1. Kisa roun moun pouvé fè afòrs i ka chaché dépasé ròt-ya ?

ANNAN sa monn nou ka viv jòdla-a, roun patché moun ka chaché dépasé yé konpanyen, é yé pa menm mélé pou savé si sa yé ka fè ka fè ròt-ya soufri. Parèkzanp, roun patron pouvé chaché gen plis soumaké pasé ròt patron-yan, é pou rivé fè sa, i ka krazé yé. Roun moun ki ka fè èspòr annan roun ékip pouvé blésé roun moun annan ròt ékip-a parèsprè, paské i lé ganyen. Roun étidyan pouvé triché paské i lé antré annan roun gran lékòl. Mé nou ki krétyen, nou ka rékonnèt ki sa bagaj-ya pa bon ; a « sa lachè-a ka bay » (Gal. 5:19-21). Mé pitèt nou pa menm ka randé nou kò kont ki nou ka fè lakours pou dépasé ròt-ya é akoz di nou, yé ké fè menm bagaj-a. Nou divèt réfléchi asou sa paské si i gen frè ké sò ki ka briga pou dépasé ròt-ya, sa pouvé mété dézòrd annan asanblé-a.

2. Kisa nou ké wè annan sa artik-a ?

² Annan sa artik-a, nou ké wè ki bagaj ki pouvé fè nou anvi montré nou miyò pasé ròt-ya. Nou ké wè osi èkzanp plizyèr wonm ké fanm fidèl annan Labib-a ki pa tonbé annan sa trap-a. Mé pou koumansé, annou wè kouman nou pouvé chaché wè sa nou gen annan nou tchò.

3. Ki késyon nou divèt pozé nou kò ?

³ Tanzantan, sa byen pou nou chaché wè sa nou gen annan nou tchò. Pou fè sa, nou pouvé doumandé nou kò : « Ès mo ka santi mo kò byen sèlman lò mo ka pansé ki mo pi fò pasé pyès moun ? Ès mo ka travay rèd annan asanblé-a paské mo lé montré mo pi fò pasé pyès moun ?  Ès sa mo lé a fè wè ki mo miyò pasé sa frè-a ouben sa sò-a ? Ouben, ès tousa mo ka fè a pou fè Jéova plézi ? » Poukisa nou divèt pozé nou kò sa késyon-yan ? Annou wè sa Labib-a ka di asou sa.

4. Dapré Galates 6:3, 4, poukisa nou pa divèt konparé nou kò ké ròt-ya ?

⁴ Labib-a ka di nou ki nou pa divèt konparé nou kò ké ròt-ya (li Galates 6:3, 4). Poukisa ? Paské si nou ka pansé ki nou pi fò pasé yé, nou ké koumansé krè nou kò. Mé si nou ka pansé ki ròt-ya toujou pi fò pasé nou, nou ké dékourajé. An tout sans, sa mantalité-a pa bon (Rom. 12:3). Roun sò yé ka aplé Katerina * é ki ka rété an Grès ka di : « Mo té gen labitid konparé mo kò ké sò ki, pou mo, té pi jòlòt pasé mo, ki té pi vayan annan prédikasyon-an é ki té ka rivé gen zanmi pi fasilman pasé mo. Akoz di sa, mo té ka santi ki mo pa té vo anyen. » Nou divèt sonjé ki, si Jéova fè nou vini òbò li, a pa paské nou jòlòt, nou ka palé byen ouben paské bokou moun kontan nou. Si i fè nou vini òbò li, a paské nou kontan li é paské nou ka kouté so Pitit (Jean 6:44 ; 1 Cor. 1:26-31).

5. Kisa èkzanp Hyun ka anprann to ?

⁵ Rounòt késyon nou pouvé pozé nou kò, a : « Ès frè ké sò-ya ka wè mo kou roun moun ki ka chaché fè lapè ouben ès yé ka wè mo kou roun moun ki toujou annan roun djopopo ? » Gadé sa ki rivé Hyun, roun ansyen ki ka rété an Koré di Sid. Anvan, i té ka pansé ki ròt ansyen-yan annan so asanblé té ka chaché montré ki yé té pi fò pasé li. I ka di : « Mo té ka kritiké sa frè-ya. É mo pa té jen dakò ké sa yé té ka di. » É i ka di : « Akoz di sa mo té ka fè-a, mo mété dézòrd annan asanblé-a. » Sèrten annan so zanmi idé li konprann ki i té gen roun problèm. Hyun, chanjé fason i té ka fè-a, é jòdla i sa roun bon ansyen. Si nou ka wè ki nou kontan chaché dépasé ròt-ya pasé nou travay pou lapè, nou divèt fè roun bagaj pou sa.

