Be à meà naa vó, bõ̀ònatõ̀ò é ẹb kọọ̀ kùbmà a bã́ ló túá kà ílà dóm nè vaá tṍó e ńpágbálà ílí dõòna nèn, vaá ẹ̀b kọọ̀ log ténmà ní ea égè bàà kà ílà dóm nè vaá. Ge dã́ ból ló nu ea náa vaá è kọ́ vó, naanii èé bugi togó boo nu e Jíízọ̀s beè kọ̀ ea kil ló zààlà zóm nè va bií ló gè kpáá ilí àbèè ge iá.

Mm̀ Kpá Máátìù 19:​9, Jíízọ̀s kọ́ áá nu e nen é láá elá boo zaalí ba ílà dóm nè va. A beè kọọ̀: “Nen ea dọ kẽ kpó a va lọa ló, e bè náa è gbẹẹ́ẹ kuná gã̀, vaá gé ilí dõòna kà va, mè na kà nen kúná gã̀.” Bel e Jíízọ̀s lóá nóòmài kọọ̀ (1) áá kúnàgã̀ ní e nen é láá elá boo zaali a ílà dóm nè vaẹ́, vaá (2) nen ea dõogẽ kpó a va lọa ló vaá ilí dõòna kà va kúná gã̀. *

É kọ bel e Jíízọ̀s lóá tõó dọ̀ kọọ̀ págbálà ea kúná gã̀ vaá kpó a va di pọ́ì ge kpáá ilí va? Ẽ́èe. Tṍó e dóm gbẹ́ẹ a va kuná gã̀, a va é láá beeláfùl ge ia ló nèe àbèè ge kìnee. Be náa ia ló nèe vaá bà sí tọ bèèla gé zaali ba ílà dóm nè va, pálaa ọ̀và di pọ́ì ge kpáá ilí àbèè ge iá dõòna nèn.

Boo dõòna bá, va é láá beeláfùl ge ia ló nè a dóm kọbé ba ílà dóm nè va náa zaalà. Èé kọ́ vàẹ beè dóm ea beè kuná gã̀a náa zigà ge tú ia ló ea aa bá a va vaá àà sí tọ bèèla gé zaali ba ílà dóm nè vaẹ́? Boo béè kọọ̀ a va di kpènà ló gè ia ló nèe, Kpá Káí náa ténmá kọ á kpáá ilí va. Be à dã́ pĩi ilí dõòna nèn, à kpáá kuná gã̀, vaá àé náa kọọ̀ gbò kànen á kpáá beeláẹ bel ló.​—1 Kọ́r. 5:​1, 2; 6:​9, 10.

Tṍó e nen dã́ pĩi kpáá ilí va e Kpá Káí náa ténmà kọ á naa vó, móbá ní e bõ̀ònatõ̀ò é ẹbmà ílà dóm nè va e ba beè zẹ́ẹ́ iláá nè ń ãaí ẽ́? É kọọ̀ túá kà ílà dóm nè vaá di dí kẽ dẹ̀ẹ̀a boo bé e Kpá Káí kọ́ naa? É kọọ̀ va e náa beè kuná gã̀a é láá beeláfùl ge ia ló àbèè kọ náa é ia ló nè a dóm ea beè gbẹẹ́ẹ ilí dõòna nèna? É kọọ̀ bõ̀ònatõ̀ò é ẹb ba ãa ílà dóm nè vaí naamá kúnàgã̀?

Tṍó ea kil nvéeá, bõ̀òtõ̀ò beè olòó ẹ̀b ílà dóm nè va ea meà naa vó naamá kúnàgã̀ tã́gíní bè e va e náa beè kuná gã̀a di-dí dùm vaá à gáà ia dómá. Kọ̀láá bé ea dì naa, Jíízọ̀s náa beè ló bel ea kil ló nen e náa beè kunú gã̀a tṍó ea géè ló bel ea kil ló zààlà dóm nè va bií ló gè kpáá ilí àbèè ge iá. Tãa vó, a beè baatẽ́ kọọ̀ págbálà ea kpó a va lọa ló mm̀ sĩ́deè e Kpá Káí náa nveè sãa kúm vaá ilí dõòna kà va, kúná gã̀. Tṍó ea meà naa vó, zààlà dóm nè vaá bií ló gè kpáá ilí nè ge iá nveè kùbma ló túá kà ílà dóm nè vaá, boo béè kọọ̀ Jíízọ̀s kọ́ à dú kúnàgã̀.

