Shi kɛya he ni ato saneyitsei lɛ anaa yɛ lɛ

Shi kɛya saneyitsei bibii lɛ anɔ

Shi kɛya he ni ato saneyitsei lɛ anaa yɛ lɛ

Yehowa Odasefoi

Ga

Buu-Mɔɔ  |  No. 6 2016

 SANEYITSO LƐ MLITSƆƆMƆ | BƆ NI ŊWƐI YƆƆ HÃ LƐ HE NINAI KOMƐI

Ninai ni Kɔɔ Mɛi ni Yɔɔ Ŋwɛi lɛ Ahe

Ninai ni Kɔɔ Mɛi ni Yɔɔ Ŋwɛi lɛ Ahe

Biblia lɛ wieɔ ninai komɛi ni yɔɔ miishɛɛ ni hãa wɔnaa nibii ni yaa nɔ yɛ ŋwɛi lɛ he. Wɔmiifɔ̃ bo nine ni osusu ekomɛi ahe okwɛ. Eyɛ mli akɛ esaaa akɛ wɔnuɔ nibii ni awie he yɛ ninai lɛ amli lɛ shishi yɛ bɔ ni atsɔɔ mli ahã lɛ naa diɛŋtsɛ moŋ, shi nakai ninai lɛ baanyɛ aye abua wɔ ni wɔfee bɔ ni mɛi ni yɔɔ ŋwɛi lɛ ji hã lɛ he mfoniri, ni ebaaye ebua ni wɔna bɔ ni amɛbaanyɛ amɛná wɔnɔ hewalɛ hu.

YEHOWA JI OFE

“Maŋtsɛ sɛi ko ma shi yɛ ŋwɛi, ni mɔ ko ta maŋtsɛ sɛi lɛ nɔ. Ni mɔ ni ta nɔ lɛ, kɛ́ aakwɛ lɛ lɛ, etamɔ yaspi tɛ kɛ sardio tɛ, ni kwaabuɛtɛ ni tamɔ smaragdo tɛ bɔle maŋtsɛ sɛi lɛ he fɛɛ kɛkpe.”Kpojiemɔ 4:2, 3.

“Ni kpɛmɔ ebɔle lɛ kɛkpe. Bɔ ni kwaabuɛtɛ ní yɔɔ atatu mli yɛ nyɔŋmɔnɛmɔ gbi nɔ lɛ su yɔɔ lɛ, nakai kpɛmɔ ní bɔle lɛ kɛkpe lɛ yɔɔ. Enɛ ji Yehowa anunyam lɛ kpɛmɔ lɛ kpojiemɔ.”Ezekiel 1:27, 28.

Ninai nɛɛ, ni ajie kpo atsɔɔ bɔfo Yohane kɛ gbalɔ Ezekiel lɛ kɛ nibii ni wɔbaanyɛ wɔfee he mfoniri tsɔɔ bɔ ni Yehowa, ni ji Ŋwɛi flooflo Nyɔŋmɔ lɛ anunyam lɛ yɔɔ hã lɛ mli—ojarawa tɛi, kwaabuɛtɛ, kɛ maŋtsɛ sɛi. Amɛhãa wɔnaa akɛ, anunyam, fɛo, agbojee, kɛ krɔŋkrɔŋ ebole Yehowa kɛkpe.

Bɔ ni atsɔɔ Nyɔŋmɔ anunyam lɛ mli ahã yɛ ninai nɛɛ amli lɛ kɛ nɔ ni lalatsɛ lɛ ŋma lɛ kpãa gbee akɛ: “Yehowa da ni esa yijiemɔ babaoo; ehe yɛ gbeyei fe nyɔŋmɔi lɛ fiaa. Ejaakɛ maji lɛ fɛɛ anyɔŋmɔi lɛ yakayaka wɔji ni, shi Yehowa lɛ, lɛ efee ŋwɛi. Woo kɛ agbojee yɛ ehiɛ, hewalɛ kɛ hefɛo yɛ ehekrɔŋkrɔŋ lɛ.”Lala 96:4-6.

