Mí Sọgan Gọalọ Nado Penukundo Nuhudo Mẹdevo lẹ Tọn Go

FRANÇOIS he yin mẹho agun tọn to otò he ma hunnukun de mẹ na linlin dọmọ: “Danuwiwa gbayipe po awuyiya po to whenue mẹdelẹ jẹagọdo gbèta he yin nina to vòbibla de godo, bọ Kunnudetọ Jehovah tọn fọtọ́n susu lẹ to dandannu glọ nado họnyi bo jo owhé yetọn lẹ do. Núdùdù po amasin po hán, podọ vude he yè sọgan mọ sọ vẹahi taun. Akuẹsẹdotẹn lẹ suhọ̀n, podọ maṣinu akuẹsẹdotẹn tọn he mẹ yè nọ yí akuẹ sọn lẹ jẹvọ́ kavi doazọ́nte.”

Mẹmẹsunnu he to wekantẹn alahọ tọn mẹ lẹ ma dọngbàn nado do akuẹ po dandannu lẹ po hlan Kunnudetọ he họ̀n wá ṣí Plitẹnhọ Ahọluduta tọn voovo otò lọ tọn lẹ mẹ. Pipli awe he to nudọn lọ lẹ súali lẹ, ṣigba na yé yọnẹn dọ Kunnudetọ lẹ nọ hẹn kadaninọ yetọn go gligli wutu, yé nọ saba na ali mọto alahọ tọn lẹ.

François dọmọ: “To whenue mí to aliji jei Plitẹnhọ Ahọluduta tọn de mẹ, gufọntọ lọ lẹ jẹ osò de do agbànbẹhun mítọn ji. Amọ́, sòpẹ́n lọ lẹ gbọn ṣẹnṣẹn mítọn wayi. Whenue mí mọdọ ponọ de to wezundo ja mí dè po osò po to alọ mẹ, mí kùnhún agọ̀-agọ̀ po awuyiya po bo lilẹ́, bosọ kùnhún po wezun po lẹkọyi alahọ mẹ. Mí dopẹna Jehovah dọ mí gán sọn ninọmẹ lọ mẹ. To wunkẹngbe, mẹmẹsunnu 130 he to Plitẹnhọ Ahọluduta tọn enẹ mẹ lẹ mọ fibẹtado de. Mẹmẹsunnu devo lẹ wá wekantẹn alahọ tọn mẹ bọ mí penukundo nuhudo yetọn lẹ go to gbigbọ-liho podọ to agbasa-liho kakajẹ whenue hunyanhunyan lọ doalọte.”

François dọmọ: “To godo mẹ, mẹmẹsunnu otò lọ mẹ tọn lẹ kàn wekanhlanmẹ susu hlan wekantẹn alahọ tọn nado do pinpẹn-nutọn-yinyọnẹn sisosiso yetọn hia. Lehe mẹmẹsunnu yetọn he to fidevo lẹ nọgodona yé do yidogọna jidide yetọn to Jehovah mẹ.”

To nugbajẹmẹji jọwamọ tọn po dehe gbẹtọvi lọsu nọ hẹnwa lẹ po whenu, mí ma nọ dọna yisenọ hatọ mítọn he to nuhudo mẹ lẹ dọ “agbasa towe ni hùnmiyọ́n na a ni dùnú gọ́ho” gba. (Jak. 2:15, 16) Kakatimọ, mí nọ tẹnpọn nado hẹn pekọ wá na nuhudo agbasa tọn yetọn lẹ. To whenue avase yin nina to owhe kanweko tintan whenu dọ huvẹ sinsinyẹn de na wá aimẹ, “devi lẹ magbe, yèdọ dopodopo yetọn sọgbe hẹ nuhe go yé pé, nado do alọgọ kọgbọ tọn hlan mẹmẹsunnu he nọ nọ̀ Jude lẹ.”—Owalọ 11:28-30.

