Año ñavo, oime jeta ɨvɨkana reta. Jeta michi vae jare ïru reta jae ko tuichagüe, jare güeru jeta tembiporara, oyuka jeta kia reta jare omokañɨ opaete mbaembae. Ámope kuae ɨvɨkana reta oyapo tsunamis, opaetei oitɨ tëta guasu reta ɨguasu jembeɨ pe oï vae jare jeta kia reta omano. ¿Omombeu pa Biblia kuae ɨvɨkana reta re?

Kuae yemboe pe yayemboeta:

•  ¿Omombeu pa Biblia kuae ɨvɨkana reta re?

•  ¿Oyembopo pa amogüe profecía reta Biblia omombeu vae ɨvɨkana reta re añave rupi?

•  ¿Mbae pa oipota jei yandeveguarä jókuae profecía reta?

•  Amogüe reta oyemongeta vae profecía reta Biblia re jare ɨvɨkana reta

 ¿Omombeu pa Biblia kuae ɨvɨkana reta re?

 Jesús omombeu ɨvɨkana reta re metei profecía Biblia pe oï vae. Yamongetata kuae, mboapɨ tembikuatía pe:

 “Echa opüata oyoe tëta guasu ïru tëta guasu ndive jare mborookuaía ïru mborookuaía ndive, jare oimeta mbaerasɨ ovakatu vae, karuai reta jare ɨvɨkana oipota rupi” (Mateo 24:7).

 “Echa opüata oyoe tëta guasu ïru tëta guasu ndive jare mborookuaía ïru mborookuaía ndive, jare oimeta ɨvɨkana jeta kerupi. Jare oimeta karuai reta” (Marcos 13:8).

 “Oimeta ɨvɨkana tuichagüe. Oimeta karuai reta jare mbaerasɨ reta oipota rupi” (Lucas 21:11).

 Jesús omombeu “oimeta ɨvɨkana tuichagüe” jeta kerupi, jare jaenunga vi ñeraro reta, karuai reta jare mbaerasɨ ovakatu vae. Kuae oechauka yande yaiko “ara taɨkuegua reta pe”, ani “kañɨtei” (Mateo 24:3; 2 Timoteo 3:1). Yaipapa yave tiempo Biblia jei rami, yaikuaa “ara taɨkuegua reta” omboɨpɨ año 1914 pe jare mbaetɨ vɨteri opa.

 ¿Oyembopo pa amogüe profecía reta Biblia omombeu vae ɨvɨkana reta re añave rupi?

 Añete ko. Profecía Jesús jei vae, imiari vi ɨvɨkana reta re, oyembopo ma oï añave rupi. Año 1914 güive, oime ko má 1.950 ɨvɨkana reta jare oporoyuka má 2 millones kia reta. a Yaecha amogüe ejemplo reta ɨvɨkana reta oime kuae 20 año oasa ma vae re.

 Océano Índico (2004). Metei ɨvɨkana 9,1 grados güɨnoi vae oyeapo metei tsunami jare ojo tëta guasu reta kotɨ mombɨrɨ katu, jare oporoyuka 225.000 seri kia reta.

 China (2008). Metei ɨvɨkana 7,9 grados güɨnoi vae omokañɨ tëta jare tëta guasu reta. Juvicha reta oyemongeta güɨramoi 90.000 kia reta omano, 375.000 ombopere vae reta jare millones kia reta omokañɨ jëta.

 Haití (2010). Metei ɨvɨkana 7 grados güɨnoi vae jare jaɨkue rupi ɨvɨkana michi mi vae, oyuka má 300.000 kia reta jare má 1 millón kia reta omokañɨ jëta.

 Japón (2011). Metei ɨvɨkana 9 grados güɨnoi vae jare jeta tsunami reta oyuka 18.500 seri kia reta, jare miles kia reta oeya jëta. Central nuclear Fukushima pegua oikomegua jare ou mbaesusere. 10 años jaɨkue rupi, 40.000 seri kia reta ipuereä ou jëta pe, guasu radiación oime joko pe ramo.

 ¿Mbae pa oipota jei yandeveguarä jókuae profecía reta?

 Biblia pe jei vae ɨvɨkana reta re omombeu vae oasata kuri. Jesús jei: “Jaeramiño vi pe reta peecha yave kuae mbaembae oasa yave, peikuaata köiño ma ko ou Tumpa iporookuaía” (Lucas 21:31).

 Biblia omombeu Tumpa iReino ani iporookuaía jae ko metei gobierno añete vae ara pe oï vae, jare Jesucristo jae ko Juvicha guasu. Jesús omboe jemimboe reta pe oyerure Tumpa iReino re (Mateo 6:10).

 Tumpa iReino omogobernata yave ɨvɨ re, Tumpa ngaraa omaeño kia reta oiporara ɨvɨkana reta ani ïru mbaesusere (Isaías 32:18). Jaenunga vi, metei ave oiporara ombopere vae jare oiporara emocionalmente ɨvɨkana reta jeko pegua (Isaías 65:17; Apocalipsis 21:3, 4). Reipota má reikuaa yave, emongeta “¿Qué cosas logrará el Reino de Dios?”.