Eyɛ mli akɛ Yehowa ji Ofe moŋ, shi efɔ̃ɔ wɔ nine ni wɔtsi wɔbɛŋkɛ lɛ yɛ sɔlemɔ mli, ni ehãa wɔleɔ akɛ eboɔ wɔ toi. (Lala 65:3) Nyɔŋmɔ sumɔɔ wɔ ni esusuɔ wɔhe aahu akɛ, bɔfo Yohane ŋma akɛ: “Nyɔŋmɔ lɛ, suɔmɔ ji lɛ.”1 Yohane 4:8.

YESU KƐ NYƆŊMƆ YƆƆ

“[Kristo kaselɔ Stefano lɛ], akɛni mumɔ krɔŋkrɔŋ eyi lɛ obɔ hewɔ lɛ, ekwɛ ŋwɛi gãa ni ehiŋmɛi gba Nyɔŋmɔ anunyam lɛ kɛ Yesu hu nɔ ní edamɔ Nyɔŋmɔ ninejurɔ nɔ, ni ekɛɛ: ‘Naa! miina ni agbele ŋwɛi naa ni gbɔmɔ Bi lɛ damɔ Nyɔŋmɔ ninejurɔ nɔ.’”Bɔfoi 7:55, 56.

Dani Stefano baana ninaa nɛɛ, no mli lɛ mɛi ni ekɛwieɔ lɛ—ni ji Yudafoi ajamɔŋ hiɛnyiɛlɔi lɛ—egbe Yesu momo. Ninaa lɛ hã ana faŋŋ akɛ Yesu hiɛ kã, ni akɛ, atee lɛ shi, ni awo ehiɛ nyam. Bɔfo Paulo wie kɛkɔ sane nɛɛ he akɛ: ‘Yehowa tee Yesu shi kɛjɛ gbohii ateŋ, ni ekɛ lɛ ta eninejurɔ nɔ yɛ ŋwɛiniiaŋ, ni ehã enɔ kwɔ kwraa fe nɔyeli fɛɛ nɔyeli, kɛ hegbɛ fɛɛ hegbɛ, kɛ hewalɛ fɛɛ hewalɛ, kɛ  onukpayeli fɛɛ onukpayeli, kɛ gbɛ́i fɛɛ gbɛ́i ni awo, jeee yɛ shihilɛ gbɛjianɔtoo nɛɛ mli kɛkɛ, shi moŋ yɛ nɔ ni baaba lɛ hu mli.’Efesobii 1:20, 21.

Ŋmalɛi lɛ wieɔ gbɛhe ni nɔ kwɔ ni Yesu yɔɔ lɛ he, ni ehãa wɔleɔ hu akɛ, Yesu susuɔ adesai ahe waa, tamɔ Yehowa feɔ lɛ. Be ni Yesu tsuɔ esɔɔmɔ nitsumɔ lɛ yɛ shikpɔŋ lɛ nɔ lɛ, etsa helai, etsa mɛi ni ekumɔ, ni etee gbohii ashi. Yesu tsɔ efɔleshaa gbele lɛ nɔ ehã ana suɔmɔ ni mli kwɔ ni eyɔɔ kɛhã Nyɔŋmɔ kɛ adesai lɛ. (Efesobii 2:4, 5) Akɛni amrɔ nɛɛ Yesu damɔ Nyɔŋmɔ ninejurɔ nɔ hewɔ lɛ, etsɛŋ ekɛ ehewalɛ lɛ baatsu nii kɛjɔɔ adesai ni yɔɔ he fɛɛ he ni feɔ toiboo lɛ babaoo.

ŊWƐI BƆFOI LƐ SƆMƆƆ NYƆŊMƆ

“[Mi gbalɔ Daniel] mihiɛ kwɛmɔ aahu kɛyashi beyinɔ ní akɛ maŋtsɛ sɛii bamamɔ shi, ni mɔ ni eye gbii pii lɛ [Yehowa] ho tá shi. . . . Mɛi akpei akpe sɔmɔɔ lɛ, ni mɛi akpei nyɔŋma nyɔŋma toi akpei nyɔŋma damɔ ehiɛ.”Daniel 7:9, 10.

