Öppe zwei Mönet nachdem d Israelite us Ägypte use sind, chömmeds zum Berg Sinai und baued dört ihres Lager uf. Jehova bittet de Moses, uf de Berg ufe z laufe und seit ihm dört: «Ich ha d Israelite grettet. Wenn si uf mich losed und sich a mini Gsetz halted, denn werded si zu mim bsundrige Volk.» De Moses gaht de Israelite go verzelle, was Jehova gseit het. Weisch du, wie si reagiered? Si säged em Moses: «Mir wend alles mache, wo Jehova seit.»

De Moses gaht wider uf de Berg ufe und dört seit Jehova zu ihm: «Übermorn wird ich wider mit dir rede. Säg em Volk, dass si uf kei Fall sölled probiere, uf de Berg Sinai ufe z cho.» De Moses gaht zu de Israelite abe und seit ihne, si sölled sich parat mache, zum Jehova zuezlose.

Am dritte Tag gsehnd d Israelite e dunkli Wolke über em Berg. Es blitzt fescht und donneret luut und si ghöred de Ton vomene Horn. Nachher chunnt Jehova imene Füür uf de Berg abe. D Israelite zittered vor Angscht. De ganz Berg bewegt sich und überall hets Rauch. S Töne vom Horn wird au immer lüüter. Da seit Gott: «Ich bin Jehova. Ihr dörfed nid andere Götter diene.»

Jetzt gaht de Moses wider uf de Berg und Jehova git ihm dört d Gsetz für d Israelite. Di Gsetz zeiged de Israelite, wie si Jehova sölled diene und wie si sich sölled verhalte. De Moses schribt di Gsetz uf und list si de Israelite vor. Uf das abe verspreched si: «Alles, wo Jehova seit, wend mir mache.» Eso gebed d Israelite Gott es Verspreche. Aber halted si sich echt dra?