Tsɔɔmɔ bɔ ni obaasumɔ ni ona niŋmai lɛ oha

Halamɔ wiemɔ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

BUU-MƆƆ NO. 6 2016

 SANEYITSO LƐ MLITSƆƆMƆ | BƆ NI ŊWƐI YƆƆ HÃ LƐ HE NINAI KOMƐI

Sanebimɔi ni Kɔɔ Mɛi ni Yɔɔ Ŋwɛi lɛ Ahe

Sanebimɔi ni Kɔɔ Mɛi ni Yɔɔ Ŋwɛi lɛ Ahe

Ani obi ohe pɛŋ akɛ, te ŋwɛi yɔɔ hã tɛŋŋ, ni namɛi yɔɔ jɛmɛ lɛ? Kɛ́ nakai lɛ, jeee bo pɛ obi saji ni tamɔ nɛkɛ. Mɛi etee nɔ esusu sane nɛɛ he yɛ afii babaoo ni eho lɛ amli. Mɛi komɛi heɔ yeɔ akɛ, wɔblematsɛmɛi ni egboi ni esa akɛ awo amɛhiɛ nyam lɛ ji mɛi ni yɔɔ mumɔi aje lɛ mli lɛ. Mɛi komɛi hu susuɔ akɛ eji he ko ni toiŋjɔlɛ babaoo yɔɔ, ni ŋwɛi bɔfoi kɛ gbɔmɛi kpakpai ni egboi lɛ yɔɔ jɛmɛ. Mɛi komɛi hu naa mumɔi ashihilɛhe lɛ akɛ eji he ko ni nyɔŋmɔi akpei ohai abɔ yɔɔ jɛmɛ.

Mɛi babaoo kɛɔ akɛ wɔnyɛŋ wɔle bɔ ni ŋwɛi yɔɔ hã, ejaakɛ mɔ ko ejɛko jɛmɛ ebagbako wɔ bɔ ni jɛmɛ yɔɔ. Shi susumɔ ni tamɔ nɛkɛ lɛ ejaaa. Yesu Kristo hi ŋwɛi, akɛ mumɔ bɔɔ nɔ, dani eba shikpɔŋ lɛ nɔ. Ekɛɛ klɛŋklɛŋ afii 100 lɛ mli jamɔ mli hiɛnyiɛlɔi lɛ yɛ faŋŋ mli akɛ: “Mikpeleke shi kɛjɛ ŋwɛi kɛba koni mibafee mɔ ni tsu mi lɛ suɔmɔnaa nii, shi jeee mi diɛŋtsɛ misuɔmɔnaa nii.” No hewɔ lɛ, be ni Yesu kɛɛ ebɔfoi lɛ akɛ, “Shihilɛhei pii yɛ mi-Tsɛ we lɛ,” no mli lɛ eewie nɔ ni lɛ diɛŋtsɛ ena yɛ ŋwɛi lɛ he.Yohane 6:38; 14:2.

Yesu Tsɛ ji Nyɔŋmɔ, mɔ ni gbɛ́i ji Yehowa lɛ, ni Yehowa lɛ, ŋwɛi ‘eshihilɛhe’ yɔɔ. (Lala 83:19) No hewɔ lɛ, mɔ ko nyɛŋ atsɔɔ bɔ ni ŋwɛi yɔɔ hã lɛ mli jogbaŋŋ fe Yehowa Nyɔŋmɔ kɛ Yesu Kristo. Amɛtsɔ ninai ni amɛjie kpo amɛtsɔɔ anɔkwafoi komɛi lɛ anɔ amɛhã ale nibii babaoo ni yɔɔ ŋwɛi.

Sane ni abaasusu he kɛnyiɛ sɛɛ lɛ baawie ninai komɛi ni Biblia lɛ ewie he ni hii komɛi na. Be ni wɔsusuɔ ninai nɛɛ ahe lɛ, hã ehi ojwɛŋmɔ mli akɛ, jeee heloonaa nibii ni abaanyɛ ata he loo akɛ hiŋmɛi diɛŋtsɛ ana ji nɔ ni yɔɔ ŋwɛi. No hewɔ lɛ, yɛ nɔ najiaŋ ni Nyɔŋmɔ kɛ nibii ni mumɔŋ bɔɔ nii pɛ baanyɛ anu shishi baatsu nii kɛgbala nii amli ehã wɔ lɛ, ejie ninai ni kɔɔ bɔ ni ŋwɛi yɔɔ hã lɛ kpo bɔ ni wɔbaanyɛ wɔnu shishi. Ninai nɛɛ baaye abua bo ni wɔle mɛi ni yɔɔ “shihilɛhei pii” ni yɔɔ ŋwɛi lɛ ahe saji babaoo.