Saji ni Mɛi ni Kaneɔ lɛ Biɔ

Ani Shikpɔŋ Lɛ Baaya Nɔ Ahi Shi?

Oshara ko oshara ko kpataŋ wɔ-Shikpɔŋ lɛ hiɛ. Mɛni hewɔ wɔbaanyɛ wɔná nɔmimaa yɛ enɛ he? Ejaakɛ Nyɔŋmɔ ewo shi akɛ shikpɔŋ lɛ ‘hosoŋ gbi ko gbi ko,’ loo ebaahi shi kɛya naanɔ. (Lala 104:5) Biblia lɛ kɛɔ akɛ: “Yinɔ hoɔ yaa, ni yinɔ baa; shi shikpɔŋ lɛ ema shi kɛmiiya naanɔ.”—Jajelɔ 1:4.

Hebri wiemɔi enyɔ—ni ji ʽoh·lamʹ kɛ ʽadh ni Ga Biblia lɛ tsɔɔ fɛɛ shishi yɛ Lala 104:5 akɛ “gbi ko gbi ko” lɛ maa nɔ mi akɛ shikpɔŋ lɛ baahi shi kɛya naanɔ. Abaanyɛ atsɔɔ ʽOh·lamʹ shishi akɛ “afii babaoo” loo “daa.” Taakɛ Students’ Hebrew and Chaldee Dictionary ni Harkavy ŋma lɛ tsɔɔ lɛ, ʽadh shishi ji “bei abɔ, bɛ naagbee, sɛɛ efooo, kɛmiiya naanɔ.” Hebri wiemɔi enyɔ nɛɛ maa nɔ aduatsɔ akɛ, bɔ fɛɛ bɔ ni fee lɛ shikpɔŋ lɛ baahi shi kɛya naanɔ. Ha wɔsusu yiŋtoi etɛ krokomɛi ni yɔɔ Biblia lɛ mli ni baaha ohe oye akɛ shikpɔŋ lɛ baahi shi kɛya naanɔ lɛ ahe wɔkwɛ.

Klɛŋklɛŋ lɛ, Nyɔŋmɔ bɔ shikpɔŋ lɛ ni adesai ahi nɔ—ní shikpɔŋ muu lɛ fɛɛ atsɔ paradeiso fɛfɛo ni mli yɔɔ miishɛɛ, shi jeee ni etsɔ ŋa kpataa ni mɔ ko mɔ ko bɛ nɔ. Yesaia 45:18 lɛ kɛɔ akɛ Yehowa ji “mɔ ni bɔ ŋwɛi lɛ, Nyɔŋmɔ, mɔ ni shɔ̃ shikpɔŋ lɛ ni efee ni ekɛma shi, ni ebɔɔɔ lɛ efolo, shi eshɔ̃ lɛ ni ahi nɔ.”

Nɔ ni ji enyɔ lɛ, Nyɔŋmɔ ewo shi akɛ adesai ni halaa akɛ amɛaabo lɛ toi lɛ baahi shi yɛ toiŋjɔlɛ mli yɛ shikpɔŋ lɛ nɔ kɛya naanɔ. Mika 4:4 lɛ kɛɔ akɛ: “Mɔ fɛɛ mɔ aaatá eweintso kɛ egbamitso shishi, ni mɔ ko woŋ amɛhe gbeyei; ejaakɛ Yehowa Zebaot naabu wie.” No hewɔ lɛ, eji Nyɔŋmɔ yiŋtoo akɛ shikpɔŋ lɛ aya nɔ afee adesai ashĩa kɛya naanɔ, kɛ jeee nakai lɛ, eshiwoi lɛ baafee yaka.—Lala 119:90; Yesaia 55:11; 1 Yohane 2:17.

Nɔ ni ji etɛ lɛ, Nyɔŋmɔ kɛ shikpɔŋ lɛ ewo adesai akwɛmɔ shishi. Nyɔŋmɔ Wiemɔ lɛ kɛɔ akɛ: “Ŋwɛi lɛ Yehowa ŋwɛi ni, shi shikpɔŋ lɛ eŋɔha gbɔmɛi abii.” (Lala 115:16) Ani osusuɔ akɛ tsɛ ko ni yɔɔ suɔmɔ lɛ baake ebi nɔ ko fɛfɛo ni sɛɛ mli lɛ, lɛ nɔŋŋ efite nikeenii nɛɛ? Dabi kwraa! Nakai nɔŋŋ hu Yehowa kpataŋ shikpɔŋ lɛ kɛ gbɔmɛi ni yɔɔ nɔ lɛ ahiɛ, ejaakɛ “Nyɔŋmɔ lɛ, suɔmɔ ji lɛ.”—1 Yohane 4:8.

Yesu Kristo kɛ wiemɔ nɛɛ ni tsɔɔ akɛ esa akɛ wɔná hekɛnɔfɔɔ yɛ e-Tsɛ lɛ wiemɔi amli lɛ ha akɛ: “Owiemɔ lɛ anɔkwaleŋ.” (Yohane 17:17) Ni Nyɔŋmɔ ni maleee lɛ ewo shi akɛ: “Jalɔi lɛ, shikpɔŋ lɛ aaatsɔ amɛnɔ̃ ni amɛaahi nɔ daa.”—Lala 37:29; Tito 1:2.

[He ni Mfoniri ni yɔɔ baafa 31 lɛ Jɛ]

Shikpɔŋ: Based on NASA photo