Bɔfoi Lɛ Anitsumɔi 2:1-47

  • Afɔse mumɔ krɔŋkrɔŋ ashwie mɛi anɔ yɛ Pentekoste gbi lɛ nɔ (1-13)

  • Petro wiemɔ lɛ (14-36)

  • Mɛi lɛ tsu Petro wiemɔ lɛ he nii (37-41)

    • Abaptisi mɛi 3,000 (41)

  • Kristofoi anaanyobɔɔ (42-47)

2  Agbɛnɛ, yɛ gbi ni ayeɔ Pentekoste* Gbi Jurɔ+ lɛ nɔ lɛ, amɛ fɛɛ amɛbua amɛhe naa yɛ he kome.  Trukaa lɛ, gbɛɛmɔ ko ni tamɔ kɔɔyɔɔ ni miitswa waa jɛ ŋwɛi ba, ni ejije yɛ shĩa ni amɛtara mli lɛ mli fɛɛ.+  Ni amɛna nɔ ko tamɔ la ni efee tamɔ lilɛii, ni ejiejiee ekomekomei, ni eko bama amɛteŋ mɔ fɛɛ mɔ nɔ,  ni mumɔ krɔŋkrɔŋ bayimɔ amɛ fɛɛ obɔbɔ,+ ni amɛbɔi wiemɔi* srɔtoisrɔtoi wiemɔ, tamɔ bɔ ni mumɔ lɛ kɛwo amɛnaa akɛ amɛwie lɛ.+  Nakai be lɛ mli lɛ, Yudafoi ni sheɔ Nyɔŋmɔ gbeyei ni jɛ jeŋmaji fɛɛ ni yɔɔ ŋwɛi shishi lɛ anɔ lɛ yɛ Yerusalem.+  No hewɔ lɛ, be ni gbɛɛmɔ nɛɛ jije lɛ, mɛi babaoo babua amɛhe naa, ni amɛhe jɔ̃ amɛhe, ejaakɛ amɛteŋ mɔ fɛɛ mɔ nu ni amɛmiiwie lɛ diɛŋtsɛ emaŋ wiemɔ.  Anɔkwa, amɛnaa kpɛ amɛhe waa diɛŋtsɛ ni amɛkɛɛ: “Naa, mɛi ni wieɔ nɛɛ fɛɛ lɛ, Galileabii ni,+ aloo jeee nakai?  No hewɔ lɛ, te tɛŋŋ ni wɔteŋ mɔ fɛɛ mɔ nuɔ lɛ diɛŋtsɛ emaŋ wiemɔ* nɛɛ?  Partiabii, kɛ Mediabii,+ kɛ Elambii,+ kɛ mɛi ni yɔɔ Mesopotamia, kɛ Yudea, kɛ Kapadokia, kɛ Ponto kɛ Asia+ kpokpaa lɛ nɔ, 10  kɛ Frigia kɛ Pamfilia, kɛ Ejipt kɛ Libia kpokpai ni bɛŋkɛ Kirene lɛ, kɛ gbɔi ni jɛ Roma, Yudafoi kɛ mɛi ni etsɔmɔ Yudafoi fɛɛ,+ 11  kɛ Kretabii, kɛ Arabiabii—wɔmiinu ni amɛmiiwie Nyɔŋmɔ nibii wuji lɛ ahe yɛ wɔwiemɔi amli.” 12  Hɛɛ, amɛ fɛɛ amɛnaa kpɛ amɛhe ni amɛhiɛ fee amɛ yaa ni amɛkɛɛkɛɛ amɛhe akɛ: “Te enɛ shishi lɛ?” 13  Shi mɛi krokomɛi ye amɛhe fɛo ni amɛbɔi kɛɛmɔ akɛ: “Wain dɔkɔdɔkɔ* ehã amɛtɔrɔ.” 14  Shi Petro kɛ Mɛi Nyɔŋma Kɛ Ekome+ lɛ te shi amɛdamɔ shi ni ekɛ gbee ni wa wie etsɔɔ amɛ ekɛɛ: “Yudea hii kɛ nyɛ mɛi fɛɛ ni yɔɔ Yerusalem, nyɛnáa nyɛlea enɛ, ni nyɛboa miwiemɔi lɛ toi jogbaŋŋ. 15  Anɔkwa, mɛi nɛɛ tɔrɔko dãa, tamɔ bɔ ni nyɛsusuɔ lɛ, ejaakɛ ŋmɛlɛtswaa ni ji etɛ yɛ gbi lɛ mli nɛ.* 16  Shi moŋ enɛ ji nɔ ni atsɔ gbalɔ Yoel nɔ awie lɛ akɛ: 17  ‘Nyɔŋmɔ kɛɛ, “Ni yɛ naagbee gbii lɛ amli lɛ, mafɔse mimumɔ lɛ eko mashwie heloo srɔtoi fɛɛ nɔ, ni nyɛbihii kɛ nyɛbiyei lɛ baagba ni nyɛblahii lɛ baana ninai ni onukpai ni yɔɔ nyɛteŋ lɛ baala lamɔi,+ 18  ni mafɔse mimumɔ lɛ eko mashwie minyɔji hii kɛ minyɔji yei lɛ po anɔ yɛ nakai gbii lɛ amli, ni amɛbaagba.+ 19  Ni mahã naakpɛɛ nii aba ŋwɛi ni okadii hu aba shikpɔŋ lɛ nɔ—lá kɛ la kɛ lasu kpɔŋŋ. 20  Hulu lɛ baatsɔ duŋ ni nyɔɔŋtsere lɛ baatsɔ lá dani Yehowa* gbi wulu ni yɔɔ nyam lɛ baaba. 21  Ni mɔ fɛɛ mɔ ni boɔ tsɛɔ Yehowa* gbɛ́i lɛ, abaahere eyiwala.”’+ 22  “Israel hii, nyɛboa wiemɔi nɛɛ toi: Yesu, Nazaretnyo lɛ, eji nuu ni Nyɔŋmɔ jie lɛ kpo etsɔɔ nyɛ faŋŋ kɛtsɔ hewalɛ nitsumɔi kɛ naakpɛɛ nii, kɛ okadii ni Nyɔŋmɔ tsɔ enɔ efee yɛ nyɛteŋ lɛ anɔ,+ tamɔ bɔ ni nyɛ diɛŋtsɛ nyɛle lɛ. 23  Nuu nɛɛ, ni akɛ lɛ hã yɛ Nyɔŋmɔ suɔmɔnaa nii* kɛ Nyɔŋmɔ nii ni ele eto lɛ naa lɛ,+ nyɛtsɔ mɛi ni ji mlatɔlɔi lɛ anɔ nyɛkala lɛ nyɛkpɛtɛ tso jaŋŋ he ni nyɛgbe lɛ.