 Tṍó e ílà dóm nè va iná kùbmà boo béè kọọ̀ dóm zaali ba ílà dóm nè va vaá ilí dõòna kà va, va e náa beè kuná gã̀a náa é láá iana ló nèe. Vóà naa, náa dú ná bíi kọ á kpáá tãagẽ a bùlà be àé ia ló nè a dómá àbèè kọ náa é ia ló nèe. Vóà naa, bé e bõ̀ònatõ̀ò ẹb ãa ílà dóm nè vaí naa náa é dẹẹ̀a boo beè va e náa beè kuná gã̀a ú, kpáá iá dóm, àbèè kọ à kúná gã̀ tṍó e tṍó téní. *

Mm̀ nu dòòmà bá e beè ló bel booá, dómá beè kuná gã̀, ea náa kọ bàá zààlà. Vaá èé kọ́ vàẹ beè dómá náa beè kuná gã̀, sõò à zaali ba ílà dóm nè va vaá ilí dõòna nène? Àbèè kọọ̀ èé kọ́ vàẹ beè dómá náa beè kuná gã̀ besĩ́ à kalá zaali ba ílà dóm nè va, sõò à kúná gã̀ tṍó ea ni zaali ba ílà dóm nè va lọ̀l vaá dã́ pĩi ilí dõòna nèn kọ̀láá bè ea va di kpènà ló gè ia ló nèe naa ẽ́? Dénè nu dòòmà bá e ni ló bel booí dú kúnàgã̀, vaá à nveè kùbma ló túá kà ílà dóm nè vaá. Log ténmá kọọ̀ ãa ílà dóm nè vaí lelà. Kpá Tọ Kùdẽe Ló níí November 15, 1979, 32 náásĩ́ beè kọọ̀, “kátogóí a bã́ mm̀ ãa ílà dóm nè va, boo béè vó, náa é láá dõogẽ nvèè kùbma ló nakà ílà dóm nè vaí vaá òòà nyoone a túá kà vaá; zààlà dóm nè va, kúnàgã̀, nè ge kpáá ilí dõòna nèn nveè kùbma ló túá kà ílà dóm nè vaá.”

Nakà ãa dã̀ból ló nuí náa náa kọ é ẹ̀b bé e ílà dóm nè va di káí naa tẹlẹ kẽ, àbèè ge tú gbẹ́gẹ̀ bá ẹ̀bmà kúnàgã̀. Gbò kànen é béélá bel ló nen ea kpó a va lọa ló boo béè bug e Kpá Káí náa nveè sãa kúm vaá kpáá ilí dõòna nèn. (Bàé béélá nágé bel ló ãa vaí be ẹ̀ẹ̀ neǹ vígà, boo béè kọọ̀ à kúná gã́.) Náa kal ló bée kọọ̀ bõ̀ònatõ̀ò náa é ẹb ãa ílà dóm nè vaí naamá kúnàgã̀, dómá náa é láá ié dọ̀ tóm mm̀ bõ̀ònatõ̀ò mm̀ gã́bug gbáá dọ̀ọ̀mà tṍó e kyènù ea dú ló nu ea beè naaá é tá nyíè gbò nen. Besĩ́ gbò kànen kálá nèe dọ̀ tóm mm̀ bõ̀ònatõ̀ò, bàé zẹ́ẹ́ bugi togó boo dìtõ̀ò e pábia ea gĩ́ímáá nè pá a nvín dì, be bà di-dí ńkem.​—Mál. 2:​14-16.

Boo béè kọọ̀ bel ea kil ló gè zaali ílà dóm nè va mm̀ sĩ́deè e Kpá Káí náa ténmá vaá kpáá ilí dõòna nèn palàge agabá, gbò nyòòne nvéè Kráìst ólò ẹ̀b nòònù ílà dóm nè va kọ à di káí belí bé e Jìhóvà ẹb naa.​—Ẹ̀klì. 5:​4, 5; Híb. 13:4.