Taidi sinsẹ̀n-basitọ Jehovah tọn lẹ, mí nọ desọn ojlo mẹ nado gọalọna mẹhe tin to nuhudo mẹ to agbasa-liho lẹ. Ṣigba, gbẹtọ lẹ tindo nuhudo gbigbọmẹ tọn ga. (Mat. 5:3) Na Jesu jlo dọ yé ni yọnẹn dọ yé tindo nuhudo enẹ bo ze afọdide lẹ nado hẹn pekọ wá na ẹn wutu, e deazọ́nna hodotọ etọn lẹ nado hẹn gbẹtọ lẹ zun devi. (Mat. 28:19, 20) Dopodopo mítọn wẹ nọ yí susu to whenu, huhlọn, po nutindo etọn po mẹ zan nado hẹn azọ́ndenamẹ enẹ di. Taidi titobasinanu de, mí nọ yí apadewhe akuẹ he yin yíyí do basi nunina lẹ tọn zan nado gọalọ to nugbajẹmẹji lẹ whenu, ṣigba suhugan nunina lọ lẹ tọn wẹ nọ yin yiyizan na nukọnyiyi Ahọluduta lọ tọn podọ nado hẹn wẹndagbe lọ gbayipe. Gbọnmọ dali, mí nọ do owanyi mítọn hia Jiwheyẹwhe po kọmẹnu mítọn lẹ po.—Mat. 22:37-39.

Mẹhe nọ nọgodona azọ́n lẹdo aihọn pé Kunnudetọ Jehovah tọn lẹ tọn lẹ sọgan deji dọ nunina yetọn nọ yin yiyizan to aliho he sọgbe bosọ yọ́n hugan mẹ. Be a sọgan gọalọna mẹmẹsunnu towe he to nuhudo mẹ lẹ ya? Be a jlo na nọgodona azọ́n mẹhẹnzun devi tọn lọ ya? Eyin mọ wẹ, “a dọ̀n alọ dagbe tọn do godo sọn yé he a duahọ etọn do blo, whenuena e tin to huhlọn alọ towe tọn mẹ nado basi i.”—Howh. 3:27.

 [Apotin to weda 9]

ALIHO HE MẸ MẸDELẸ NỌ BASI NUNINA NA AZỌ́N LẸDO AIHỌN PÉ TỌN LỌ TE

Dile e yin do to azán apọsteli Paulu tọn gbè, to egbehe mẹsusu “nọ de nude dovo,” kavi de akuẹ sọha de dovo bo nọ yí i do apotin nunina agun tọn he go yè kàn “Azọ́n Lẹdo Aihọn Pé Tọn” do lẹ mẹ. (1 Kọl. 16:2) To osun dopodopo mẹ, agun lẹ nọ do nunina enẹlẹ hlan wekantẹn Kunnudetọ Jehovah tọn lẹ tọn he nọ penukundo otò yetọn go. Hiẹ sọgan sọ do nunina lẹ hlan nuyizan sọgbe hẹ osẹ́n he Kunnudetọ Jehovah tọn lẹ nọ yizan to otò towe mẹ tlọlọ. Nado yọ́n yinkọ nuyizan sọgbe hẹ osẹ́n he Kunnudetọ Jehovah tọn lẹ nọ yizan hugan to otò towe mẹ tọn, jaale bo dọnsẹpọ wekantẹn alahọ tọn he nọ penukundo otò towe go. Adlẹsi wekantẹn alahọ otò towe tọn sọgan yin mimọ to nọtẹn Intẹnẹt tọn www.jw.org ji. Nunina wunmẹ he hiẹ sọgan dohlan tlọlọ lẹ die:

NUNINA TLỌLỌ LẸ

• Akuẹ, aṣọ́donu akuẹgegenu tọn lẹ kavi nutindo họakuẹ mẹdetiti tọn devo lẹ sọgan yin nina.

• Wekanhlanmẹ kleun de dona hodo nado dohia dọ akuẹ kavi núzinzan lọ lẹ yin nina.

TITO NUNINA HE SỌGAN YIN GIGỌYÍ TỌN

• Akuẹ sọgan yin nina po yanwle lọ po dọ nunamẹtọ lọ sọgan gọ̀ ẹ yí eyin e tindo nuhudo etọn.

