KOSLEA vixim tem sot? Aiz poriant munxeanim vincharlolea chodd mhotvachea prosnam vixim. Ghoddie tumi sokol dileat toslea prosnam vixim ojap zaleat astole:

• Khorench Dev amchi kallji gheta?

• Zhuzam ani dukh hancho kednam-i tori xevott zatolo?

• Morta tednam amkam kitem ghoddta?

• Meloleank lagon kitem-i tori axa asa?

• Dev aikota toslem magnnem hanv koxem korunk xoktam?

• Koxeporim hanv jivitant khuxal zaunk xokta?

Hea prosnanche zobab tumi khoim sodtole? Gronthaloiant vo pustokanchea dukanar tumi gelim zalear tumkam hozaranim pustokam mellttat jim hea prosnanche zobab dita mhunn sangtat. Torui, sogllea pustokanim ek-sarkech zobab asona. Tantuntle thodde tea ghoddiek boreak poddtat, punn veginch tanchi mahiti pornni zata ani magir tantunt sudharpam zatat vo tancho zago dusrim pustokam ghetat.

Punn, ek pustok asa zantunt visvas dovorpa sarkim utram asat. Tantunt koslich chukichi mahiti nam. Jezu Kristan Devak kelolea magnneant mhunnttlem, “Tujem utor sot.” (Juanv 17:17) Ani aiz ami zannant, tem utor mhunnche Povitr Pustok. Povitr Pustokantlean, voilea prosnanche sarke ani khatreche zobab tumkam fattlea panar mellttole.

HO PROSN UBO ZAUNK KARONN: Karonn ami nixtturponn ani on’nea-an bhorlolea sonvsarant jietat. Zaito lok manta ki ami dukh bhogtat tem Devachea khoxe pormonnem.

POVITR PUSTOK KITEM XIKOITA: Dev kednanch vaitt vostu ghoddoun haddinam. Job 34:10 oxem mhunntta: “Devachean kednanch vaitt korunk zaina Sorvbollixtt kednanch on’neai adarunk xokona!” Munxeank lagon Devacho ek mogall ud’dhex asa. Dekhunuch Jezun amkam hea bhaxen magnnem korunk xikoilem: “Amchea Bapa sorginchea . . . Tujem Raj [amkam] ieum, Tuji khuxi sorgar zata toxi sonvsarant zaum.” (Matev 6:9, 10) Devak amchi khub kallji asa dekhunuch tannem ho mogall ud’dhex purnn korchea pasot tachea mogall putak hea sonvsarant dhaddun dilo.—Juanv 3:16.

Utpoti 1:26-28; Jakob 1:13 ani 1 Pedru 5:6, 7 hem-ui polloiat.

HO PROSN UBO ZAUNK KARONN: Sangonk zainam titlea lokancho jiv zhuz gheta. Sonvsarant amkam soglleank dukh-tras sonsche poddtat.

POVITR PUSTOK KITEM XIKOITA: Hea prithumer xanti haddtolo mhunn Devan bhasaunni kelea. Devachem Raj ek sorginchem sorkar, hachea khala lok ‘zhuzachi toiari korche na.’ Bodlek, te ‘apleo torvari moddun nangor kortole.’ (Izaias 2:4) Dev soglle on’neai ani ot’teachar, hancho xevott kortolo. Povitr Pustok oxem bhasaunni dita ki, “tanchea dolleantlim sogllim dukam To (Dev) pusun kaddtolo, moronn anink aschem na, dukh anink korchim nant, rudon somptolem, koxtt-ui anink asche nant. Adlem sogott (aiche on’neai ani vollvollea sangata) soron gelem.”—Prokasovnni 21:3, 4.

Stotr 37:10, 11; 46:9 ani Mika 4:1-4 hem-ui polloiat.

HO PROSN UBO ZAUNK KARONN: Sonvsarantle choddxe dhorm xikoitat ki ekleachea kuddi bhitor kitem tori mornna uprant jivem urta mhunn. Thodde, melolo lok jiveank tras korunk xoktat oxem mantat. Anik thodde, Dev khottea lokank ifernant sasnnache vollvolle favo korun khast laitolo mhunn chintat.

POVITR PUSTOK KITEM XIKOITA: Melea uprant munxeachi jinn sompta. “Meloleank koslich khobor asona” mhunn Upodexok 9:5 sangta. Melole kitench zannam zaunk xokonam, tankam bhavna asona vo kosloch onnbhov asona. Takach lagon tanchean dusreank tras diunk zaina vo jiveank modot korunk zaina.—Stotr 146:3, 4.

Utpoti 3:19 ani Upodexok 9:6, 10 hem-ui polloiat.

HO PROSN UBO ZAUNK KARONN: Amkam jieunchi axa asa ani amchea mogachea lokam sangata khuxalkaien ravunk axetat. Taka lagon, moron gel’lea amchea mogachea lokank ami anink ek pavtt pollounk axetat.

