Nọ Setonuna Lẹngbọhọtọ Jehovah Tọn Lẹ
Nọ Setonuna Lẹngbọhọtọ Jehovah Tọn Lẹ
“Mì nọ setonuna mẹhe to anadenanu to ṣẹnṣẹn mìtọn lẹ bo nọ litai, na yewlẹ to alindọn mìtọn họ́.”—HEB. 13:17.
NAWẸ HIẸ NA NA GBLỌNDO GBỌN?
Nawẹ mẹho agun tọn lẹ nọ yìn lẹngbọ Jiwheyẹwhe tọn lẹ gbọn?
Naegbọn lẹngbọ lẹ dona nọ dotoaina lẹngbọhọtọ pẹvi lẹ?
Naegbọn mape lẹngbọhọtọ pẹvi lẹ tọn ma yin whẹjijọ de nado nọ yí nukunpẹvi do pọ́n ayinamẹ sinai do Owe-wiwe ji yetọn lẹ?
1, 2. Naegbọn e do jẹna ayidego dọ Jehovah yí ede jlẹdo lẹngbọhọtọ de go?
JEHOVAH yí ede jlẹdo lẹngbọhọtọ de go. (Ezek. 34:11-14) Enẹ jẹna ayidego, na e gọalọna mí nado mọnukunnujẹ mẹhe nkọ Jehovah yin mẹ. To paa mẹ, lẹngbọhọtọ owanyinọ de nọ mọdọ azọngban emitọn wẹ e yin nado penukundo dagbemẹninọ po hihọ́ lẹngbọ he tin to anademẹ emitọn glọ lẹ tọn po go. E nọ deanana yé yì fihe amamú po osin po tin te (Ps. 23:1, 2); nọ họ́ yé to okle po ozán po (Luku 2:8); nọ basi hihọ́na yé sọn gbekanlin nuwledutọ lẹ si (1 Sam. 17:34, 35); nọ ze lẹngbọvu he ṣẹṣẹ yin jiji lẹ hẹn (Isa. 40:11); podọ e nọ dín dehe bu lẹ mọ bosọ nọ penukundo dehe gbleawu lẹ go ganji.—Ezek. 34:16.
2 To hohowhenu, suhugan omẹ Jehovah tọn lẹ tọn wẹ nọ yìn lẹngbọ lẹ bosọ yin glesi, enẹwutu yé mọnukunnujẹ nuhewutu Jehovah Jiwheyẹwhe do yí ede jlẹdo lẹngbọhọtọ owanyinọ de go mẹ ganji. Yé yọnẹn dọ lẹngbọ lẹ tindo nuhudo nukunpedomẹgo po ayidonugo po tọn nado sọgan whẹ́n ganji. Nudopolọ wẹ eyin na gbẹtọvi lẹ to gbigbọ-liho. (Malku 6:34) Gbẹtọvi lẹ nọ jiya eyin yé ma mọ nukunpedomẹgo po anademẹ po to gbigbọ-liho. Yé ma nọ yọ́n nuhe yin dagbe dovo na oylan, podọ yé ma tindo mẹhe na basi hihọ́na yé. Enẹwutu, yé nọ gbàpe taidi “lẹngbọ lẹ he ma tindo lẹngbọhọtọ de.” (1 Ahọ. 22:17) Ṣigba, Jehovah nọ gbọn owanyi dali wleawuna nuhudo omẹ etọn lẹ tọn.
3. Etẹwẹ mí na gbadopọnna to hosọ ehe mẹ?
3 Mílọsu mọnukunnujẹ nuhewutu Jehovah do yí ede jlẹdo lẹngbọhọtọ de go mẹ to egbehe. Jehovah gbẹ́ nọ penukundo omẹ etọn he taidi lẹngbọ lẹ go. Mì gbọ mí ni pọ́n lehe ewọ nọ deanana lẹngbọ etọn lẹ bosọ nọ hẹn pekọ wá na nuhudo yetọn lẹ do to egbehe. Mí nasọ gbadopọnna nuhe mí dona nọ wà nado mọaleyi sọn mẹtọnhopọn he Jehovah nọ dohia mí mẹ.
