Wo de Salomo de König vo Israel wird, fragt ihn Jehova: «Was wünschisch du dir? Was söll ich dir gee?» De Salomo seit: «Ich bin jung und ha no kei Erfahrig. Drum gib mir bitte Wiisheit, dass ich guet zu dim Volk cha luege.» Da seit Jehova: «Wil du dir Wiisheit gwünscht hesch, mach ich dich zum gschiidschte Maa uf de ganze Welt. Ich mach au, dass du sehr riich wirsch. Und wenn du uf mich losisch und mir tuesch folge, schenk ich dir es langs Lebe.»

De Salomo fangt a de Tempel z baue. Für das brucht er di wertvollschte Stei und s beschte Holz, Silber und Gold. Mehreri tuusig Männer und Fraue helfed bim Baue vom Tempel mit. Nach sibe Jahr isch de Tempel fertig baue und cha Jehova übergee werde. Uf em Altar liged Opfergabe parat. De Salomo gaht vor em Altar uf d Chnüü und fangt a bete: «O Jehova, dee Tempel isch nid gross gnueg und nid schön gnueg für dich, aber bitte nimm üsi Abetig gliich a und los doch bitte uf üsi Gebet.» Wie gfallt echt Jehova de Tempel und s Gebet vom Salomo? Er isch sehr zfride. Wil, chuum het de Salomo fertig betet, chunnt es Füür vom Himmel abe und verbrennt d Opfer uf em Altar. Wo d Israelite das gsehnd, freued si sich sehr.

De König Salomo isch i ganz Israel und au i Länder, wo wiit weg sind, bekannt für sini Wiisheit. Vil Lüt chömmed mit ihrne Problem zum Salomo und fraged ihn, was si sölled mache. Sogar d Königin vo Scheba chunnt und teschtet ihn mit komplizierte Frage. Wo si denn sini Antworte ghört, seit si: «Ich ha de andere nid glaubt, was si über dich verzellt hend. Aber jetzt merk ich selber, dass du ja no vil gschiider bisch als si gseit hend. Din Gott, Jehova, het dich würklich gsegnet.» De Mensche z Israel gahts sehr guet und si sind glücklich. Aber das änderet sich scho glii.