6. Dapré Galates 5:26, ki défo pouvé fè nou anvi montré nou pi fò pasé ròt-ya ?

⁶ (Li Galates 5:26.) Ki défo pouvé fè nou anvi ‘chaché dépasé nou konpanyen’ ? Roun di sa défo-ya, a zafè krè so kò. Roun moun ki ka krè so kò a roun moun ki ka pansé ki i gen plis valò pasé pyès moun é i ka gadé pou so douvan lèstomak. Rounòt défo, a zafè anvyé moun. Roun moun konsa lé sa ròt moun-an gen mé i lé osi tiré sa sa moun-an gen annan so lanmen. Pou byen di, roun moun ki ka anvyé rounòt moun rayi sa moun-an. Nou pa lé sanblé ké sa kalité moun-yan menm !

7. Ki èkzanp ka montré nou ki krè so kò ké anvyé moun, a pa roun bon bagaj ?

⁷ Zafè krè so kò ké zafè anvyé ròt moun, a kou poul-bwa ki ka manjé charpant kaz-a. Tout bèl kaz-a pouvé bèl, si poul-bwa-ya ka manjé l’, roun jou i ké tonbé nèt. Menm fason-an, roun moun pouvé adoré Jéova pannan roun tan. Mé, si i sa roun moun ki ka krè so kò é ki ka anvyé ròt-ya, i ké tonbé (Prov. 16:18). I ké arété sèrvi Jéova, é i ké fè ni li menm ni ròt-ya soufri. Kisa nou pouvé fè pou nou pa tonbé annan zafè krè nou kò ké anvyé moun ?

8. Kouman nou pouvé briga ké zafè krè nou kò ?

⁸ Pou nou pouvé briga ké zafè krè  nou kò, nou divèt swiv konsèy Pòl bay Filipyen-yan : « Pa fè anyen pou lévé dézòrd ké ròt moun ni pou gonflé zòt lèstomak, mé, ké imilité, a pou zòt wè ròt-ya kou moun ki pi fò pasé zòt » (Phil. 2:3). Si pou nou, ròt-ya pi fò pasé nou, nou pa ké chaché dépasé sa-ya ki konnèt fè plis bagaj pasé nou. Nou ké pito kontan pou yé, èspésyalman si yé ka sèrvi sa yé konnèt fè, pou Jéova, pou louwé li. É si roun frè ouben roun sò, ki konnèt fè bokou bagaj ka swiv sa menm konsèy Pòl bay-a, i ké pouvé wè ki bèl kalité nou gen. Si nou ka fè sa, nou tout ké pouvé idé frè ké sò-ya annan asanblé-a viv byen ansanm.

9. Kisa nou pouvé fè pou nou pa divini roun moun ki ka anvyé ròt-ya ?

⁹ Nou pouvé briga ké zafè anvyé nou frè ké sò-ya si nou ka rékonnèt ki nou pa vayan annan sèrten bagaj. Si nou ka rékonnèt nou limit, nou pa ké chaché montré ki nou pi fò pasé pyès moun. Parèkzanp, imajiné i gen roun frè annan asanblé-a ki ka fè bon diskour menm. Nou pouvé doumandé li kouman i ka préparé so diskour. Si roun sò ka byen fè manjé, nou pouvé doumandé li déztrwa konsèy pou nou vin pi vayan annan sa. É si roun jenn krétyen pa ka rivé gen zanmi fasilman, i pouvé alé doumandé roun moun ki ka rivé gen zanmi fasilman idé li. Si nou ka fè sa, nou ké pouvé briga ké zafè anvyé moun é nou ké vin pi vayan annan sa nou konnèt fè.