POVITR PUSTOK KITEM XIKOITA: Moron gel’le lok portean jivont zatole. “Somadhimnim asat tim sogllim . . . bhair sortolim” mhunn Jezun bhasailam. (Juanv 5:28, 29) Devachea mull ud’dhexa pormonnem, portun jivont zalolea munxeank, sobit bag zalolea prithumer jieonk sondhi melltoli. (Izaias 65:21-25) Tedna, khaltikaiechea munxeank bori bholaiki ani sasnnachem jivit melltolem. Povitr Pustok sangta, “Des zatolo borea monxanchem daiz: thoim tim tthikann kortolim sasnnachea sasnnak!”—Stotr 37:29.

Job 14:14, 15; Lukas 7:11-17; Itihas 24:15 hem-ui polloiat.

HO PROSN UBO ZAUNK KARONN: Sogllea dhormanche lok magnnem kortat. Torui astana zaitea zannank tanchea magnneache zobab mellona oxem dista.

POVITR PUSTOK KITEM XIKOITA: Amchea magnneant porot-porot tinch utram mhunnop soddunk zai mhunn Jezun sanglem. Tannem mhunnttlem, “Magnnem kortana sanglolench porot-porot sango nakat.” (Matev 6:7, New World Translation) Amchim magnnim Devan aikonk zai zalear, taka manta tea ritin ami magnnem korunk zai. Toxem kortole zalear ami Devachi khoxi kitem asa ti zannam zaun, teach pormonnem magnnem korchi goroz asa. Poilo Juanv 5:14 oxem somzaita, “Kitem-i ami Devache khuxe pormannem Tache lagim magum, To amkam aikota.”

Stotr 65:2; Juanv 14:6, 14 ani 1 Juanv 3:22 hem-ui polloiat.

HO PROSN UBO ZAUNK KARONN: Poiso, vhodd nanv vo sobitkai khuxalkai haddta mhunn zaite zann patietat. Dekhunuch te oslea vostunchea fattim lagtat. Punn hea vostumni tankam khori khuxalkai mellona.

POVITR PUSTOK KITEM XIKOITA: Khuxalkai koxi melloun gheunchi tem sangtana Jezun mhunnttlem, “Devachem utor aikotat ani samballtat tim odik bhagi!” (Lukas 11:28) Dev, ani tachea ud’dhexa vixim, sot ami xikli zalearuch, ami khuxal zaunk xoktat. Tem sot Povitr Pustokant melltta. Tem sot zannam zalolea vorvim, kitem khorem ani mhotvachem asa vo mhotvachem nam tem vollkhunk amkam modot zata. Bible-antlem sot xikun tem amchea jivitant lagu kelem zalear ami sarke nirnnoi ghetoli ani amchem jivit borem zatolem.

Mhonn’nneo 3:5, 6, 13-18 ani 1 Timotak 6:9, 10 hem-ui polloiat.

 Hea potrikent ami Bible-antlean fokot sov prosnanche zobab polloileat. Tumkam anik chodd zannam zaunk zai? Tumkam sot zannam zaunk khuxi asa zalear tumi xiktole. Tumi ghoddie anikui prosnam vixim chintlam astole, zoxe: ‘Dev amchi kallji gheta zalear, tannem aiz poriant khotteponn ani vollvolle kiteak dovorleat? Mhojem kuttumbik jivit hanv koso sudhartolom?’ Hancho ani oslea khubxea her prosnanche Povitr Pustok sarke ani dhadosponnache zobab dita.

Torui astana, zaite zann Povitr Pustokacher niall korunk fatti sortat. Tankam tem ek mottem pustok ani somzonk kottin koxem dista. Povitr Pustokantlean zobab sodun kaddunk tumkam modot zai? Jehovache Sakxi tumkam don ritini modot korunk xokta.

Poilem mhunnttlear, Devan Dil’li Bori Khobor! he supurle pustike udhexim. Gorjechea prosnanche zobab Bible-antlean sodunk tumkam vell mellona zalear hi pustika tumkam modot kortoli. Dusrem, Bible-achi funkott xikounn diunk manddavoll kel’li asa. Tujea koddlean poixe ghenastana, ek ixtt sumanak ek pavtt tujea ghora vo tuka zai tea zagear ieun thoddo vell tujem lagim Bible-achi chorchea kortolo. Hea manddavolli thaun ak’khea sonvsarar lak’khanim lokank faido mell’lla. Ani zaite zannank sot kitem tem kollon ailem.

Povitr Pustokantlem sot soglleavon moladik. Tem amkam kud’do visvas, ghondoll, ani bhirantentlean suttka dita. Toxench, hea sotak lagon amkam khoro bhorvonso, ek ud’dhex ani khuxalkai melltta. Jezun sanglem, “tumkam sot kollon ietolem ani sot tumkam svotontr kortolem.”—Juanv 8:32.