Oku Baefeso 1:1-23
1 Nyono Paulo, ntumwa ya Kristu Yesu kugerera obulonza bwa Mungu, oku bachesibwa bali omu Efeso banali bemana omu buguma na Kristu Yesu:
2 Darha Mungu na Waliha Yesu Kristu babahe olukogo rhurhakwanene n’omurhula.
3 Mungu kandi Eshe wa Nahamwerhu Yesu Kristu asingizwe, bulala arhugishire omu kurhuha emigisho yoshi enalerhwa n’eroho. Ali nk’owarhuherereyo omu mbingu, bulala rhuli omu buguma na Kristu.
4 Embere abantu babe oku gulu, Mungu arhuchagula yi rhuba omu buguma na Kristu, omu kuntu rhube bachesibwa na buzira shembo embere zage omu buzigire.
5 Bulala arhuchagulaga embere w’echihe yi rhujirwa bagala kugerera Yesu Kristu, nk’oku analisimire n’oku bulonza bwage,
6 omu kuntu asingizwe eju y’olukogo lwage rhurhakwanene l’obukuuze arhuhere kugerera Omugala muzigirwa.
7 Kugerera yewe rhwalikwirwe kugerera enchungu y’eshagama yage, nechi, amagosa merhu mababalirwa oku lukogo lwage lunene rhurhakwanene.
8 Mungu ajirire olola lukogo rhurhakwanene lube lunene ku rhwabo omu bwengehe boshi n’obumenyi,
9 y’arhumenyesa esiri zichesibwa z’obulonza bwage. Ebyola bipatene n’obulonza bwage nk’oku apangaga
10 habe obwimangizi oku buzinda bw’ebihe byahebwagaho, y’agusha ebintu byoshi haguma mu Kristu; ebintu bili omu mbingu n’ebili oku gulu. Nechi, m’olala
11 rhuli omu buguma naye, rhwanaganjirwe oku rhuli bantu bashokoola, bulala rhwachishogerwe embere w’echiche omu kukulikiza omuhigo g’olala onayeneza ebintu byoshi nk’oku achishogere omu kukulikiza obulonza bwage,
12 omu kuntu rhwe rhwabere b’oburhanzi kulangalira Kristu, rhukole akasi kasingiza Mungu n’okumukuuza.
13 Aliko nenyu mwamulangaliire amango muyunva echinwa ch’okuli, k’okuderha emyazi minja elolere obuchunguke bwenyu. Mwabere mwagwarha obwemere, abaheba kw’akashe kugerera eroho lichesibwa lyalilaganyizwe,
14 elyola roho lichesibwa chili chikinja rhwabere rhwahaabwa chiyerekene oku nji rhwashokoola, omu muhigo g’okulikula abali buhirhi bwa Mungu kugerera enchungu, yi Mungu asingizwa n’okukuuzwa.
15 Echola che chirhumire, kurhenga amango nani nayunvaga oku bilolere obwemere muherhe mu Waliha Yesu n’obuzigire muli mwayereka abachesibwa boshi,
16 ntasaga kuleka kubwira Mungu koko oku bibalolere. Ndi nagenderera kubaderha omu masala mani,
17 yi Mungu wa Nahamwerhu Yesu Kristu, Darha w’obukuuze, abaha eroho ly’obwengehe n’ely’okubishulirwa obumenyi burhagwerhe magosa oku bimulolere.
18 Anakolezeza amasu m’omurhima gwenyu, omu kuntu mumenye bulangalire buhe abahamagalire, mumenye bukuuze bungana gurhe abikiire abachesibwa omu kuntu nji babushokoole,
19 na kangana gurhe emisi yage oku birhulolere rhwabo bemezi, eli minene bwenene. N’eyola misi yage enabonekana omu bintu bikomere bwenene anakola.
20 Aliyikoleseze omu kufula Kristu n’okumuyikaza ewa kuboko kwage kw’ekulyo oku fasi z’omu mbingu,
21 zili enyanya bwenene wa buli burhegesi, obukulu, obuhashe, oburhwali, na buli zino lyahaanirwe; arhali mu chinola chihe chonyine si n’omu chihe ch’amango mayinjire.
22 Ayandageze ebintu byoshi eshishi w’ebishando bya Kristu anamujirire shefu w’ebintu byoshi bilolere echibaga.
23 Echibaga chili mubiri gwage, chiba chiyenere kugerera yewe, na yenyine anachiha byoshi chikenere.
