Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ NOVEMBER 2015

 BIBLIA LƐ TSAKEƆ MƐI

Misusu akɛ Miiye Wala

Misusu akɛ Miiye Wala
  • BE NI AFƆ LƐ: 1982

  • MAŊ NƆ NI EJƐ: POLAND

  • MƆ NI EJI TSUTSU: EYI WA, EKƐ TSOFAI TSU NII, NI ETIU NITSUMƆ NI BULƐ YƆƆ HE SƐƐ

MITSUTSU SHIHILƐ:

Afɔ mi yɛ Poland maŋ bibioo ko ni bɛŋkɛ he ni Poland kɛ Germany jeɔ husu yɛ lɛ mli. Alɛɔ kooloi ni afeɔ ŋmɔ hu yɛ maŋ nɛɛ mli, kooi yɛ mli, ni toiŋjɔlɛ yɛ jɛmɛ. Mifɔlɔi ni sumɔɔ misane waa lɛ wo mi hewalɛ ni mihi shi jogbaŋŋ, mimia mihiɛ yɛ skul, ní miya skul kɛshɛ shɔŋŋ koni maná nii wɔsɛɛ.

Mikɛ naagbai bɔi kpee be ni mibɔi mla kasemɔ yɛ yunivɛsiti ko ni yɔɔ Wrocław maŋ lɛ mli lɛ. Akɛni mibɛ mifɔlɔi amasɛi hewɔ lɛ, mikɛ mɛi ni bɛ jeŋba bɔi bɔɔ. Misumɔɔ bɔɔl waa, shi minanemɛi lɛ hewɔ lɛ, mikɛ mihe wo mli vii. Kuu ni mifiɔ amɛsɛɛ lɛ jɛ Warsaw, ni yɛ otsi lɛ naagbee lɛ, he fɛɛ he ni amɛbaayatswa bɔɔl yɛ lɛ, minyiɛɔ amɛsɛɛ kɛyaa. Be fɛɛ be ni wɔbaaya he ko lɛ, wɔnuɔ dãa waa, wɔkɛ tsofai tsuɔ nii yɛ gbɛ ni ejaaa nɔ, ni bei komɛi lɛ wɔkɛ mɛi ni fiɔ bɔɔlutswalɔi akuu kroko sɛɛ lɛ nɔɔ waa. Mifeɔ nibii nɛɛ koni mikɛye shihilɛ mli yeyeeyefeemɔ nɔ, eyɛ mli akɛ mile akɛ kɛ́ polisifoi mɔ mi lɛ minyɛŋ matsa miskulyaa lɛ nɔ koni mibatsɔ lɔyafonyo ni mitaoɔ matsɔ lɛ.

Mikɛ minanemɛi lɛ fɔɔ disko yaa. Bei pii kɛ́ wɔtee lɛ, wɔkɛ mɛi yanɔɔ. Polisifoi lɛ mɔ mi shii abɔ, shi be fɛɛ be lɛ mibɔɔ mɔdɛŋ akɛ mafee nɔ ko koni mla lɛ akadu mi, no hewɔ lɛ, bei komɛi lɛ mihãa nyɔɔŋnii. No mli lɛ, misusu akɛ miiye wala. Shi enɛ fɛɛ sɛɛ lɛ, mi diɛŋtsɛ mile yɛ mitsui mli akɛ nɔ ni efeɔ lɛ ejaaa. Miyaa sɔlemɔ daa Hɔgbaa koni mihenilee akayi mi tsɔ.

BƆ NI BIBLIA LƐ TSAKE MISHIHILƐ:

Yɛ afi 2004 lɛ, Yehowa Odasefoi enyɔ komɛi batswa mishinaa lɛ, ni mikpɛlɛ akɛ mikɛ amɛ baakase Biblia lɛ. Be ni mikase nɔ ni hãa mɔ ko feɔ Kristofonyo kpakpa lɛ he nii babaoo lɛ, mihenilee bɔi mi yii. Mibayɔse akɛ, esa akɛ makpa dãa babaoo numɔ, mikɛ tsofai akpa nitsumɔ yɛ gbɛ ni ejaaa nɔ, ní mikɛ mɛi ni ehiii shi yɛ Biblia mli shishitoo mlai anaa lɛ akpa bɔɔ. Mibayɔse hu akɛ esa akɛ matsake bɔ ni mifeɔ basabasa kɛ awuiyeli su ni mihiɛ lɛ. Eyɛ mli akɛ miyɔse akɛ esa akɛ mafee tsakemɔi moŋ, shi mikã he mifee nibii fɔji.

Gbi ko gbɛkɛ lɛ, mikɛ hii kpaanyɔ komɛi yanɔ, ni nɔ ni ba lɛ ji nɔ ni hã mitsake. Mikaiɔ akɛ no mli lɛ mikã gbɛjegbɛ lɛ he, ní amɛmiimamɔ mi atswɛrɛ, ní amɛmiibuutu miyitso. Be ni mina akɛ gbo migboɔ lɛ, misɔle akɛ: “Yehowa, miikpa bo fai akɛ mikɛ hiɛdɔɔ susuuu o-Wiemɔ lɛ he. Miiwo bo shi akɛ, kɛ́ migbooo lɛ, mi kɛ Odasefoi lɛ baakase Biblia lɛ, ni matsake mishihilɛ  gbonyo lɛ.” Lɛɛlɛŋ hu, migbooo. No hewɔ lɛ, miye shi ni miwo akɛ makase Biblia lɛ nɔ.

