Oku Baefeso 2:1-22
2 Echindi, Mungu abahere akalamo, chiro akaba oku mwaliri bantu bafire eju y’amagosa n’ebyaha byenyu
2 mwaliri mwalambagiramo mango maguma omu kukulikiza ebya mu linola gulu, omu kukulikiza omurhegesi oli warhegeka emiwazize y’abantu ba mu linola gulu eli nka muyaga guli hoshi, emiwazize eli yakola omu bantu b’ebigamba.
3 Nechi, mango maguma rhwaliri mubo eyi rhweshi rhuli rhwachigendesa omu kukulikiza enyifinjo z’omubiri gwerhu, eyi rhuli rhwayeneza obulonza b’omubiri n’amawazo merhu, na kurhenga rhuburhwa rhwaliri bantu bakwanene oburhe bwa Mungu kuguma n’abandi.
4 Aliko, Mungu omu lukogo lwage lunene, eju y’obuzigire bunene arhuyerekere,
5 arhuhere akalamo arhuheba n’omu buguma na Kristu, chiro n’amango rhwaliri bantu bafire eju y’amagosa merhu. Nenyu mwachungwirwe kugerera olukogo rhurhakwanene.
6 Echindi, Mungu arhuhere akalamo, arhuhira haguma naye anarhuyikaza haguma omu fasi z’omu mbingu omu buguma na Kristu Yesu,
7 omu kuntu omu bihe* byayinjire, ayerekane olukogo lwage lunene bwenene rhurhakwanene, omu kurhuyereka obwinja bwage rhwabo rhuli omu buguma na Kristu Yesu.
8 Kugerera olola lukogo lwage rhurhakwanene, mwachungwirwe kugerera obwemere. Birhabaga ntyo kugerera obuhashe bwenyu; s’ahubwe luli luhembo lwa busha lurhengere emwa Mungu.
9 Nanga, birhalerherwe n’ebijiro byenyu, omu kuntu ntaye ogwarhage empanvu y’okuchitapa.*
10 Rhuli kasi k’efune za Mungu, rhwanalemwaga omu buguma na Kristu Yesu yi rhukola ebijiro binja, ebi Mungu abaga arhurheganyiza embere w’echihe yi rhubikola.
11 Che chirhumire, muyibuke oku mwabo bantu b’amashanja oku bilolere omubiri, abanayirikwa “bantu bakatirwe” baliri babayirika oku muli “bantu barhakatirwe,” echintu chinajirwa n’efune z’omuntu.
12 Agola mango murhaliri omu buguma na Kristu, murhaliri Baizraeli, n’endagano za Mungu zirhalibalolere, nta bulangalire mwaligwerhe, mwanaliri omu gulu eyi murhenji Mungu.
13 Aliko lero omu buguma na Kristu Yesu, mwe mwaliri hale na Mungu mwalerherwe hofi naye kugerera eshagama ya Kristu.
14 Bulala yewe ye murhula gwerhu wajiraga bilala bigusho bibiri, chaba chigusho chiguma n’okushanda echibambazi chalibigabire.
15 Kugerera omubiri gwage, akulire h’obushombanyi, k’okuderha Amarhegeko ma Musa maliri mu n’enyigirizo, omu kuntu ebyola bigusho byombi bibe muntu muguma muhyahya, okujira omurhula,
16 n’okujira okuntu ebyola bigusho byombi bili mu mubiri muguma biyunvikane loshi-loshi na Mungu kugerera omurhi gw’amateso, bulala ayirhire obola bushombanyi kugerera omubiri gwage.
17 Anayinjire, abatangaziza emyazi minja y’omurhula mwabo mwaliri hale na Mungu, ayitangaziza n’abaliri hofi naye,
18 bulala kugerera yewe, rhweshi oku rhunali bigusho bibiri, rhugwerhe obuhuru b’okuyegera Darha kugerera roho liguma.
19 Bobuno murhachili benjiira changwa bantu ba hale, si mukala muli banyin’echihugo kuguma n’abachesibwa munali b’omu mulala gwa Mungu,
20 mwanayumbakirwe oku musinji gw’entumwa n’abachesibwa, na Kristu Yesu yenyine ye bale ly’oku pembe ly’ogola musinji.
21 Omu buguma naye, enju yoshi eli yashomekwa bwinja enali yagenderera kuluga omu kuntu ebe hekalu lichesibwa lya Yehova.
22 Omu buguma naye, nenyu muli mwayumbakwa haguma yi muba fasi ya Mungu y’okulama kugerera eroho.
