BE A nọ pọ́n dewe hlan di Klistiani ya? Eyin mọwẹ, be hiẹ yin dopo to gbẹtọ liva awe linlán he to aigba ji lẹ mẹ—diblayin omẹ 1 to 3 ji—he nọ sọalọakọ́n dọ yé yin hodotọ Klisti tọn lẹ. To egbehe, pipli fọtọ́n susu lẹ wẹ nọ ylọ yede dọ Klistiani lẹ, ṣigba sinsẹ̀n-nuplọnmẹ po nuyise voovo lẹ po wẹ yé tindo. Enẹwutu, nuyise towe lẹ sọgan gbọnvo taun na mẹdevo he nọ ylọ yede dọ Klistiani lẹ tọn. Be nujọnu wẹ e yin nado gbeje nuhe a yise lẹ pọ́n nugbo ya? Gbau—eyin a jlo na yin Klistiani nugbo sọgbe hẹ nuhe Biblu plọnmẹ.

Hodotọ dowhenu tọn Jesu Klisti tọn lẹ yin yinyọnẹn taidi “Klistiani lẹ.” (Owalọ lẹ 11:26) E masọ biọ dọ yè ni yí yinkọ devo do yọ́n yé to whenuena e yindọ yise Klistiani tọn dopo wẹ tin. Klistiani lẹ nọ hodo nuplọnmẹ po anademẹ Dowatọ sinsẹ̀n Klistiani tọn, yèdọ Jesu Klisti tọn lẹ po to pọmẹ. Etẹwẹ gando ṣọṣi towe go? Be e nọ plọnmẹ nuhe Klisti plọnmẹ lẹ po nuhe hodotọ dowhenu tọn Klisti tọn lẹ yise po ya? Nawẹ a sọgan yọ́n enẹ nugbonugbo gbọn? Aliho dopo gee wẹ tin—enẹ wẹ nado yí Biblu zan taidi nujlẹgàn de.

 Lẹnnupọndo ehe ji: Jesu Klisti tindo sisi sisosiso na Owe-wiwe lẹ taidi Ohó Jiwheyẹwhe tọn. E ma nọ kẹalọyi mẹhe nọ dovọ́na nuplọnmẹ Biblu tọn bo nọ ze nuplọnmẹ gbẹtọ tọn do otẹn tintan mẹ lẹ. (Malku 7:9-13) Gbọnmọ dali, mí sọgan wá tadona lọ kọ̀n dọ hodotọ nugbo Jesu tọn lẹ dona ze nuyise yetọn lẹ sinai do Biblu ji. Enẹwutu, Klistiani dopodopo na wà dagbe nado nọ kanse ede dọ, ‘Be nuyise ṣọṣi ṣie tọn lẹ sọgbe hẹ nuhe Biblu plọnmẹ ya?’ Nado mọ gblọndo na kanbiọ enẹ, e na yọ́n dọ a ni yí nuplọnmẹ ṣọṣi towe tọn lẹ jlẹdo nuhe Biblu plọnmẹ taun lẹ go.   

Jesu dọ dọ sinsẹ̀n-bibasi mítọn hlan Jiwheyẹwhe dona sinai do nugbo ji, podọ Biblu mẹ wẹ nugbo enẹ nọ yin mimọ te. (Johanu 4:24; 17:17) Apọsteli Paulu sọ dọ dọ eyin mí jlo na yin whinwhlẹngán, mí dona wá “oyọnẹn he pegan nugbo tọn kọ̀n” whẹ́. (1 Timoti 2:4) Enẹwutu, nujọnu wẹ e yindọ nuyise mítọn lẹ ni sinai do nugbo he pegan Biblu tọn ji. Na nugbo tọn, whẹho okú po ogbẹ̀ po tọn de wẹ!

Mí to tulina we nado hia kanbiọ voovo ṣidopo he zọnpọ hẹ hosọ ehe lẹ, bo lẹnnupọndo gblọndo he Biblu na lẹ ji. Hia wefọ Biblu tọn he yin sislẹ lẹ, bo pọ́n gblọndo lọ lẹ. Enẹgodo, kanse dewe dọ, ‘Be nuplọnmẹ ṣọṣi ṣie tọn lẹ sọgbe hẹ nuhe Biblu dọ tofi lẹ ya?’

Kanbiọ mẹhẹnlẹnnupọn tọn ehelẹ na gọalọna we nado basi nuyijlẹdonugo dagbe hugan lọ. Be e jlo we nado yí nuplọnmẹ ṣọṣi towe tọn devo lẹ jlẹdo nuhe Biblu plọnmẹ go ya? Homẹ Kunnudetọ Jehovah tọn lẹ tọn na hùn nado gọalọna we nado mọnukunnujẹ nugbo Biblu tọn mẹ to gigọ́ mẹ. E na yọ́n dọ a ni biọ to Kunnudetọ de si nado plọn Biblu hẹ we vọnu. Kavi a sọgan dla nọtẹn Intẹnẹt tọn mítọn jw.org pọ́n.