De Josua füehrt s Volk vo Jehova vil Jahr lang. Wo er 110 Jahr alt isch, stirbt er. Solang de Josua glebt het, hend d Israelite Jehova gfolget. Aber nach sim Tod fanged d Israelite a, Götze azbete, eso wies d Kanaaniter mached. D Israelite losed nüm uf Jehova. Drum laat er zue, dass de König vo Kanaan, de Jabin, si plaget. Si bettled bi Jehova, dass er ihne hilft. Denn git Jehova ihne en neue Afüehrer. Er söll de Israelite helfe, wider uf Jehova z lose. Er heisst Barak.

D Prophetin Debora laat de Barak zu sich cho. Si het e Nachricht vo Jehova für ihn: «Nimm 10 000 Männer mit dir mit. D Armee vom Jabin wird am Bach Kischon si. Dört wirsch du de Sisera, de Afüehrer vo de Armee, besiige.» De Barak seit zu de Debora: «Ich gang nume, wenn du mitchunnsch.» Da seit si: «Ich chumme mit. Aber nid du wirsch de Sisera töte. Jehova het gseit, dass e Frau ihn wird töte.»

D Debora gaht mit em Barak und sinere Armee uf de Berg Tabor. Dört mached si sich für de Kampf parat. Wo de Sisera das ghört, versammlet er sini Truppe und Chriegswäge unde im Tal. D Debora seit em Barak: «Hüt isch de Tag, wo Jehova dir de Siig wird gee.» De Barak und sini 10 000 Männer stürmed de Berg abe, genau uf di starchi Armee vom Sisera zue.

Denn macht Jehova, dass de Bach Kischon alles überfluetet. D Chriegswäge bliibed im Schlamm stecke. De Barak und sini Soldate gwünned gege d Armee vom Sisera. Aber de Sisera gumpet vo sim Wage abe und cha devorenne. Er versteckt sich im Zelt vonere Frau, wo Jael heisst. Si git ihm Milch zum Trinke und deckt ihn zue. De müed Chrieger schlaft ii. Si schliicht denn liislig zu ihm here und schlaat ihm en Zeltpflock dur de Chopf. Eso stirbt de Sisera.

Uf de Suechi nach em Sisera chunnt de Barak i d Nöchi vom Zelt vo de Jael. Si chunnt use, lauft ihm entgege und seit: «Da, chumm, ich zeig dir de Maa, wo du suechsch.» De Barak gaht is Zelt ine und gseht de Sisera tot uf em Bode lige. A dem Tag singed de Barak und d Debora es Loblied für Jehova, wil er de Israelite ghulfe het, gege ihri Feinde z gwünne. Ab jetzt het Israel 40 Jahr lang Fride.