• Wekanhlanmẹ kleun de dona hodo nado dohia dọ nunina lọ sọgan yin gigọyí.

TITO NUNINA SỌN OJLO MẸ WÁ TỌN

Gbọnvona akuẹ po nutindo họakuẹ mẹdetiti tọn lẹ po nina, aliho devo lẹ tin ga nado nọgodona azọ́n Ahọluduta lọ tọn lẹdo aihọn pé. Aliho enẹlẹ yin sislẹ bọdego. Mahopọnna aliho nunina tọn he hiẹ jlo na yizan, jaale bo dọnsẹpọ wekantẹn alahọ tọn he nọ penukundo otò towe go whẹ́ nado yọ́n aliho nunina tọn he sọgan yin yiyizan to otò lọ mẹ lẹ. Na nubiọtomẹsi osẹ́n tọn lẹ po osẹ́n takuẹ tọn lẹ po nọ gbọnvo wutu, nujọnu wẹ e yin nado biọ alọgọ whẹpo do de aliho he yọ́n hugan nado basi nunina.

Alọgọ Owù-Nujijọ Tọn: Nunina alọgọ owù-nujijọ gbẹzan tọn kavi nunina tito gbọjẹ gaa/agbasazọ́n jijodo tọn de sọgan yin didohlan ARTJB.

Akuẹ He Tin to Akuẹsẹdotẹn Lẹ: Akuẹ he tin to akuẹsẹdotẹn lẹ, akuẹ he yin bibẹdo akuẹsẹdotẹn lẹ na ojlẹ tangan de (dépôt à terme), kavi akuẹ gbọjẹ gaa mẹdopodopo tọn lẹ sọgan yin zizedo alọ ARTJB tọn mẹ nado nọ yizan kavi mẹde sọgan basi tito dọ to okú emitọn godo, akuẹ lọ ni yin súsú na ARTJB, to kọndopọ mẹ hẹ nubiọtomẹsi akuẹsẹdotẹn lọ tọn lẹ.

Ale Ajọ́ Tọn Lẹ: Ale ajọ́ tọn lẹ sọgan yin nina taidi nunina tlọlọ de kavi yin didohlan ARTJB.

Ohọ̀ po Aigba Po: Ohọ̀ po aigba po he sọgan yin sisà sọgan yin nina ARTJB vlavo gbọn nunina tlọlọ de bibasi dali kavi na nuhe dù aigba he ji ohọ̀ tin te bọ gbẹtọ gbẹ́ tin to e mẹ, nunamẹtọ lọ sọgan yí i do basi nunina ṣigba e dona dohia dọ emi na gbẹ́ nọ nọ̀ e mẹ dile e na dẹnsọ bọ emi tin to ogbẹ̀.

Kandai Gúmima po Nunina lẹ Tọn Po: Nutindo kavi akuẹ sọgan yin nina taidi ogú hlan ARTJB gbọn kandai sọgbe hẹ osẹ́n de bibasi dali, kavi yinkọ ARTJB tọn sọgan yin kinkandai taidi mẹhe na dugu nunina lẹ tọn.

Dile hogbe lọ “tito nunina sọn ojlo mẹ wá tọn” dohia do, nunina ehelẹ nọ biọ dọ nunamẹtọ lọ ni basi tito delẹ.

Na nudọnamẹ dogọ, hiẹ sọgan dọnsẹpọ wekantẹn alahọ Kunnudetọ Jehovah tọn lẹ tọn to Bénin, vlavo gbọn wekanhlanmẹ kavi alokan dali, to adlẹsi he yin sislẹ to odò yiyizan mẹ kavi hiẹ sọgan dọnsẹpọ wekantẹn alahọ Kunnudetọ Jehovah tọn lẹ tọn he nọ penukundo otò towe go.

WEKANTẸN ALAHỌ KUNNUDETỌ JEHOVAH TỌN LẸ TỌN TO BÉNIN

Association Religieuse Les Témoins de Jéhovah du Bénin

ARTJB, BP 312, AB-Calavi, Bénin

Alokan: (229) 97 97 00 60