Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ NOVEMBER 2015

 SANEYITSO LƐ MLITSƆƆMƆ | MƐNI JI NYƆŊMƆ SUSUMƆ YƐ TA HE?

Nyɔŋmɔ Susumɔ yɛ Ta he yɛ Klɛŋklɛŋ Afii 100 lɛ Mli

Nyɔŋmɔ Susumɔ yɛ Ta he yɛ Klɛŋklɛŋ Afii 100 lɛ Mli

Aawa Yudafoi lɛ ayi. Yudafoi ni hi shi yɛ klɛŋklɛŋ afii 100 lɛ mli lɛ sɔle shii abɔ koni Nyɔŋmɔ akpɔ̃ amɛ kɛjɛ yiwaa ni Roma Nɔyeli lɛ kɛbaa amɛnɔ lɛ mli, taakɛ amɛblematsɛmɛi lɛ sɔle ni Nyɔŋmɔ akpɔ̃ amɛ kɛjɛ yiwaa mli lɛ. Kɛkɛ ni amɛnu Yesu he. Ani lɛ ji Mesia ni agba akɛ ebaaba lɛ he? Ebɛ naakpɛɛ mɔ akɛ mɛi babaoo ‘hiɛ kã nɔ akɛ nuu nɛɛ ji mɔ ni ato akɛ ebaakpɔ̃ Israel’ kɛjɛ yiwaa ni Romabii lɛ kɛbaa amɛnɔ lɛ mli lɛ. (Luka 24:21) Shi ebaaa lɛ nakai. Moŋ lɛ, yɛ afi 70 Ŋ.B. lɛ, Roma asraafoi lɛ bakpãtã Yerusalem maŋ lɛ kɛ sɔlemɔtsu lɛ hiɛ.

Mɛni ba? Mɛni hewɔ Nyɔŋmɔ wuuu ehãaa Yudafoi lɛ, taakɛ efee yɛ blema lɛ? Aloo mɛni hewɔ efãaa amɛ ni amɛwu ta kɛkpɔ̃ amɛhe kɛjɛ yiwaa shishi lɛ? Ani Nyɔŋmɔ etsake esusumɔ yɛ ta he? Dabi. Shi nɔ ko ni sa kadimɔ waa etsake yɛ Yudafoi lɛ ahe. Amɛkpoo Yesu, ni ji Nyɔŋmɔ Bi lɛ akɛ lɛ ji Mesia lɛ. (Bɔfoi 2:36) No hewɔ lɛ, akɛ maŋ lɛ, wekukpaa krɛdɛɛ ni yɔɔ amɛ kɛ Nyɔŋmɔ teŋ lɛ ŋmɛɛ amɛ.Mateo 23:37, 38.

Nyɔŋmɔ ebuuu Yudafoi lɛ amaŋ lɛ kɛ Shiwoo Shikpɔŋ lɛ he dɔŋŋ, asaŋ Yudafoi lɛ hu nyɛɛɛ akɛɛ akɛ Nyɔŋmɔ fiɔ amɛsɛɛ yɛ tai ni amɛwuɔ lɛ amli loo ekpɛlɛɔ nɔ. Taakɛ Yesu gba lɛ, Nyɔŋmɔ ejɔɔɔ Israel maŋ lɛ dɔŋŋ, moŋ lɛ maŋ hee, ni ji mumɔŋ maŋ ni sɛɛ mli lɛ Biblia lɛ tsɛ amɛ “Nyɔŋmɔ Israel” lɛ ji mɛi ni ejɔɔ. (Galatiabii 6:16; Mateo 21:43) Kristofoi ni akɛ mumɔ efɔ amɛ mu lɛ asafo lɛ ji mɛi ni batsɔ Nyɔŋmɔ mumɔŋ Israel lɛ. Akɛɛ mumɔŋ Israelbii lɛ yɛ klɛŋklɛŋ afii 100 lɛ mli akɛ: “Amrɔ nɛɛ, nyɛji Nyɔŋmɔ webii.”1 Petro 2:9, 10.

Akɛni klɛŋklɛŋ afii 100 lɛ mli Kristofoi lɛ batsɔmɔ “Nyɔŋmɔ webii” hewɔ lɛ, ani Nyɔŋmɔ wu ehã amɛ koni ekɛhã amɛye amɛhe kɛjɛ Romabii lɛ ayiwaa lɛ shishi? Agbɛnɛ hu lɛ, ani efã amɛ ni amɛwu ta amɛshi amɛhenyɛlɔi lɛ? Dabi, efeee nakai. Mɛni hewɔ? Yɛ tai ni Nyɔŋmɔ fã ni awu lɛ amli lɛ, Nyɔŋmɔ pɛ ji mɔ ni tsɔɔ be ni esa akɛ awu nakai tai lɛ, taakɛ wɔna yɛ sane ni tsɔ hiɛ lɛ mli lɛ. Nyɔŋmɔ wuuu tai ehãaa Kristofoi ni hi shi yɛ klɛŋklɛŋ afii 100 lɛ mli lɛ, ni asaŋ efãaa amɛ ni amɛwu tai hu. Eyɛ faŋŋ akɛ, Nyɔŋmɔ enaaa klɛŋklɛŋ afii 100 lɛ akɛ eji be ni esa akɛ ewu eshi yiwalɛ kɛ awuiyeli.