LẸNGBỌHỌTỌ DAGBE LỌ NỌ DE LẸNGBỌHỌTỌ PẸVI LẸ
4. Adà tẹwẹ Jesu yiwà nado penukundo lẹngbọ Jehovah tọn lẹ go?
4 Jehovah de Jesu taidi Tatọ́ agun Klistiani tọn. (Efe. 1:22, 23) Taidi “lẹngbọhọtọ dagbe lọ,” Jesu yinuwa sọgbe hẹ lẹndai po nujlomẹ Otọ́ etọn tọn lẹ po bosọ do jẹhẹnu etọn lẹ hia. Jesu tlẹ “ze alindọn etọn jo do ota lẹngbọ lẹ tọn mẹ.” (Joh. 10:11, 15) Dona nankọ die ofligọ avọ́sinsan Klisti tọn yin na gbẹtọvi lẹ! (Mat. 20:28) Lẹndai Jehovah tọn wẹ yindọ ‘mẹdepope he do yise hia to Jesu mẹ ma na yin vivasudo adavo nado tindo ogbẹ̀ madopodo’!—Joh. 3:16.
5, 6. (a) Mẹnu lẹ wẹ Jesu de nado nọ penukundo lẹngbọ etọn lẹ go, podọ etẹwẹ lẹngbọ lọ lẹ dona wà nado mọaleyi sọn tito enẹ mẹ? (b) Whẹwhinwhẹ́n titengbe tẹ wutu wẹ mí dona nọ setonuna mẹho agun tọn lẹ?
5 Nawẹ lẹngbọ lẹ nọ dohia dọ Jesu Klisti wẹ yin Lẹngbọhọtọ Dagbe yetọn gbọn? Jesu dọmọ: “Lẹngbọ ṣie lẹ nọ dotoaina ogbè ṣie, yẹn sọ yọ́n yé, bọ yé nọ hodo mi.” (Joh. 10:27) Nado dotoaina ogbè Lẹngbọhọtọ Dagbe lọ tọn, mí dona nọ hodo anademẹ etọn to onú lẹpo mẹ. Ehe nọ biọ dọ mí ni kọngbedopọ hẹ lẹngbọhọtọ pẹvi he ewọ de lẹ. Jesu dohia dọ apọsteli po devi emitọn lẹ po na zindonukọn to azọ́n he emi bẹjẹeji lọ mẹ. Yé dona nọ ‘na núdùdù lẹngbọ pẹvi Jesu tọn lẹ’ bosọ nọ “plọn” yé. (Mat. 28:20; hia Johanu 21:15-17.) Dile wẹndagbe lọ gbayipe bọ sọha devi lẹ tọn to jijideji, Jesu basi tito na Klistiani he whèwhín lẹ nido nọ yìn agun lẹ.—Efe. 4:11, 12.
6 To whenue apọsteli Paulu to hodọna nugopọntọ agun Efesu tọn lẹ to owhe kanweko tintan whenu, e dọ dọ gbigbọ wiwe ko de yé taidi nugopọntọ lẹ “nado nọ yìn agun Jiwheyẹwhe tọn.” (Owalọ 20:28) Mọdopolọ to egbehe, mẹho agun tọn lẹ nọ yin dide sọgbe hẹ nubiọtomẹsi Owe-wiwe lẹ tọn he yin gbigbọdo gbọn gbigbọ wiwe dali. Enẹwutu, eyin mí nọ setonuna mẹho agun tọn lẹ, be mí to sisi dohia Jehovah po Jesu po niyẹn, yèdọ lẹngbọhọtọ daho hugan awe lọ lẹ. (Luku 10:16) Na nugbo tọn, enẹ wẹ yin whẹwhinwhẹ́n titengbe hugan he dona whàn mí nado nọ litaina mẹho agun tọn lẹ. Ṣigba, whẹwhinwhẹ́n devo lẹ sọ tin he wutu e do yin nuyọnẹnnu nado nọ litaina yé.
