Oku Baefeso 3:1-21
3 Eju y’echola, nyono Paulo mushwekwa wa Kristu Yesu oku nyungu yenyu, bantu b’amashanja...
2 akaba kweri mwayunvirhe oku nashingizwe akasi k’okubarhabala yi nenyu muyunguka n’olukogo lwa Mungu rhurhakwanene,
3 oku kugerera okubishulirwa namenyesezwe esiri nchesibwa, nk’oku nabaga nayandikire oku bugeke.
4 Bobuno amango mwamabisoma, mwakayunva kangana gurhe nayunvirhe bwinja esiri nchesibwa ya Kristu.
5 Omu bindi bizazi, Mungu arhalimenyeseze abantu eyola siri nk’oku ajire ayibishulira entumwa zage zichesibwa n’abalebi kugerera eroho,
6 k’okuderha, ok’omu buguma na Kristu Yesu na kugerera emyazi minja, abola bantu b’amashanja nabo bakabere bantu bashokoola, rhweshi rhwanaba birumbu bya mubiri muguma, banashangira n’echilagane haguma nerhu.
7 Nabere mukozi w’eyila siri nchesibwa oku lukogo lunene lwa Mungu rhurhakwanene. Ampaga olola luhembo lwa busha kugerera emisi yage.
8 Nyono muntu w’eshishi kulusha ow’eshishi bwenene omu bachesibwa, nahaabirwe olula lukogo lwa Mungu rhurhakwanene yi ntangaziza abantu b’amashanja emyazi minja oku bilolere emigisho erhakaganjwa erhengere emwa Kristu,
9 binampemere ntabale buli muguma abone obwimangizi bw’esiri nchesibwa Mungu walemaga ebintu byoshi abaga abishire kurhenga mira.
10 Byabaga ntyo omu kuntu kugerera echibaga, obwengehe bunene bwa Mungu bunabonekana mu njira zinene zilengene, bumenyeswa oku burhegesi, n’oku bukulu omu fasi z’omu mbingu.
11 Ebyola bipatene n’omuhigo gw’esiku n’amango gwarholwaga oku bilolere Kristu Yesu Nahamwerhu,
12 kugerera yewe, rhugwerhe obula buhuru b’okuderha n’obuhuru b’okuyegera Mungu eyi rhugwerhe obwizere kugerera obwemere bwerhu mu Kristu.
13 Che chirhumire, mbahemere murhavunikaga omurhima eju y’okubona amalibuko ndi napata eju yenyu, bulala mabalerhera obukuuze.
14 Eju y’echola, nfukamire embere za Darha,
15 eyi buli mulala omu mbingu n’oku gulu gunapata ezino kurhenga emwage.
16 Ndi nasalira oku kugerera obukuuze bwage bunene, abahe obuhashe b’okukomera omu borhere bwenyu b’omu ndani, mugwarhe emisi kugerera eroho lyage,
17 nandi nahema oku kugerera obwemere bwenyu mujire Kristu alame omu mirhima yenyu oku buzigire. Mushinge emizi, munasezwe bwenene oku musinji,
18 omu kuntu haguma n’abachesibwa boshi mugale kuyunva bwinja obugali, obule, okulungeera, n’ekumbo,
19 munamenye oku obuzigire bwa Kristu buli bw’akamaro kulusha obumenyi boshi omuntu akagwarha, yi muyunjuzwa mw’ebintu binja byoshi Mungu anahaana.*
20 Mungu wakagala kukola binene bwenene-bwenene kulusha byoshi rhwahemere changwa byoshi rhwakawaza kugerera emisi yage eli yarhukolamo,
21 ahaabwe obukuuze kugerera echibaga na kugerera Kristu Yesu, omu bizazi byoshi esiku n’amango. Ame.
Mahugulo m'efo
^ Ebyola bintu zili ngeso za Mungu.
