Sanebimɔi ni Jɛ Kanelɔi Adɛŋ

Lala 102:27 lɛ kɛɔ akɛ shikpɔŋ kɛ ŋwɛi lɛ ‘hiɛ baakpata.’ Ani wiemɔ nɛɛ tsɔɔ akɛ abaakpata Shikpɔŋ ni ji shibɔlemɔ ŋulami lɛ hiɛ?

Lalatsɛ lɛ wie yɛ sɔlemɔ ni esɔle eha Yehowa lɛ mli akɛ: “Blema beebe oto shikpɔŋ lɛ shishi, ni ŋwɛi lɛ oniji anaa nitsumɔ ni. Amɛ lɛ amɛhiɛ baakpata, shi bo lɛ oyɛ daa: ni amɛ fɛɛ tswɛm amɛbaasuu tamɔ atade; oootsake amɛ tamɔ mama, ni amɛaatsake.” (Lala 102:26, 27) Ŋmalɛi kukuji nɛɛ amli saji lɛ tsɔɔ akɛ jeee shikpɔŋ lɛ hiɛkpatamɔ he ŋmalɛi nɛɛ wieɔ lɛ, shi moŋ amɛmiiwie naanɔ ni Nyɔŋmɔ hiɔ shi kɛyaa lɛ he. Emli saji lɛ hu tsɔɔ nɔ hewɔ ni nakai anɔkwale sane ni he hiaa lɛ shɛjeɔ Nyɔŋmɔ tsuji amii.

Lalatsɛ lɛ, ní ekolɛ no mli lɛ eyɔɔ nomŋɔɔ mli yɛ Babilon lɛ tsɔɔ amanehului ni enaa lɛ amli ni ekɛje elala lɛ shishi. Eye ŋkɔmɔ akɛ ewala miiho kɛmiiya “tamɔ lasu.” Eyeyeeyefeemɔ lɛ mli bawa waa, ni enɛ ha ewui lɛ ‘ahe dɔ tamɔ latɛ.’ Etɔ lɛ, ni ‘egbĩ tamɔ jwɛi,’ ni ehe fee shoo “tamɔ loofɔlɔ ni ekome too eyɔɔ tsũyiteŋ.” Kaai ni ekɛkpeɔ lɛ hãaa enyɛ nii eye, ni eye ŋkɔmɔ waa yɛ eshihilɛ mli. (Lala 102:4-12) Shi yɛ shihilɛ ni tamɔ nɛkɛ mli po lɛ, lalatsɛ lɛ hiɛnɔkamɔ fɛɛ etãko. Mɛni hewɔ? Yɛ nɔ ni Yehowa ewo shi akɛ ebaafee yɛ Zion loo Yerusalem he lɛ hewɔ.

Eyɛ mli akɛ akpata Zion hiɛ moŋ, shi Yehowa ewo shi akɛ abaasaa ama ekoŋŋ. (Yesaia 66:8) Enɛ hewɔ lɛ, lalatsɛ lɛ kɛ hekɛnɔfɔɔ kɛɛ Yehowa akɛ: ‘Ooona Zion mɔbɔ, ejaakɛ emɔbɔnalɛ be nɛ, be ni ato lɛ eshɛ. Ejaakɛ Yehowa aaasaa Zion ekoŋŋ.’ (Lala 102:14, 17) Lalatsɛ lɛ saa ewie emanehulu lɛ he ekoŋŋ. Etsɔɔ mli akɛ kɛji akɛ Nyɔŋmɔ baanyɛ atsɔ ehewalɛ lɛ nɔ esaa Yerusalem amaŋfɔfeemɔ lɛ ekoŋŋ lɛ, no lɛ ekã shi faŋŋ akɛ Yehowa baanyɛ ajie lɛ kɛjɛ shihilɛ ni yɔɔ mɔbɔ ni eyɔɔ mli lɛ mli. (Lala 102:18, 21, 24) Shi nɔ kroko hu tsirɛ lalatsɛ lɛ koni ekɛ ehe afɔ̃ Yehowa nɔ kwraa kɛmɔ shi. Mɛni ji nakai nɔ̃ lɛ? No ji anɔkwale ni eji akɛ Nyɔŋmɔ hiɔ shi kɛyaa naanɔ lɛ.