7. Nawẹ mẹho agun tọn lẹ nọ gọalọna we nado hẹn haṣinṣan dagbe de go hẹ Jehovah gbọn?
7 To whenue mẹho lẹ to anademẹ na yisenọ hatọ yetọn lẹ, yé nọ ze ayinamẹ po tulinamẹ yetọn po sinai do Owe-wiwe lẹ kavi nunọwhinnusẹ́n Owe-wiwe tọn lẹ ji. Yanwle yetọn ma yin nado dọ lehe mẹmẹsunnu yetọn lẹ dona zan gbẹzan yetọn do na yé gba. (2 Kọl. 1:24) Kakatimọ, yanwle yetọn wẹ nado na Klistiani hatọ yetọn lẹ anademẹ sinai do Owe-wiwe lẹ ji, ehe na gọalọna yé nado nọ basi nudide dagbe lẹ, podọ nado nọ yidogọna jijọho po titojininọ agun lọ tọn po. (1 Kọl. 14:33, 40) Mẹho agun tọn lẹ to ‘alindọn lẹ họ́’ to linlẹn lọ mẹ dọ yé jlo nado gọalọna hagbẹ agun lọ tọn dopodopo nado hẹn haṣinṣan dagbe de go hẹ Jehovah. Enẹwutu, yé nọ yawu gọalọna mẹmẹsunnu kavi mẹmẹyọnnu de eyin yé mọdọ nuyiwa etọn dohia dọ ewọ jlo na ṣì afọ ze kavi tlẹ ko “ṣì afọ ze.” (Gal. 6:1, 2; Juda 22) Be ehe lẹpo ma yin whẹwhinwhẹ́n dagbe lẹ nado nọ “setonuna mẹhe to anadenanu” to ṣẹnṣẹn mítọn lẹ ya?—Hia Heblu lẹ 13:17.
8. Nawẹ mẹho lẹ nọ basi hihọ́na lẹngbọpa Jiwheyẹwhe tọn gbọn?
8 Apọsteli Paulu he yin mẹho agun tọn de, kanwehlan mẹmẹsunnu etọn he tin to Kọlọsi lẹ dọmọ: “Mì nọ payi: vlavo mẹde sọgan tin he na domọwle mì taidi nuyànwẹnna etọn gbọn tamẹnuplọnmẹ po oklọ ovọ́ po dali sọgbe hẹ aṣa gbẹtọ lẹ tọn, sọgbe hẹ onú dodonu aihọn ehe tọn lẹ bọ e ma yin dehe sọgbe hẹ Klisti.” (Kọl. 2:8) Avase ehe do whẹwhinwhẹ́n dagbe devo he wutu mí dona nọ payi ayinamẹ sinai do Owe-wiwe ji he mẹho lẹ nọ na mí go hia. Yé nọ basi hihọ́na apó lọ gbọn avase nina mẹmẹsunnu yetọn lẹ sọta mẹdepope he na tẹnpọn nado dekanpona yise yetọn dali. Apọsteli Pita na avase gando “yẹwhegán lalo lẹ” po “mẹplọntọ lalo lẹ” po go, mẹhe na tẹnpọn nado nọ “dó omọ̀ na alindọn he ma lodo lẹ” nado waylando. (2 Pita 2:1, 14) To egbehe, mẹho lẹ dona nọ na avase mọnkọtọn lẹ to whenue e biọ domọ. Na yé yin mẹmẹsunnu he whèwhín lẹ wutu, yé ko tindo numimọ to gbẹ̀mẹ. Humọ, whẹpo yé nado yin dide, yé ko dohia dọ emi tindo nukunnumọjẹnumẹ he họnwun gando Owe-wiwe lẹ go bosọ pegan nado plọnmẹ nuhe sọgbe lẹ. (1 Tim. 3:2; Titu 1:9) Na yé whèwhín bo tin to jlẹkaji bosọ tindo nuyọnẹn sinai do Biblu ji wutu, yé nọ penugo nado na anademẹ yọ́n-na-yizan lẹ lẹngbọpa lọ.