Yɛ afi 2006 lɛ, mishi kɛtee England. No mli lɛ, oti ni ma mihiɛ ji, ni maná shika pii koni maku misɛɛ kɛya Poland ekoŋŋ ni mayatsa miskul lɛ nɔ, ni maná digrii ni da fe nɔ ni mihiɛ lɛ. Be ni mitee nɔ mikase Biblia lɛ, ŋmalɛ ko ná minɔ hewalɛ waa. Bɔfo Paulo ŋma akɛ: “Yɛ anɔkwale mli lɛ, mibuɔ nibii fɛɛ hu akɛ nibii ni eŋmɛɛ mi yɛ Kristo Yesu, mi-Nuŋtsɔ lɛ, he nilee ni jara wa fe fɛɛ lɛ hewɔ. Lɛ ehewɔ lɛ, mishɛrɛ nibii fɛɛ mishwie, ni mibuɔ amɛ akɛ jwɛii babaoo, koni minine ashɛ Kristo nɔ.” (Filipibii 3:8) Bɔfo Paulo ji mlalelɔ tamɔ mi—ni eyi wa tamɔ bɔ ni mi hu miyi wa lɛ. (Bɔfoi 8:3) Kɛ̃lɛ, ebana akɛ shihilɛ gbɛ kpakpa ko yɛ, ni no ji, esɔmɔ Nyɔŋmɔ ni ebɔ mɔdɛŋ ekase Yesu. Be ni mijwɛŋ Paulo shihilɛ lɛ he lɛ, mina akɛ jeee nitsumɔ ní hãa anáa shika pii kɛ mɔ yitsoŋ ni wa lɛ ji nibii ni hãa mɔ náa miishɛɛ. Miná nɔmimaa akɛ, kɛ́ Paulo nyɛ etsake lɛ, mi hu manyɛ matsake. No hewɔ lɛ, mikpɛ miyiŋ akɛ mahi England, ni mijie skul lɛ nɔtsamɔ lɛ kɛjɛ mijwɛŋmɔ mli.

Babaoo ni mikaseɔ Yehowa he nii lɛ, babaoo ni minuɔ he akɛ mi kɛ lɛ teŋ wekukpaa lɛ mli miiwa. Shi ni ewo akɛ ekɛ mɛi ni miisumɔ ni amɛtsake amɛtsui lɛɛlɛŋ lɛ ahe baake amɛ lɛ ta mitsui mli waa. (Bɔfoi 2:38) Ni be ni mijwɛŋ 1 Yohane 4:16, ni kɛɔ akɛ “Nyɔŋmɔ lɛ, suɔmɔ ji lɛ,” lɛ nɔ lɛ, mibanu nɔ hewɔ ni Nyɔŋmɔ nyɛɔ awuiyeli lɛ shishi.

Ekomefeemɔ kɛ miishɛɛ yɛ amɛteŋ, no hewɔ lɛ mishwe ni mafata amɛhe

Mibanya Odasefoi lɛ ajeŋba hu he waa. Ebafee faŋŋ kɛhã mi akɛ, amɛbɔɔ mɔdɛŋ akɛ amɛbaahi shi yɛ Biblia mli shishitoo mlai ni nɔ bɛ lɛ anaa. Ekomefeemɔ kɛ miishɛɛ yɛ amɛteŋ, no hewɔ lɛ mishwe ni mafata amɛhe. Be ni mibɔ he mɔdɛŋ aahu, ni naagbee lɛ minyɛ mifee tsakemɔi yɛ mishihilɛ mli lɛ, abaptisi mi akɛ Yehowa Odasefonyo yɛ afi 2008.

Mi kɛ Esther fɛɛ náa miishɛɛ waa kɛ́ wɔtsɔɔ mɛi ni wieɔ Polish lɛ Biblia mli saji lɛ

BƆ NI MINÁ HE SƐƐ:

Biblia lɛ ehã mikpa ninamɔ sɛɛtiumɔ, basabasa shihilɛ, tsofai kɛnitsumɔ yɛ gbɛ ni ejaaa nɔ, dãanumɔ shɛii, kɛ mitsui fɛɛ ni mikɛnyiɛɔ bɔɔltswaa sɛɛ lɛ, ni ehã mitsɔ Nyɔŋmɔ tsulɔ ni tsɔɔ mɛi krokomɛi Biblia mli saji. Misumɔɔ bɔɔl kwɛmɔ lolo, shi mitswa mifai shi akɛ mikɛ hiɛtserɛjiemɔ nɛɛ baaye gbɛhe ni sa.

Amrɔ nɛɛ mikɛ nyɛmi yoo fɛfɛo ko ni lɛ hu ejáa Yehowa, ni atsɛɔ lɛ Esther lɛ ebote gbalashihilɛ mli. Kɛ́ wɔtsɔɔ mɛi ni wieɔ Polish ni yɔɔ England kooyi-anaigbɛ lɛ Biblia mli saji lɛ, wɔnáa miishɛɛ waa. Kpaako kwraa miná miishɛɛ diɛŋtsɛ yɛ shihilɛ mli. Mihenilee eyiii mi dɔŋŋ, ni mitoiŋ ejɔ mi agbɛnɛ.

Ekrokromɛi Hu Nɛ

Mɛɛ Gbɛ nɔ Wɔnáa Biblia mli Shishitoo Mlai Ahe Sɛɛ?

Yesu tsɔɔ nɔ hewɔ ni gbɛtsɔɔmɔ he hiaa wɔ kɛ Biblia mli shishitoo mlai enyɔ ni he hiaa titri.