boshi, kugerera boshi na mu boshi.
7 Lero buli muguma werhu ahaabirwe olukogo rhurhakwanene omu kukulikiza okuntu Kristu apimiire buli muguma oluhembo lwa busha.
8 Bulala Amandiko maderhere: “Amango azamukaga, ashwekula abalishwekerwe; ahaana abalume nka mpembo.”
9 Bobuno, echinwa “azamukaga” k’okuderha gurhe? K’okuderha oku aliyandagere omu fasi z’eshishi bwenene, k’okuderha oku gulu.
10 Olala wayandagalaga ye wanazamukaga enyanya bwenene w’embingu zoshi, omu kuntu ebintu byoshi biyenere.
11 Ahaana baguma nka ntumwa, abandi nka balebi, abandi nka bahubiri b’emyazi minja,* abandi nka bangeri n’abalimu,
12 yi barhabala abachesibwa bachigendese bwinja,* omu kuntu bakolere abandi, bayumbake omubiri gwa Kristu,
13 kuhikira aha rhweshi rhwagwarhira obuguma b’obwemere, n’okugwarha obumenyi burhaherhe magosa oku bilolere Mugala wa Mungu, omu kuntu rhube bantu bakulire, n’okuhikira olugero l’okukula luyenere nk’olwa Kristu.
14 Bobola rhurhachikwanene kuba bana, omu kuhehwa eyi n’eyi nka bivundu by’omulaba n’okuhekwa eyi n’eyi na buli muyaga gw’enyigirizo, kugerera obubeshi bw’abantu, kugerera amayeri manakoleswa omu kurhebekana.
15 Aliko omu kuba bantu banaderha obukweri, kugerera obuzigire rhugenderere kukula omu bintu byoshi omu kuyiganya Kristu, bulala ye shefu werhu.
16 Kumugererako, omubiri goshi gunashomekwa haguma n’okukola omu buguma amango buli chirumbu chili chakola akasi kacho. N’amango buli chirumbu chili chakola bwinja, omubiri goshi gunakula oku gunali gwachiyumbaka omu buzigire.
17 Bobola ebila binderhere n’okubiyemeza mu Waliha, oku murhachigendereraga kuchigendesa nk’oku abantu b’amashanja banachigendesa, bulala banafa chakulama omu kukulikiza amawazo mabo marhaherhe echi mamalire.
18 Obwenge bwabo buli omu mwizimya, banaheberwe hale n’akalamo Mungu anahaana, eju y’obuhwinja bubalimo, n’eju y’emirhima yabo mizibu.
19 Barhayemera chiro amakanuni m’okuchigendesa, bachihebere omu lugenzi l’obumaguza lwa buzira shoni, yi bagwarha obuhugu b’okukola buli buko bw’ebijiro bibi.
20 Aliko arhali ebyola bi mwayigaga oku bilolere Kristu,
21 akaba kweri mwalimuyunvirhe, na yewe yenyine abayigiriza, omu bulyo bupatene n’obukweri buli mu Yesu.
22 Mwayigirizwe okukabula oborhere bwa mira bupatene n’olugenzi lwenyu lwa mira, lunaharibiswa omu kukulikiza enyifinjo zalo zinarhebekana.
23 Munakwanene kugenderera kujirwa buhyahya omu buhashe bunarhegeka enkengero zenyu,
24 munakwanene kuyambala oborhere buhyahya bwalemwaga omu kukulikiza obulonza bwa Mungu omu kunali n’obwimana b’okuli.
25 Che chirhumire, obola rhurhachiderha obubeshi, buli muguma abwire omuturanyi* wage okuli, bulala buli muguma werhu ali chirumbu ch’owindi.
26 Muyunve oburhe aliko murhakolaga echaha, murhayemeraga ezuba lyazika munachiyunvirhe oburhe;
27 murhahaaga Ibilisi orozo l’okubashumika.
28 Omwizi arhachizimbaga; s’ahubwe akole n’obushiru, omu kukola akasi kenja n’efune zage y’abona echintu akaha omuntu oli omu bulagirire.
29 Echinwa chibolere chirharhengaga omu bunu bwenyu, s’echinwa chinja chonyine chakayumbaka abandi omu kukulikiza ebi bakenere yi chilerhera enyungu abachiyunva.
30 Kandi, murhalemaga mwagayisa eroho lichesibwa lya Mungu, eli Mungu akolesaga amango abahira kw’akashe omu kuntu nji mulikulwe oku lusiku l’okulikulwa kugerera enchungu.
31 Mukabulire buli buko bw’echishika* chibi, obukali, oburhe, entonganyi, ebidusi na buli chochi chakababaza.
32 Ahubwe mukolerane oku bwinja, mugwarhane k’olukogo, mubabalirane oku bulonza nk’oku Mungu abababalire oku bulonza kugerera Kristu.