LẸNGBỌHỌTỌ DAGBE LỌ NỌ NA NÚDÙDÙ LẸNGBỌ LẸ BO NỌ BASI HIHỌ́NA YÉ
9. Nawẹ Jesu nọ deanana agun Klistiani tọn bosọ nọ na ẹn núdùdù to egbehe gbọn?
9 Jehovah nọ wleawu núdùdù gbigbọmẹ tọn susugege gbọn titobasinanu etọn gblamẹ na pipli mẹmẹsunnu lẹ tọn lẹdo aihọn pé. Ayinamẹ sinai do Owe-wiwe ji susu nọ yin awuwlena do owe mítọn lẹ mẹ. Humọ, to whedelẹnu titobasinanu lọ nọ na anademẹ mẹho agun tọn lẹ tlọlọ, vlavo gbọn wekanhlanmẹ lẹ dali kavi gbọn nugopọntọ tomẹyitọ lẹ dali. Gbọnmọ dali, lẹngbọ lẹ nọ mọ anademẹ he họnwun lẹ yí.
10. Etẹwẹ yin azọngban lẹngbọhọtọ gbigbọmẹ tọn lẹ tọn gando mẹhe ko danbú sọn apó lọ mẹ lẹ go?
10 To gbigbọ-liho, mẹho lẹ tindo azọngban lọ nado basi hihọ́na hagbẹ agun lọ tọn lẹ bo nọ na yé núdùdù bosọ nọ penukundo ninọmẹ gbigbọmẹ tọn yetọn go, titengbe mẹhe ko gbọjọ lẹ kavi mẹhe jai jẹ ylando sinsinyẹn mẹ lẹ. (Hia Jakọbu 5:14, 15.) Delẹ to omẹ ehelẹ mẹ sọgan ko danbú sọn apó lọ mẹ bo masọ nọ tindo mahẹ to nuwiwa Klistiani tọn lẹ mẹ ba. To ninọmẹ mọnkọtọn mẹ, be mẹho agun tọn owanyinọ de ma na wà nuhe go e pé lẹpo nado dín lẹngbọ he bu dopodopo mọ bo dotuhomẹna yé nado lẹkọwa apó lọ, yèdọ agun lọ mẹ ya? Na nugbo tọn e na wàmọ! Jesu dọmọ: “E ma yin ojlo Otọ́ ṣie he tin to olọn mẹ tọn dọ dopo to omẹ pẹvi ehelẹ mẹ ni dọ̀n gba.”—Mat. 18:12-14.
NUKUN TẸWẸ MÍ DONA NỌ YÍ DO PỌ́N AWUGBOPO LẸNGBỌHỌTỌ PẸVI LẸ TỌN?
11. Naegbọn e sọgan vẹawuna mẹdelẹ nado hodo anademẹ mẹho lẹ tọn?
11 Lẹngbọhọtọ pipé wẹ Jehovah po Jesu po yin. Ṣigba, lẹngbọhọtọ pẹvi he yé de nado penukundo agun lọ go lẹ ma yin mẹpipe. Enẹ sọgan zọ́n bọ e na vẹawuna mẹdelẹ nado nọ hodo anademẹ mẹho lẹ tọn. Omẹ mọnkọtọn lẹ sọgan nọ dọ dọ: ‘Gbẹtọvi mapenọ lẹ wẹ yé yin taidi yẹn nkọ. Naegbọn n’dona dotoaina ayinamẹ yetọn?’ Nugbo wẹ dọ, gbẹtọvi mapenọ wẹ mẹho lẹ yin. Etomọṣo, mí dona tindo pọndohlan he sọgbe gando awugbopo po madogán yetọn lẹ po go.
12, 13. (a) Etẹwẹ mẹhe Jehovah yizan to otẹn azọngban tọn mẹ delẹ ṣiwà? (b) Naegbọn awugbopo mẹhe azọngban yin zizedo alọmẹ na delẹ tọn do yin kinkandai to Biblu mẹ?
12 Owe-wiwe lẹ dohia hezeheze dọ mẹhe Jehovah yizan to hohowhenu nado deanana omẹ etọn lẹ tindo awugbopo yetọn lẹ. Di apajlẹ, Davidi yin amisisadode taidi ahọlu po nukọntọ po to Islaeli. Etomọṣo, e jai jẹ whlepọn ayọdide tọn mẹ bosọ hùmẹ. (2 Sam. 12:7-9) Sọ lẹnnupọndo apọsteli Pita ji. Dile etlẹ yindọ azọngban pinpẹn yin zizedo alọmẹ na ẹn to agun Klistiani owhe kanweko tintan tọn mẹ, e ṣinuwa whlasusu. (Mat. 16:18, 19; Joh. 13:38; 18:27; Gal. 2:11-14) Gbọnvona Jesu, gbẹtọvi depope ma ko yin mẹpipe sọn Adam po Evi po whenu gbọ́n.