Yɛ ninaa nɛɛ mli lɛ, jeee ŋwɛi bɔfo kome pɛ Daniel na, shi moŋ ena ŋwɛi bɔfoi babaoo. Mɛɛ ninaa ni sa kadimɔ po nɛ! Ŋwɛi bɔfoi ji mumɔŋ bɔɔ nii ni hiɛ yɔɔ nyam, ni le nii waa, ni he wa waa hu. Ayɛ ŋwɛi bɔfoi ni atsɛɔ amɛ serafim kɛ ekomɛi hu ni atsɛɔ amɛ kerubim. Biblia lɛ tsĩ ŋwɛi bɔfoi atã nɔ ni fe shii 250.

Ŋwɛi bɔfoi jeee adesai ni ehi shi yɛ shikpɔŋ lɛ nɔ pɛŋ. Nyɔŋmɔ bɔ bɔfoi lɛ kwraa dani ebɔ gbɔmɛi. Ŋwɛi bɔfoi lɛ na be ni Nyɔŋmɔ bɔ shikpɔŋ lɛ, ni amɛbɔ oshe.Hiob 38:4-7.

Gbɛ kome ni ŋwɛi bɔfoi anɔkwafoi lɛ tsɔɔ nɔ amɛsɔmɔɔ Nyɔŋmɔ ji akɛ, amɛkɛ amɛhe woɔ nitsumɔ ni he hiaa fe fɛɛ ni atsuɔ yɛ shikpɔŋ lɛ nɔ ŋmɛnɛ—ni ji Nyɔŋmɔ Maŋtsɛyeli lɛ he sanekpakpa lɛ shiɛmɔ lɛ mli. (Mateo 24:14) Ajie bɔ ni amɛkɛ amɛhe woɔ nitsumɔ nɛɛ mli lɛ he ninaa ko kpo atsɔɔ bɔfo Yohane, ni eŋma akɛ: “Mina ŋwɛibɔfo kroko miifiliki yɛ ŋwɛi teŋ, ni ehiɛ naanɔ sane kpakpa ní eyaajaje etsɔɔ mɛi ni yɔɔ shikpɔŋ lɛ nɔ lɛ, kɛ jeŋmaŋ fɛɛ jeŋmaŋ kɛ weku fɛɛ weku, kɛ wiemɔ fɛɛ wiemɔ, kɛ gbɔmɛi srɔtoi fɛɛ.” (Kpojiemɔ 14:6) Eyɛ mli akɛ ŋmɛnɛ lɛ, ŋwɛi bɔfoi lɛ kɛ mɛi ewieee taakɛ amɛkɛ mɛi komɛi wie yɛ be ni eho lɛ mli moŋ, shi amɛkudɔɔ mɛi ni shiɛɔ sane kpakpa lɛ kɛyaa mɛi ni hiɛ tsui kpakpa lɛ aŋɔɔ.

 SATAN LAKAA MƐI AKPEKPEI ABƆ

“Ta te shi yɛ ŋwɛi: Mikael [Yesu Kristo] kɛ ebɔfoi lɛ fã drako lɛ nɔ ta, ni drako lɛ kɛ ebɔfoi lɛ kɛ amɛ wu shi amɛnyɛɛɛ, asaŋ amɛnáaa gbɛ dɔŋŋ yɛ ŋwɛi. No hewɔ lɛ, ashɛ drako kpeteŋkpele lɛ afɔ̃, blema onufu lɛ, ní atsɛɔ lɛ Abonsam kɛ Satan lɛ, mɔ ni lakaa shikpɔŋ muu lɛ fɛɛ lɛ; ashɛ lɛ afɔ̃ shikpɔŋ, ni ashɛrɛ ebɔfoi lɛ hu ashwie afata ehe.”Kpojiemɔ 12:7-9.

