Sanebimɔi ni Jɛ Kanelɔi Adɛŋ

Ani onufu lɛ ni kɛ Hawa wie lɛ yɛ naji?

Taakɛ aŋma yɛ 1 Mose 3:14 lɛ, Yehowa Nyɔŋmɔ kɛ onufu lɛ ni laka Hawa yɛ Eden abɔɔ lɛ mli lɛ wie. Nyɔŋmɔ kɛɛ lɛ akɛ: “Akɛni ofee enɛ hewɔ lɛ, alomɔo yɛ shĩa kooloi fɛɛ kɛ ŋa nɔ kooloi fɛɛ ateŋ; omũsũ nɔ ooonyiɛ, ni sũ oooye owala gbii abɔ fɛɛ.” Biblia lɛ ewieee diɛŋtsɛ akɛ no mli lɛ onufu ni atsɔ enɔ alaka Hawa lɛ yɛ naji. Eyɛ mli akɛ sane ni yɔɔ 1 Mose 3:14 lɛ baanyɛ aha mɛi komɛi anu he akɛ nakai sane lɛ ji moŋ, shi esaaa akɛ no haa wɔmuɔ sane naa akɛ dani abaalomɔ nakai onufu lɛ, no mli lɛ onufui yɛ naji. Mɛni hewɔ?

Nɔ̃ titri hewɔ ni esaaa akɛ wɔfeɔ nakai ji akɛ, mɔ pɔtɛɛ ni no mli lɛ Yehowa buɔ lɛ fɔ́ lɛ ji Satan ni ji mumɔ bɔɔnɔ ni anaaa lɛ ní kɛ kooloo ni baa shi lɛ tsu nii yɛ gbɛ fɔŋ nɔ lɛ. Biblia lɛ tsɛ́ɔ Satan akɛ “malemɔ tsɛ” kɛ “blema onufu.” Gbɛi enyɔ nɛɛ fɛɛ gbalaa jwɛŋmɔ kɛyaa Satan nifeemɔ ni ji onufu ni ekɛtsu nii akɛ enaawielɔ ni ekɛlaka Hawa ni etse Nyɔŋmɔ hiɛ atũa lɛ nɔ.—Yohane 8:44; Kpojiemɔ 20:2.

Nyɔŋmɔ bɔ onufui, ni ŋwanejee ko bɛ he akɛ Adam wo kooloi nɛɛ agbɛi dani Satan shishiumɔ nifeemɔ nɛɛ tee nɔ. Esaaa akɛ ashwa onufu ni bɛ nilee ní kɛ Hawa wie lɛ. Eleee akɛ Satan kɛ lɛ miitsu nii, ni asaŋ enuuu fɔbuu kojomɔ ni Nyɔŋmɔ kɛba atuatselɔi lɛ anɔ lɛ shishi.

Kɛ́ nakai ni lɛ, mɛni ha Nyɔŋmɔ ba onufu lɛ shi mɔ? Bɔ ni onufu nyiɛɔ emusu nɔ ní kɛfee lɛ ekpãa elilɛi mli oookɛɛ eetao elɛmɔ sũ lɛ feɔ shihilɛ ni baa shi ni Satan yɔɔ mli lɛ he mfoniri ni sa jogbaŋŋ. Kulɛ eyɛ hegbɛ ni nɔ kwɔ yɛ Nyɔŋmɔ ŋwɛibɔfoi lɛ ateŋ, shi ashɔ̃ nakai hegbɛ lɛ yɛ edɛŋ ni aba lɛ shi awo shihilɛ ko ni Biblia lɛ tsɛ́ɔ lɛ Tartarus mli.—2 Petro 2:4.

Kɛfata he lɛ, taakɛ bɔ ni onufu kɔ̃ɔ mɔ nanetsitsi kɛyeɔ lɛ awui lɛ, nakai nɔŋŋ Satan ni aba lɛ shi lɛ ‘baatswa’ Nyɔŋmɔ ‘seshi’ lɛ ‘nanetsitsi nɔ̃.’ (1 Mose 3:15) Yesu Kristo ni ji mɔ titri ni nakai seshi lɛ kɔɔ ehe lɛ na amanehulu be kukuoo yɛ Satan tsuji adɛŋ. Shi yɛ be ni sa mli lɛ, Kristo kɛ enanemɛi Kristofoi ni afɔ amɛ mu ni atée amɛ shi lɛ baatswa onufu ni damɔ shi kɛha Satan lɛ yitso nɔ ni amɛkɛjie lɛ kɛjɛ shihilɛ mli kwraa. (Romabii 16:20) No hewɔ lɛ, onufu lɛ ni Nyɔŋmɔ lomɔ lɛ lɛ feɔ shi ni aba “blema onufu” ni ji Satan Abonsam ni anaaa lɛ lɛ kɛ ehiɛ ni abaakpata kwraa lɛ he mfoniri ni sa.