13 Naegbọn Jehovah do dike bọ awugbopo mẹhe ewọ yizan to hohowhenu lẹ tọn ni yin kinkandai to Biblu mẹ? Dopo to whẹwhinwhẹ́n lọ lẹ mẹ wẹ yindọ, Jiwheyẹwhe jlo na dohia dọ emi sọgan yí sunnu mapenọ lẹ zan nado deanana omẹ emitọn lẹ. Na nugbo tọn, omẹ mọnkọtọn lẹ wẹ ewọ nọ yizan to whepoponu. Enẹwutu, mí ma dona nọ yí mape mẹhe to anadenanu to ṣẹnṣẹn mítọn to egbehe lẹ tọn zan taidi whẹjijọ de nado nọ hlunnudọ gando yé go kavi yí nukunpẹvi do pọ́n aṣẹpipa yetọn. Jehovah nọ donukun dọ mí ni nọ na sisi mẹmẹsunnu mọnkọtọn lẹ bo nọ setonuna yé.—Hia Eksọdusi 16:2, 8.
14, 15. Etẹwẹ mí sọgan plọn sọn aliho he mẹ Jehovah nọ na anademẹ omẹ etọn lẹ to hohowhenu te mẹ?
14 Onú titengbe wẹ e yin nado nọ setonuna mẹhe to anadenanu to ṣẹnṣẹn mítọn to egbehe lẹ. Lẹnnupọndo lehe Jehovah nọ na anademẹ omẹ etọn lẹ do to ojlẹ vonọtaun lẹ mẹ to hohowhenu ji. To whenue akọta Islaeli tọn tọ́n sọn Egipti, Jiwheyẹwhe nọ na yé anademẹ lẹ gbọn Mose po Aalọn po gblamẹ. Nado lùn azọ̀nylankan aotọ lọ tọ́n, Islaelivi lẹ dona setonuna gbedide lọ nado dù núdùdù vonọtaun de bo hù lẹngbọ de bosọ mimí ohùn etọn do dòtin ohọ̀n yetọn tọn po aga ohọ̀n ohọ̀ yetọn lẹ tọn po go. Yé ma sè nudọnamẹ enẹlẹ sọn olọn mẹ tlọlọ. Kakatimọ, yé dotoaina sunnu mẹho Islaeli tọn lẹ he mọ nudọnamẹ vonọtaun lẹ yí sọn Mose dè. (Eks. 12:1-7, 21-23, 29) To ninọmẹ enẹlẹ mẹ, Mose po sunnu mẹho lẹ po wẹ hẹn nudọnamẹ Jehovah tọn wá na gbẹtọ lọ lẹ. Azọngban mọnkọtọn lẹ wẹ mẹho lẹ nọ hẹndi to egbehe.
15 E yọnbasi dọ a sọgan donù nujijọ susu devo lẹ go to Biblu mẹ, ehe whenu Jehovah na anademẹ gbẹwhlẹngán tọn gbọn gbẹtọvi kavi angẹli he yin afọzedaitọ etọn lẹ gblamẹ. To whẹho enẹ lẹpo mẹ, Jiwheyẹwhe nọ mọdọ e jẹ nado deazọ́nna mẹdevo lẹ. Afọzedaitọ lẹ nọ dọho to oyín etọn mẹ, bo nọ dọ nuhe omẹ etọn lẹ dona wà nado lùn nugbajẹmẹji de tọ́n na yé. Be e ma sọgbe hẹ lẹnpọn dagbe nado donukun dọ Jehovah sọgan wà nudopolọ to Amagẹdọni ya? Na nugbo tọn, mẹho agun tọn he tindo azọngban nado ze afọ Jehovah tọn kavi titobasinanu etọn tọn dai lẹ dona tin to aṣeji taun ma nado ṣì aṣẹpipa he yin nina yé zan pọ́n gbede.