Jeee be fɛɛ be toiŋjɔlɛ ehi ŋwɛi. Be ni abɔ adesai nɔŋŋ lɛ, ŋwɛi bɔfoi lɛ ateŋ mɔ kome ni ná shwelɛ lɛ akɛ aja lɛ lɛ tse Yehowa hiɛ atua, ni no hã ebatsɔ Satan, ni eshishi ji “Shiteekɛwolɔ.” Sɛɛ mli lɛ, ŋwɛi bɔfoi krokomɛi hu yafata atuatsemɔ lɛ he, ni amɛbatsɔmɔ daimonioi. Akɛni efɔŋ eyi amɛ obɔ hewɔ lɛ, amɛteɔ shi amɛwoɔ Yehowa, ni amɛhã mɛi babaoo ekɔ gbɛ ni kɛ Yehowa gbɛtsɔɔmɔ ni suɔmɔ yɔɔ mli lɛ kpãaa gbee.

Satan kɛ edaimonioi lɛ feɔ efɔŋ, ni amɛyitseiaŋ wala. Amɛji adesai ahenyɛlɔi, ni amɛ amɛhã piŋmɔ eyi shikpɔŋ lɛ nɔ fɛɛ lɛ. Akɛ nɔkwɛmɔ lɛ, Satan gbe nuu anɔkwafo Hiob kooloi kɛ etsuji. No sɛɛ lɛ, egbe bii nyɔŋma ni Hiob yɔɔ lɛ fɛɛ kɛtsɔ “ahum kpele” ko ni ehã etswa kɛkumɔ shĩa ni amɛyɔɔ mli lɛ nɔ. Enɛɛmɛi asɛɛ lɛ, Satan hã “asanei ní jaraa tsɛ̃rɛ̃ Hiob kɛjɛ enaneshi aahu kɛyashi eyiteŋ pampam.”Hiob 1:7-19; 2:7.

Shi etsɛŋ kwraa, abaakpãtã Satan hiɛ. Kɛjɛ be ni ashwie lɛ kɛjɛ ŋwɛi kɛba shikpɔŋ nɛɛ, ele akɛ “be fioo kɛkɛ eyɔɔ.” (Kpojiemɔ 12:12) Abaakpãtã Satan hiɛ, ni ekashi faŋŋ akɛ enɛ ji sane kpakpa!

MƐI NI JƐ SHIKPƆŊ LƐ NƆ

“[Bo Yesu,] okɛ olá lɛ hé mɛi ohã Nyɔŋmɔ kɛjɛ weku fɛɛ weku kɛ wiemɔ fɛɛ wiemɔ kɛ gbɔmɛi srɔtoi fɛɛ kɛ jeŋmaŋ fɛɛ jeŋmaŋ mli, ni ohã amɛtsɔmɔ maŋtsɛmɛi kɛ osɔfoi amɛhã wɔ-Nyɔŋmɔ lɛ, ni amɛbaaye shikpɔŋ lɛ nɔ akɛ maŋtsɛmɛi.”Kpojiemɔ 5:9, 10.

Taakɛ atee Yesu shi kɛjɛ shikpɔŋ lɛ nɔ kɛtee ŋwɛi lɛ, abaatee mɛi krokomɛi hu shi kɛya ŋwɛi. Yesu kɛɛ ebɔfoi anɔkwafoi lɛ akɛ: “Miiya koni mayasaa he ko mato nyɛ. Agbɛnɛ hu, . . . maba ekoŋŋ ni mabaŋɔ nyɛ kɛya mishĩa, koni he ni miyɔɔ lɛ, nyɛ hu nyɛhi jɛmɛ.”Yohane 14:2, 3.

Mɛi ni yaa ŋwɛi lɛ yaa jɛmɛ yɛ yiŋtoo ko hewɔ. Amɛbaafata Yesu he kɛye nɔ yɛ Maŋtsɛyeli ko ni baaye mɛi ni yɔɔ shikpɔŋ muu lɛ fɛɛ nɔ lɛ anɔ lɛ  mli, ni amɛbaajɔɔ amɛ. Maŋtsɛyeli nɛɛ ji nɔ ni Yesu kɛɛ esɛɛnyiɛlɔi lɛ ni amɛsɔle yɛ he yɛ sɔlemɔ he nɔkwɛmɔnɔ lɛ mli lɛ, akɛ: “Wɔ-Tsɛ ni yɔɔ ŋwɛi, ogbɛ́i lɛ he atse. O-Maŋtsɛyeli lɛ aba. Afee osuɔmɔnaa nii yɛ shikpɔŋ lɛ nɔ, taakɛ afeɔ yɛ ŋwɛi lɛ.”Mateo 6:9, 10.