+ 24  Shi Nyɔŋmɔ tee lɛ shi+ kɛtsɔ jiemɔ ni ejie lɛ kɛje gbele piŋmɔi* lɛ amli lɛ nɔ, ejaakɛ no nyɛŋ enaa atsĩ.+ 25  Ejaakɛ David wie yɛ ehe akɛ: ‘Mikɛ Yehowa* maa mihiɛ daa, ejaakɛ eyɛ mininejurɔ nɔ koni mikakpokpo kɔkɔɔkɔ. 26  Enɛ hewɔ lɛ, mitsui mii shɛ ehe ni mililɛi ná miishɛɛ babaoo. Ni mahi shi* yɛ hiɛnɔkamɔ mli; 27  ejaakɛ oshiŋ mi* yɛ Gbonyobu* lɛ mli, ni ohãŋ onɔkwafo lɛ ana fitemɔ.+ 28  Ohã mina wala gbɛi lɛ; obaahã miishɛɛ ayi mimli obɔ yɛ ohiɛ.’+ 29  “Ataamɛi, nyɛmimɛi, nyɛhãa mikɛ nɔmimaa awiea weku yitso David he matsɔa nyɛ, akɛ egbo ni afu lɛ,+ ni egbonyobu lɛ yɛ wɔteŋ kɛbashi ŋmɛnɛ. 30  Akɛni eji gbalɔ ni ele akɛ Nyɔŋmɔ ekã lɛ kitã akɛ ebaahã eseshibii lɛ ateŋ mɔ kome* ata emaŋtsɛ sɛi lɛ nɔ hewɔ lɛ,+ 31  etsɔ hiɛ ena Kristo lɛ shitee lɛ ni ewie he, akɛ ashiŋ lɛ yɛ Gbonyobu* lɛ mli ni eheloo enaŋ fitemɔ.+ 32  Nɛkɛ Yesu nɛɛ, Nyɔŋmɔ tee lɛ shi, ni wɔ fɛɛ wɔji enɛ he odasefoi.+ 33  No hewɔ lɛ, akɛni awó enɔ kɛtee Nyɔŋmɔ ninejurɔ nɔ+ ni ená mumɔ krɔŋkrɔŋ lɛ ni awo he shi lɛ kɛjɛ Tsɛ lɛ ŋɔɔ hewɔ lɛ,+ efɔse nɔ ni nyɛnaa ni nyɛnuɔ nɛɛ eshwie shi. 34  Ejaakɛ David ekwɔɔɔ kɛyaaa ŋwɛi, shi lɛ diɛŋtsɛ ekɛɛ akɛ, ‘Yehowa* kɛɛ mi-Nuŋtsɔ lɛ akɛ: “Ta mininejurɔ nɔ 35  kɛyashi be ni mikɛ ohenyɛlɔi lɛ baafee onajiashi sɛi.”’+ 36  No hewɔ lɛ, Israel shĩa lɛ fɛɛ aná ale lɛɛlɛŋ akɛ, nɛkɛ Yesu nɛɛ ni nyɛgbe lɛ yɛ tso jaŋŋ nɔ lɛ,+ Nyɔŋmɔ efee lɛ Nuŋtsɔ+ kɛ Kristo fɛɛ.” 37  Agbɛnɛ, be ni amɛnu enɛ lɛ, etsurɔ amɛtsuiiaŋ, ni amɛkɛɛ Petro kɛ bɔfoi ni eshwɛ lɛ akɛ: “Ataamɛi, nyɛmimɛi, mɛni esa akɛ wɔfee?” 38  Petro kɛɛ amɛ akɛ: “Nyɛtsakea nyɛtsui,+ ni nyɛhãa abaptisia nyɛteŋ mɔ fɛɛ mɔ+ yɛ Yesu Kristo gbɛ́i mli koni akɛ nyɛhe eshai lɛ ake nyɛ,+ ni nyɛbaaná dromɔ nikeenii ni ji mumɔ krɔŋkrɔŋ lɛ. 39  Ejaakɛ shiwoo+ lɛ yɛ kɛhã nyɛ kɛ nyɛbii, kɛ mɛi fɛɛ ni yɔɔ shɔŋŋ, mɛi fɛɛ ni Yehowa* wɔ-Nyɔŋmɔ lɛ baatsɛ amɛ kɛba eŋɔɔ lɛ.”+ 40  Ni ewie wiemɔi krokomɛi babaoo kɛye odase fitsofitso ni etee nɔ ewo amɛ hewalɛ ekɛɛ: “Nyɛhãa aherea nyɛ kɛjea yinɔ kɔɔdɔŋ nɛɛ mli.”+ 41  No hewɔ lɛ, abaptisi mɛi ni kɛ miishɛɛ mɔ ewiemɔ lɛ mli lɛ,+ ni nakai gbi lɛ nɔ lɛ aná mɛi* aaafee 3,000 afata amɛhe.+ 42  Ni amɛtee nɔ amɛhiɛ bɔfoi lɛ atsɔɔmɔ lɛ mli, ni amɛkɛ amɛhe bɔ naanyo,* ni amɛye nii,+ ni amɛkã sɔlemɔ he.+ 43  Anɔkwa, gbeyei bɔi mɔ fɛɛ mɔ* mɔmɔ, ni bɔfoi lɛ bɔi naakpɛɛ nii kɛ okadii babaoo feemɔ.+ 44  Mɛi ni he amɛye lɛ fɛɛ bua amɛhe naa kutuu ni amɛfee amɛnibii ni amɛyɔɔ lɛ fɛɛ ekome, 45  ni amɛhɔ̃ɔhɔ̃ɔ amɛshikpɔji+ kɛ amɛhe nibii, ni amɛjara nɔ ni amɛná kɛjɛ mli lɛ amɛhã mɛi lɛ fɛɛ, bɔ ni he hiaa mɔ fɛɛ mɔ.+ 46  Ni daa gbi lɛ amɛkɛ jwɛŋmɔ kome yaa sɔlemɔ shĩa lɛ, ni amɛyeɔ amɛniyenii yɛ shĩai srɔtoi amli ni amɛkɛ miishɛɛ babaoo kɛ tsui krɔŋŋ jaa amɛniyenii, 47  ni amɛjieɔ Nyɔŋmɔ yi ni amɛhiɛ baa nyam yɛ mɛi fɛɛ ahiɛ. Nakai be lɛ mli nɔŋŋ lɛ, Yehowa* kɛ mɛi ni aahere amɛyiwala lɛ fataa amɛhe daa gbi.+