“LẸNGBỌPA DOPO, LẸNGBỌHỌTỌ DOPO”
16. “Ohó” tẹwẹ mí dona na ayidonugo?
16 Omẹ Jehovah tọn lẹ yin “lẹngbọpa dopo” to anademẹ “lẹngbọhọtọ dopo,” yèdọ Jesu Klisti tọn glọ. (Joh. 10:16) Jesu dohia dọ emi na tin po devi emitọn lẹ po “to azán lẹpo gbè kakajẹ vivọnu titonu lọ tọn.” (Mat. 28:20) Taidi Ahọlu olọn mẹ tọn, ewọ to anadena nujijọ he na wá aimẹ whẹpo aihọn Satani tọn nido yin whẹdana lẹpo to gigọ́ mẹ. Nado sọgan gbọṣi hihọ́ glọ to kọndopọ mẹ to lẹngbọpa Jiwheyẹwhe tọn mẹ, mí dona nọ dotoaina ‘ohó de to godo mítọn,’ ehe to ali he ji mí na gbọn dohia mí. “Ohó” ehe bẹ nuhe gbigbọ wiwe Jiwheyẹwhe tọn dọ lẹ hẹn, ehe yin kinkandai to Biblu mẹ gọna nuhe Jehovah po Jesu po nọ dọ gbọn mẹhe yé de taidi lẹngbọhọtọ pẹvi lẹ dali.—Hia Isaia 30:21; Osọhia 3:22.
17, 18. (a) Owù tẹ mẹ wẹ lẹngbọpa lọ tin te, ṣigba jide etẹ tọn wẹ mí tindo? (b) Kanbiọ tẹ ji wẹ mí na dọhodo to hosọ he bọdego mẹ?
17 Biblu dọ dọ Satani to dindanpe “di kinnikinni de he to gbigbó, bo to mẹhe e na tlẹndu dín.” (1 Pita 5:8) Taidi gbekanlin nuwledutọ de, ewọ to lẹngbọpa lọ ṣọ́ bo to tenọpọn dotẹnmẹ hundote dagbe de nado jẹ mẹhe ma to aṣeji kavi mẹhe danbú lẹ ji. Whẹwhinwhẹ́n titengbe dopo niyẹn he wutu mí dona tẹdo agun lọ po Jehovah po go gligli, yèdọ “lẹngbọhọtọ po nugopọntọ alindọn [mítọn] lẹ tọn po”. (1 Pita 2:25) Osọhia 7:17 dọ gando mẹhe na lùn nukunbibia daho lọ tọ́n lẹ go dọmọ: “Lẹngbọvu lọ [Jesu] . . . na yin lẹngbọhọtọ yetọn, bo na deanana yé yì asisa osin ogbẹ̀ tọn lẹ kọ̀n. Jiwheyẹwhe nasọ súnsún dasin lẹpo sẹ̀ sọn nukun yetọn lẹ mẹ.” Todido jiawu nankọ die!
18 Todin he mí ko gbadopọnna azọngban titengbe mẹho agun tọn lẹ tọn taidi lẹngbọhọtọ pẹvi gbigbọmẹ tọn lẹ, mẹho dopodopo sọgan kanse ede dọ, Nawẹ n’sọgan hẹn diun dọ n’nọ yinuwa hẹ lẹngbọ Jesu tọn lẹ to aliho he sọgbe mẹ gbọn? Mí na dọhodo gblọndo kanbiọ ehe tọn ji to hosọ he bọdego mẹ.
[Kanbiọ hukan lẹ tọn]
Yẹdide to weda 23]
Dile lẹngbọhọtọ de nọ basi hihọ́na lẹngbọpa etọn do, mẹho lẹ nọ basi hihọ́na lẹngbọ he yin zizedo alọmẹ na yé lẹ (Pọ́n hukan 8)
[Yẹdide to weda 25]
Mẹho agun tọn lẹ nọ dovivẹnu nado basi hihọ́na whẹndo godoponọ lẹ sọn gbẹdido he na gbleawuna yé lẹ si (Pọ́n hukan 17, 18)