NƆ NI MƐI NI YƆƆ ŊWƐI LƐ BAATSU

“[Mi bɔfo Yohane,] minu gbee ko ni wa jɛ maŋtsɛ sɛi lɛ mli kɛɛ: “Naa! Nyɔŋmɔ buu lɛ yɛ gbɔmɛi ateŋ, . . . ni ebaatsumɔ amɛhiŋmɛiiaŋ yaafonui fɛɛ, ni gbele bɛ dɔŋŋ, asaŋ awerɛhoyeli ko loo yarawoo ko loo hejaramɔ ko hu bɛ dɔŋŋ. Tsutsu nibii lɛ eho etee.’”Kpojiemɔ 21:3, 4.

Ninaa nɛɛ ni agba afɔ shi lɛ tsɔɔ be ni Nyɔŋmɔ Maŋtsɛyeli lɛ, ni Yesu kɛ mɛi ni abaatee amɛ shi kɛjɛ shikpɔŋ lɛ nɔ lɛ baaye nɔ lɛ, kɛ Satan nɔyeli baaba naagbee, ni amɛbaafee shikpɔŋ lɛ paradeiso. Nibii fɛɛ ni ehã adesai epiŋ ni ehã amɛna nɔ lɛ fɛɛ sɛɛ baafo. Gbele po baaho aya.

Shi mɛi akpekpe toi akpei abɔ ni egboi ni ateŋ amɛ shi kɛyaŋ ŋwɛi lɛ hu? Wɔsɛɛ lɛ, abaatee amɛ shi kɛba wala mli ekoŋŋ, kɛ gbɛkpamɔ lɛ akɛ amɛbaahi shi kɛya naanɔ yɛ nakai Paradeiso lɛ mli, yɛ shikpɔŋ lɛ nɔ.Luka 23:43.

Ninai nɛɛ hãa wɔnáa nɔmimaa akɛ, Yehowa Nyɔŋmɔ kɛ e-Bi, Yesu Kristo, kɛ bɔfoi anɔkwafoi lɛ, kɛ mɛi ni ahé kɛjɛ shikpɔŋ lɛ nɔ lɛ fɛɛ susuɔ wɔhe waa, ni amɛmiisumɔ ni wɔhe ajɔ wɔ. Kɛ́ ootao ole nibii ni amɛbaafee lɛ he nii babaoo lɛ, ofainɛ ni ona Yehowa Odasefoi lɛ loo yaa wɔwɛbsaiti lɛ nɔ, yɛ www.jw.org/gaa ni odaunloodi wolo ni ji, Mɛni Biblia lɛ Tsɔɔ Diɛŋtsɛ? lɛ.

Ekrokromɛi Hu Nɛ

SANEBIMƆI NI BIBLIA LƐ EHA HETOO

Mɛni Hewɔ Esa akɛ Masɔle? Ani Nyɔŋmɔ Baabo Mi Toi?

Kɛ́ Nyɔŋmɔ baahã osɔlemɔi lɛ ahetoo loo ehãŋ hetoo lɛ, edamɔ bo onɔ titri.

SANEBIMƆI NI BIBLIA LƐ EHA HETOO

Ani Yesu Ji Gbɔmɔ Kpakpa ko Kɛkɛ?

Mɛni hewɔ Yesu ni jɛ Nazaret lɛ ná adesai anɔ hewalɛ waa fe mɛi fɛɛ ni ehi shi pɛŋ lɛ.

SANEBIMƆI NI BIBLIA LƐ EHA HETOO

Mɛni Nyɔŋmɔ Maŋtsɛyeli lɛ Baatsu?

Kanemɔ koni ole nibii ni baaba be ni Nyɔŋmɔ nɔyeli lɛ yeɔ shikpɔŋ lɛ nɔ lɛ.