No hewɔ lɛ, taakɛ ebalɛ yɛ Nyɔŋmɔ tsuji ni hi shi yɛ blema lɛ agbɛfaŋ lɛ, ehe bahia ni Kristofoi ni hi shi yɛ klɛŋklɛŋ afii 100 lɛ mli lɛ hu amɛ kɛyashi be ni Nyɔŋmɔ eto ni ekɛbaafo yiwalɛ kɛ awuiyeli sɛɛ lɛ ashɛ. Shi dani nakai be lɛ baashɛ lɛ, Nyɔŋmɔ fãaa amɛ ni amɛ diɛŋtsɛ amɛyawu amɛshi amɛhenyɛlɔi lɛ. Yesu Kristo hã enɛ fee faŋŋ be ni etsɔɔ nii lɛ. Akɛ nɔkwɛmɔnɔ lɛ, ekɛɛɛ esɛɛnyiɛlɔi lɛ ni amɛwu ta, moŋ lɛ ekɛɛ amɛ akɛ: “Nyɛyaa nɔ nyɛsumɔa nyɛhenyɛlɔi ni nyɛsɔlea nyɛhãa mɛi ni waa nyɛ yi lɛ.” (Mateo 5:44) Be ni Yesu kɛ gbalɛ ni kɔɔ be ni Roma asraafoi lɛ kɛbaatutua Yerusalem lɛ he lɛ hãa lɛ, ekɛɛɛ ekaselɔi lɛ ni amɛhi shi ni amɛkɛ amɛhe awo ta lɛ mli, moŋ lɛ ekɛɛ amɛ ni amɛjo foi kɛshi maŋ lɛ mli—ni amɛfee nakai hu.Luka 21:20, 21.

Kɛfata he lɛ, akɛ mumɔ tsirɛ bɔfo Paulo ni eŋma akɛ: “Nyɛkatɔa nyɛ diɛŋtsɛ nyɛhe owele, . . . ejaakɛ aŋma akɛ: ‘Minɔ ji oweletɔɔ lɛ; mi mato najiaŋ,’ Yehowa kɛɛ.” (Romabii 12:19) No mli lɛ Paulo miitsɛ wiemɔi ni Nyɔŋmɔ wie afii ohai komɛi ni eho ni  aŋma yɛ 3 Mose 19:18 kɛ 5 Mose 32:35 lɛ yisɛɛ. Taakɛ wɔna yɛ sane ni tsɔ hiɛ lɛ mli lɛ, gbɛ kome ni Nyɔŋmɔ tsɔ nɔ etɔ ewebii lɛ ahe owele yɛ blema ji, eye ebua amɛ ni amɛwu amɛshi amɛhenyɛlɔi lɛ. Enɛ hewɔ lɛ, Paulo wiemɔi lɛ tsɔɔ akɛ, Nyɔŋmɔ susumɔ yɛ ta he lɛ tsakeko. Yɛ klɛŋklɛŋ afii 100 lɛ mli hu lɛ, Nyɔŋmɔ na akɛ ebaanyɛ etsɔ ta nɔ etɔ ewebii lɛ ahe owele, ní ekɛfo yiwaa kɛ awuiyeli fɛɛ sɛɛ. Shi taakɛ eji yɛ blema lɛ, Nyɔŋmɔ pɛ ji mɔ ni tsɔɔ be ni esa akɛ awu ta ni tamɔ nakai kɛ ni esa akɛ ekɛ ehe awo mli.

Eyɛ faŋŋ akɛ, Nyɔŋmɔ fãaa Kristofoi ni hi shi yɛ klɛŋklɛŋ afii 100 lɛ mli lɛ akɛ amɛwu ta. Ni ŋmɛnɛ hu? Ani Nyɔŋmɔ efã kuu ko ni amɛkɛ amɛhe awo ta mli? Aloo amrɔ nɛɛ ji be ni Nyɔŋmɔ baawuu ta ehã ewebii lɛ? Te Nyɔŋmɔ naa ta ehãa tɛŋŋ ŋmɛnɛ? Sane ni nyiɛ sɛɛ lɛ baahã nakai sanebimɔi lɛ ahetoo.