Biibili naani kani ke bi diani leni geleki mabuoli, bi maadi Banabasa leni Polo n den caa goandi yaa nitaana n den ye bi yogunu. Beepo? Kelima bi den bua leni bi pala kuli yaala ŋani bi dandanlieba po. Polo den yedi ke o bua gua “ki ban le lan tie ti kpiiba po maanma.” (Jesu Tondiba Tuona 15:⁠36) O den tuo ki baa gedi, yaa dogi n foagi, ki ban paa-​ba li dandanli papaali. A nitaancianma goandikaaba yaaba n ye dinli-​dinla li ŋua yene.

Bi kpendi puuni-​ti li dandanli papaali. Li nitaancianli goandika caa goandi a nitaana yaala n pundi 20. Binli kuli o caa taalimlie ki goandi nitaanli kuli, ki tiendi dana lele leni ba. Bani leni bi puoba (li yaa sua ke bi pia bi puoba) banma pia tipo ti ñoadi. Bi yen bua ki boe leni bi nipaanba, leni a nikpela, ki ciani-​ba u laabaaliŋamo kpaanma leni biibili bangima po. Li nitaanli nni yua kuli n bua mi todima yeni, li nitaancianli goandikaaba leni a nikpela caa bi deni ki puuni-ba li papaali. A taana leni a taancianma nni bi tiendi mi maadikaama yaala n puuni-ti li dandanli papaali.​—⁠Jesu Tondiba Tuona 15:⁠35.

Bi bua yaala ŋani ti kuli po. A nitaancianma goandikaaba todi li nitaanli niba kuli n ŋanbi bi danligu leni Jeova. Bi taandi bi nikpeliba leni bi nikpeliba todikaaba ki diidi ban caa liiga maanma. Bi go puuni-​ba i tundi yaala ba todi-​ba bi tuona nni. A nitaancianma goandikaaba todi bi sanuluodiba ke bi ŋanbidi bi kpaanma tuonli. Bi go moandi bandi li nitaanli niba yaaba da kpendi panpanma, ki diidi ban caa liiga maanma. Laa goandikaaba tuuni leni li pamanli. Yua kuli tie ‘ti tuonsoanlielo’, yua n tuuni ti ŋamu po. (Korenti Yaaba Tilieli 8:⁠23) Bi dandanli leni ban ŋua Jeova maanma yeni tie tipo bontogidikaaŋanli.​—⁠Hebilunba 13:⁠7.

• Beepo ke a nitaancianma goandikaaba caa goandi a nitaana yeni?

• Lede ke ti baa fidi je bi goandima ñoadi?