10. Ki problèm Jédéyon jwenn ?

¹⁰ Annou wè sa ki rivé ant Jédéyon, ki té ka fè parti di ti nasyon Manasé, ké wonm-yan ki té ka fè parti di ti nasyon Éfrayim. Jéova té idé Jédéyon ké so 300 sòlda ganyen roun lagèr. É lò to ka gadé fason yé ganyen sa lagèr-a, yé té ké pouvé gonflé yé lèstomak. Éfrayimit-ya alé jwenn Jédéyon. Mé a pa té pou félisité li, a té pou pran dézòrd ké li. Yé té  kòlè paské Jédéyon pa té envité yé dipi lagèr-a té koumansé pou vini briga kont lèlmi Jéova-ya ansanm ké yé. Sa yé té lé, a ki moun-yan rèspèkté yé nasyon. Mé yé té bliyé ki sa ki té pi enpòrtan, a ki Jédéyon té fin fè roun bagaj ki té bay non Jéova lònò é ki té protéjé so pèp ! (Juges 8:1).

11. Kisa Jédéyon fè lò Éfrayimit-ya vini lévé dézòrd ké li ?

¹¹ Ké imilité, Jédéyon di Éfrayimit-ya : « Sa mo fè pa anyen parapòrta sa zòt fè. » Apré sa, i fè yé sonjé kouman Jéova té idé yé fè gran bagaj. Labib-a ka di : « Lò sa mouché-ya tandé sa, yé kalmé yé kò » (Juges 8:2, 3). Jédéyon té paré pou fè so kò toupiti pou i kontinyé gen lapè annan pèp Bondjé-a.

12. Kisa èkzanp Éfrayimit-ya ké Jédéyon ka anprann nou ?

¹² Kisa sa istwè-a ka anprann nou ? Sa èkzanp-a ka montré nou ki nou pa divèt mété nou fyèrté anvan lònò nou divèt bay Jéova. Si to sa roun chèf fanmi ouben roun ansyen, èkzanp Jédéyon ka anprann to roun bagaj. Si roun moun faché parapòrta roun bagaj to di ouben to fè, to divèt chaché konprann poukisa moun-an faché konsa. To pouvé félisité l’ osi pou bon bagaj i ka fè. To divèt gen imilité pou fè sa, èspésyalman si moun-an pa té gen rézon fè sa i fè-a. Mé sa ki pi enpòrtan-an, a pa montré ki nou gen rézon, mé a kontinyé rété byen ké nou frè ké sò-ya.

13. Ki problèm Ann jwenn, é kisa i fè pou sa ?

¹³ Aprézan, annou wè èkzanp Ann. I té maryé ké roun Lévit yé ka aplé Èlkana, é Èlkana té kontan l’ bokou. Mé Èlkana té gen roun dézyèm madanm, Pénina. Èlkana té kontan Ann plis ki Pénina, mé problèm-an, a té ki « Pénina té gen timoun, mé Ann li menm pa té gen timoun ». Akoz di sa, Pénina ‘pa té ka las ari di tèt’ Ann pou fè li méchansté. Kouman Ann réyaji ? So dé bra té kasé. I « té ka pléré é i pa té ka manjé » (1 Sam. 1:2, 6, 7). Mé Labib-a pa ka di ki Ann éséyé vanjé so kò. I pito louvri so tchò pou Jéova, é i fè li konfyans pou i té pouvé ranjé sitiasyon-an. Ès Pénina chanjé ? Labib-a pa ka di nou anyen asou sa. Mé nou savé ki Ann pa té tris ankò, é ki i kontinyé gen lapè annan so tchò. « So vizaj pa té tris ankò » (1 Sam. 1:10, 18).

14. Kisa èkzanp Ann ka anprann nou ?

¹⁴ Kisa èkzanp Ann ka anprann nou ? Si roun moun ka éséyé fè lakours pou dépasé to, sonjé ki to pouvé fè roun bagaj pou sa. To pa blijé lésé moun-an fè to antré annan sa. Pasé to réponn chou pou chou, éséyé fè lapè ké moun-an  (Rom. 12:17-21). É menm si i pa ka chanjé, to ké santi to kò byen é to ké kontan.