Esoro Yehowa naanɔ shihilɛ lɛ kwraa yɛ lalatsɛ lɛ diɛŋtsɛ wala ní sɛɛ kɛɛɛ kwraa lɛ he. Ekɛɛ Yehowa akɛ: “Bo lɛ ofii lɛ kã he kɛmiiya yinɔi fɛɛ nɔ.” (Lala 102:25) No sɛɛ lɛ lalatsɛ lɛ kɛɛ akɛ: “Blema beebe oto shikpɔŋ lɛ shishi, ni ŋwɛi lɛ oniji anaa nitsumɔ ni.”—Lala 102:26.

Ni kɛlɛ, anyɛŋ akɛ afii babaoo ni shikpɔŋ lɛ kɛ ŋwɛi lɛ eye lɛ ato Yehowa naanɔ shihilɛ lɛ he. Lalatsɛ lɛ kɛfata he akɛ: “Amɛ lɛ [shikpɔŋ lɛ kɛ ŋwɛi lɛ] amɛhiɛ baakpata, shi bo lɛ, oyɛ daa.” (Lala 102:27) Shikpɔŋ lɛ kɛ ŋwɛi lɛ diɛŋtsɛ hiɛ baanyɛ akpata. Eji anɔkwale akɛ Yehowa wie yɛ he kroko hu akɛ enɛɛmɛi baahi shi kɛya naanɔ. (Lala 119:90; Jajelɔ 1:4) Shi kɛji akɛ Nyɔŋmɔ miisumɔ lɛ, ebaanyɛ ekpata hiɛ. Ákɛ nɔ ni tamɔɔɔ enɛ lɛ, Nyɔŋmɔ nyɛŋ egbo. Nibii ni abɔ lɛ ‘mamɔ shi kɛmiiya naanɔ’ ejaakɛ Nyɔŋmɔ haa amɛfeɔ nakai. (Lala 148:6) Kɛji akɛ Yehowa eyaaa nɔ ehaaa nibii ni abɔ lɛ afee ehee lɛ, no lɛ “amɛ fɛɛ tswɛm amɛbaasuu tamɔ atade.” (Lala 102:27) Taakɛ bɔ ni mɔ ko hiɔ shi be kakadaŋŋ fe etadei lɛ, nakai nɔŋŋ Yehowa baanyɛ ahi shi be kakadaŋŋ fe ebɔɔ nii lɛ—kɛji akɛ eesumɔ. Shi kɛlɛ, wɔle yɛ ŋmalɛi krokomɛi amli akɛ enɛ jeee esuɔmɔnaa nii. Nyɔŋmɔ Wiemɔ lɛ maa nɔ mi ehaa wɔ akɛ Yehowa etswa efai shi akɛ ebaaha shikpɔŋ lɛ kɛ ŋwɛi lɛ diɛŋtsɛ ahi shi kɛya naanɔ.—Lala 104:5.

Eji nɔ ni shɛjeɔ mɔ mii akɛ aaale akɛ Yehowa baahi shi be fɛɛ be koni eha eshiwoi fɛɛ aba mli. Ekɔɔɔ he eko kaai srɔtoi ni wɔkɛaakpe lɛ, kɛji akɛ wɔbolɔ wɔtsɛ́ lɛ lɛ, wɔbaanyɛ wɔná nɔmimaa akɛ ‘ebaagbo etoi shi eha shitswialɔi lɛ asɔlemɔ lɛ, ni egbeee amɛsɔlemɔ lɛ he guɔ.’ (Lala 102:18) Hɛɛ, nɔmimaa ni Yehowa kɛhaa yɛ Lala 102 lɛ akɛ ebaafi wɔsɛɛ lɛ ma shi shiŋŋ fe shikpɔŋ ní wɔdamɔ nɔ lɛ po.