Yemboe 5
¿Mbaepa oipota Tumpa ɨvɨpe guarä?
1. ¿Maerapa Tumpa oyapo ɨvɨ?
Jehová oyapo ɨvɨ kuimbae jare kuña reta oiko vaerä pɨpe. Mbaetɨ oyapo yandeɨpɨ reta Adán jare Eva oiko vaerä arape, jókuaerä oyapoma ángel reta (Job 38:4, 7). Jehová oñono kuimbae tenondegua vae paraísope, koraɨ Edén jee vae (Génesis 2:15-17). Jehová oipotatëi Adán taɨ jare tayɨ reta oiko avei yerovia reve kuae ɨvɨpe. Emongeta Salmo 37:29 jare 115:16.
Ërei, mbaetɨ opaete ɨvɨ koraɨ Edén rami. Jaeramo, Adán jare Eva oimetatëiko jeta taɨ jare tayɨ reta omotɨnɨe vaerä ɨvɨ jare ombotuicha vaerä jókuae paraíso mbegüe mbegüepe (Génesis 1:28). Ɨvɨ oyeapo tëtara reta oiko avei vaerä pɨpe, ngaraa okañɨ. Emongeta Salmo 104:5.
Emae video ¿Maerapa Tumpa oyapo ɨvɨ?
2. ¿Maerapa ɨvɨ mbaetɨma paraíso?
Adán jare Eva oenduä Tumpape ramo, jae omombo koraɨ Edéngüi. Jayave, jókuae paraíso mbaetɨma oime jare meteiave ipuere oyapoye. Tumpa Iñee jei: “Ɨvɨ oñemee iyoa vae reta ipo pe” (Job 9:24). Emongeta Génesis 3:23, 24.
¿Oeyamapa Jehová kuae oipotatëi vae ɨvɨ peguarä? ¡Mbaetɨ! Jaeko Imbaepuere yae vae, oyapo avei jei vae rami (Isaías 45:18). Ɨmaäma, yaikota Jehová oipotatëi rami iyɨpɨpe. Emongeta Salmo 37:11, 34.
3. ¿Këraitapa oyeapoye ɨvɨ paraíso?
Ɨvɨ oyeapoyeta paraíso Jesús güɨroata ɨvɨ Mburuvicha Guasu rami yave. Jesús ombotenondeta ángel reta opa omokañɨ vaerä Tumpa tovaicho reta ñeraro Armagedón jee vaepe. Jaɨkue rupi, oipɨɨta Satanás mil año pegua. Jesús oyangarekota oyeapɨsaka vae retare agüɨye vaerä omano Tumpa iara ou yave. Jae reta yogüɨreko aveita yerovia reve paraíso ɨvɨpe. Emongeta Apocalipsis 20:1-3 jare 21:3, 4.
4. ¿Kërai yavepa opata mbaeporara?
¿Kërai yavepa omboaita Tumpa opaete ikavimbae vae? Jesús jei mbaepa oasata köiño yave jókuae ara. Jeiete ikavimbae oyeapo vae ara ñavo yandembokɨɨye. Kuae oechauka ara taɨkuegua retapema ñaï. Emongeta Mateo 24:3, 7-14, 21, 22.
Jesús güɨroatata ɨvɨ mil año pegua ɨvate güive. Jayave omboaita opaete yaiporara vae (Isaías 9:6, 7; 11:9). Jesús omboaitavi mbaeyoa oaɨu Tumpa vae retagüi. Körai, Taɨ rupi, Jehová omboaita mbaerasɨ, ndechi jare mano. Emongeta Isaías 25:8 jare 35:5, 6.
5. ¿Kia retapa yogüɨrekota Paraísope?
Testigo de Jehová yemboatɨape reikuaata jeta oaɨu vae Tumpa jare oipota oyapo jae jei vae
Oyapo vae yandeRu jei vae reta yogüɨrekota Paraísope (1 Juan 2:17). Jesús oyókuai jemimboe retape oeka vaerä ipɨakavi vae jare omboe vaerä kërai ipuere oï kavi Tumpa jovai. Añave, Jehová omborɨ oï jeta yae vaepe ipuere vaerä yogüɨreko paraísope (Sofonías 2:3). Jeta tëtara oyemboatɨ testigo de Jehová reta ndive omboete vaerä Tumpa. Jokope oyemboe ñee ikavi vaere jare oecha kërai Biblia ipuere omborɨ chupe reta. Emongeta Miqueas 4:1-4.