Shishigbɛ Niŋmaa

Greek mli lɛ, Pentekoste shishi ji “Nyɔŋmai enumɔ nɔ.” Ayeɔ gbi jurɔ nɛɛ yɛ Nisan 16 sɛɛ gbi ni ji 50 lɛ nɔ.
Loo “lilɛii.”
Loo “nuɔ he ni afɔ lɛ yɛ lɛ wiemɔ.”
Loo “Wain hee.”
Ni ji, aaafee leebi ŋmɛlɛ 9.
Loo “Nyɔŋmɔ yiŋtoo.”
Shishitsɔɔmɔi komɛi kɛɔ akɛ, “gbele kpãi.”
Greek sht. ŋm., “miheloo baahi shi.”
Loo “misusuma.”
Greek mli lɛ, “Hedis,” ni ji, mfonirifeemɔŋ gbonyobu kome kɛhã adesai. Kwɛmɔ Wiemɔi Titrii Amligbalamɔ lɛ.
Greek sht. ŋm., “ehɛ mli yibii lɛ ateŋ mɔ kome.”
Greek mli lɛ, “Hedis,” ni ji, mfonirifeemɔŋ gbonyobu kome kɛhã adesai. Kwɛmɔ Wiemɔi Titrii Amligbalamɔ lɛ.
Loo “susumai.”
Loo “amɛná nibii ni amɛteŋ mɔ fɛɛ mɔ yɔɔ lɛ mli gbɛfaŋnɔ.”
Loo “susuma fɛɛ susuma.”