15. Poukisa nou pouvé di ki Apolos ké Pòl ka sanblé ?

¹⁵ Pou fini, annou wè sa èkzanp Apolos ké Pòl ka anprann nou. Yé toulédé té byen konnèt Labib-a. Tout moun té konnèt yé, paské yé toulédé té dòkò annan zafè ansényé-a. É yé toulédé té fè roun patché disip. Mé yé pyès pa té ka jalou yé konpanyen.

16. Kisa nou savé asou Apolos ?

¹⁶ Apolos, a té « roun moun Alèksandri », roun vil koté moun-yan té ka alé fè gran lékòl. Dapré sa nou ka li, i té ka byen palé, é i « té byen konnèt Ékritir-ya » (Actes 18:24). Lò Apolos alé pasé roun tibi tan Korent, roun ran annan asanblé-a byen montré ki yé té pi kontan Apolos pasé ròt frè-ya, menm pasé Pòl (1 Cor. 1:12, 13). Ès Apolos profité pou mété dézòrd annan asanblé-a ? Nou pa pouvé pansé ki i fè sa. Anfèt, roun tibi tan apré Apolos lésé Korent, Pòl doumandé li routounen laba (1 Cor. 16:12). Pòl pa té ké janmen fè sa si i té savé ki Apolos té ka mété dézòrd annan asanblé-a. Apolos té ka byen sèrvi sa i té konnèt fè : i té ka di bon nouvèl-a, é i té ka bay so frè ké sò-ya fòrs. Nou pouvé sir osi ki Apolos té gen imilité. Parèkzanp, Labib-a pa ka di nou ki i faché lò Akilas ké Prisil ‘èspliké l’ vré ansèyman Bondjé-a ké plis détay’ (Actes 18:24-28).

17. Kouman fason Pòl réyaji pèrmèt frè ké sò-ya rété annan lapè ?

¹⁷ Apot Pòl té byen konnèt ki bon travay Apolos té ka fè. Mé sa pa té ka jennen  Pòl si ròt-ya té pouvé pansé ki Apolos té pi vayan pasé li. Lò nou ka li sa Pòl ékri pou Korentyen-yan, nou pouvé wè ki i té gen imilité, i té ka rékonnèt so limit, é i té rézonab. I pa té kontan lò moun-yan té ka di : « Mo menm, mo ka swiv Pòl ». Pasé sa, i toujou té ka mété Jéova ké Jézi douvan (1 Cor. 3:3-6).

18. Dapré 1 Corinthiens 4:6, 7, kisa èkzanp Apolos ké Pòl ka anprann nou ?

¹⁸ Kisa èkzanp Apolos ké Pòl pouvé anprann nou ? Pitèt nou ka travay rèd pou Jéova é pitèt nou idé roun patché moun konnèt lavérité. Mé nou savé ki, si nou ka rivé fè sa, a sèlman paské Jéova ka idé nou. Èkzanp Apolos ké Pòl ka anprann nou rounòt bagaj ankò. Nou ka anprann ki pi nou gen rèsponsabilité annan asanblé-a, pi nou pouvé fè bagaj pou i kontinyé gen lapè annan asanblé-a. Si ansyen-yan ké asistan-yan ka bay nou konsèy ki ka vini di Labib-a, é si, pasé yé fè yé kò monté, yé ka montré ki a Jézi tout moun divèt swiv, yé ké idé nou kontinyé viv byen roun ké ròt, é rété annan lapè ké nou konpanyen (li 1 Corinthiens 4:6, 7).

19. Kisa nou tout divèt fè ? (gadé osi ankadré-a «  Panga fè moun annan asanblé-a chaché dépasé yé konpanyen »).

¹⁹ Gras a Jéova, nou tout konnèt fè sèrten bagaj. Donk, annou sèrvi sa nou konnèt fè pou « sèrvi nou konpanyen » (1 Pierre 4:10). Pitèt nou pouvé pansé ki sa nou ka fè, a pa anyen. Mé sonjé ki a patché ti pwen lakoutir ki ka fè roun lenj tchenbé. Donk, nenpòrt ki bagaj to pouvé fè ka idé tout asanblé-a rété ansanm ansanm. Annou tout travay rèd pou nou pa janmen chaché montré nou pi fò pasé ròt-ya. É annou tout byen désidé fè tousa nou pouvé pou i kontinyé gen lapè annan asanblé-a (Éph. 4:3).