Jìhóvà beè tú boo kunukẽ̀í nè gbò nen kọ bàá tõó boo. Boo béè vó, Bàrì náa beè dèm Ádàm nè Íìv e bà dú túá kà dóm nè va á kọ bàá tõó káála. Tãavó, —Bàrì beè dèm gbò nyómá tóm kọ bàá tõó káála. (Jóòb 38:4, 7) Bàrì beè tú túá kà pá gbálàa sẹlẹ́ mm̀ Páladaìs ea beè dú gè kolíe gònò Ìdèna. (Jénesìs 2:15-17) Jìhóvà beè tú ẹ̀b dẽésĩ́ ge tõó dùm mm̀ ẹ́ẹ́-ẹẹ̀ nyíé boo kunukẽ̀í dọ̀ọ̀mà dè-dè bẹẹ́ sĩ́ ẹlẹ nè gbò pá nvín ea é beè ié.​—Bugí Psalm 37:29; 115:16.

Aa kà dààà togó, áá gònò Ídèn ní ea beè dú Páladaìs e. A beè dú ge bĩiná lọl bá túá kà tẹ̀ nè kà kọ bàá màn nvín ea é ḿḿ-má boo kunukẽ̀i. Tṍó e tṍó ni téní bà ge gbóó láá tõó boo zivèkà bàlà booí vaá tú naamá Páladaìs. (Jénesìs 1:28) Bà naa ge kpáá kyọ̀ nà sĩ́ boo kunukẽ̀í, tãa bee vó, àé dú kiẽ́e e gbò nen e tõo lee.—Bugí Psalm 104:5.

Ádàm nè Íìv beè lọ̀l togó kè kẽè Bàrì vóá à gbóó naa kọọ̀ Jìhóvà a tú va lọl mm̀ gònò a. Páladaìsí náa beè dì nà, vaá tọ́ọ̀ nen gáà láá òòma kẽ domá. Tã́gíní tṍóá pọ́lọ́ gbò nen beè gbóó mm-má bàlà booí.”​—Jóòb 9:24.—Bugí Jénesìs 3:23, 24.

Èé gbóó kọ Jìhóvà sãanà bá ló a tóm̀ bùlà ea íe kilmá ló gbò nen gbẹẹ́ kẽ? Ẽ́èe! Ẹlẹ dú nen ea bọọ èlmà dénè nen, ẹlẹ naa gé láá kẹlẹ́i. (Àìzáíà 45:18) Ẹlẹ gé oòmà kẽ kọ̀láá kà gbò nvín nen sẹlẹ mm̀ bá ea beè gbĩ́ kọ bàá tõo.​—Bugí Psalm 37:11, 34.

Àé dú gè òòma kẽè Páladaìs domá boo kunukẽ̀í tṍó e Jíízọ̀s é bẹl vaá dú méné e Bàrì sa. Kèbá bé gím ea kọlà Àmàgídòm, Jíízọ̀s é fáálá gbò nyómá tóm Bàrì váá kyọ̀ọ̀mà sĩ́ kọ̀láá nen ea náa uú boo Bàrì. Jíízọ̀s é gbóó sii Sétàn nvee tọọ̀ kpọ́gọ́lọ́  mm̀ 1,000 gbáá. Gbò gyóòlo Bàrì e duuà boo beè kọọ̀ Jíízọ̀s e kúva dẽe ló vaá kpènà va. Baala gé gbóó ié dùm e bè náa tá mm̀ Páladaìs ea é di boo kunukẽ̀í ã́.​—Bugí Kùùà Nù 20:1-3; 21:3, 4.

Mó tṍó níe Bàrì é tú kùbmà nvee ló pọ́lọ́ ea di boo kunukẽ̀í ẽ́? Jíízọ̀s beè nè “nu dòòmà bá” ea é zógè tṍó e ke kùbmà é íná kuló. Gbò dì tõ̀ò ea di bàlà booí kátogóí tú di dùm gbò nen nvee mm̀ gẹẹ gẹẹ ló vaá zogè kọ è di mm̀ “dee deè nvée tṍó.”​—Bugí Máátìù 24:3, 7-14, 21, 22.

Mm̀ 1,000 gbáá e Jíízọ̀s gé tõó gbàn deè káála vaá bẹ̀l boo kunukẽ̀í, ẹlẹ gé nveè kùbmà ló mòn tã̀àgã̀. (Àìzáíà 9:6, 7; 11:9) Daalá lọl ló kọọ̀ ẹlẹẹ̀ Méné, Jíízọ̀s gé dú nágé pọ́b neǹ vààla gyọ́ọ naa ní ea é kuu nú boo pọ́lọ́ e gbò e bà vulè Bàrì beè sì. Vóá à naa, Bàrì gé téní domá ló Jíìzọ́s vaá lọ̀l zọ̀ló, áná nè ú.​—Bugí Àìzáíà 25:8; 33:24.

Gbò e bà gbantṍ ló Bàrì é tõó dùm mm̀ Páladaìs. (1 Jọ́ọ̀n 2:17) Jíízọ̀s beè lẹ̀ẹ̀là pá a gbò nyòòne nvée kọ bàá gbĩ́ gbò kìlmà bùlà kẽ nè ge noòmà va nu ea é léémá Bàrì. Deè nieí, Jìhóvà dì ea gé búmá gã́bug gã gbò nen kọbé bà láá tõó dùm mm̀ Páladaìs ea é dí boo kunukẽ̀í ã́. (Zèfàníà 2:3) Gbẹá Kíndòm Họ́ọ̀l Gbò Neǹ Ditõ̀ò Jìhóvà, gbò nen gé nó gági gè dú kà lé dóm nè lé tẹ̀ gbáló gè dú lé va nè kà. Tẹ̀ nè kà nè gbò pá nvín ólò gbá bõoná vaá nó sĩ́deè e baala gé láá ié dọ̀ bélè lọl lọ́ lé kpẹ̀aí.​—Bugi Máíkà 4:1-4.