KAPITE 12

Koleā e Tokoi Atu Ke Soko Lau Ako Le Tosi-Tapu?

PLAY

Ka tou folau, e tou maʼua ni neʼa e mālilie ti e tou toe felāvei foki mo ni faigataʼaʼia. Ti e toe felaʼaki mo le ako o le Tosi-Tapu. E mafai ke tou pati pe tonu ko ia ke soko atu pe iai ko ia sona ʼaoga. Koleā loa ka tokoi atu ke soko lau ako le Tosi-Tapu logo ai a faigataʼaʼia?

1. Koleā e maʼuiga ai le ako o le Tosi-Tapu?

“Ko le folafola a le Atua e mauli, mo makeke.” (Epeleo 4:12) E maʼuiga lasi le Tosi-Tapu talie e fakasā mai e ia a manatu mo neʼa e logoʼi e le Atua kia tātou. Ko le matapuna aia o le atamai mālama mo le poto māʼoki ti mo le amanaki. Ti e tokoi mai ke tou liliu ko le kauneʼa o Seova. Ka tou ako le Tosi-Tapu ti e tou maʼua loa se maʼuli fiafia.

2. Koleā e tonu ai ke tou fakamaʼuigaʼi a māʼoki o le Tosi-Tapu?

Ko māʼoki o le Tosi-Tapu ko se koloa maʼuiga. Ko ia leia e pati ai i le Tosi-Tapu: “Totogi le maoki ti aua na ke fakatau a ia.” (Taagapati 23:23) Kāpau e tou fakakaukau ki le koloa maʼuiga lenā e tou fakatotonu loa ke soko atu le ako o le Tosi-Tapu logo ai a fakafesagai.—Lau Taagapati 2:4, 5.

3. E tokoi fefeʼaki atu Seova ke soko atu le ako o le Tosi-Tapu?

Ko Seova ko lotātou Tupuʼaga tauʼaluga ti ko lou Kauneʼa, e loto ke tokoi atu ke ke iloa a ia. E mafai ke toe soli atu e ia ‘le loto oli mo le makeke ki le fai o lona finegalo.’ (Lau Filipe 2:13.) Ko ia kāpau e puli iate koe le loto leia ke ako mo maʼuliʼi a tokoi alā mei le Tosi-Tapu, e mafai ke ke kole kia Seova ke tokoi atu. Ti e soli atu loa e ia a le makeke ke tauʼi ai a fakafesagai ti mo ou faigataʼaʼia. Faikole tuʼumaʼu ke tokoi atu Seova ke soko atu lau ʼaga o ako le Tosi-Tapu.—1 Tesalonika 5:17.

MANATU LOLOTO

Ta tioʼi pe fefeʼaki le soko atu lau ako o le Tosi-Tapu logo ai le lasi o maʼumaʼua mo le fakafesagai. Ti e tokoi fefeʼaki mai loa a Seova kia tātou.

4. Fakamuʼamuʼa le ako o le Tosi-Tapu

I ʼiki lakaga e lasi a neʼa alā e tou ʼaga o fai o mafai ke tou pati ai e leʼese maʼua se temi ki le ako o le Tosi-Tapu. Koleā leia e tonu ke fai? Lau Filipe 1:10, ti fai a vesili anei:

Koā “a nea ala e malilie tukupau” i le maʼuli?
E fefeʼaki lau fakamuʼamuʼa le ako o le Tosi-Tapu?

Kāpau e ʼuluaki tuku le ʼone ti e leʼaise sao loa a fatu
Kāpau e ʼuluaki tuku a fatu ti e feʼauga loa le ʼone. Ko ia, kāpau e tou fakamuʼamuʼa a neʼa alā e maʼuiga tāfito i lotātou maʼuli ti e tou maʼua loa le temi ki lona fai ti mo le temi ki le fai o ni ʼiki ake faʼasiga neʼa

Ko le ako o le Tosi-Tapu e tokoi mai ki lotātou maʼuli fakalaumālie ko lona fakaʼuiga ke tou iloa le Atua mo tausi kiate ia. Lau Mateo 5:3, ti fai le vesili leinei:

Koleā leia e soko mokā tou fakamuʼamuʼa le ako o le Tosi-Tapu?

5. Faiga fakamālotoloto logo ai le fakafesagai

E mafai ki ʼiki ke lotou ʼaga o fakaveliʼi lau ako le Tosi-Tapu. Ta tioʼi le faifaitaki o Francesco. Tioʼi le GĀ ʼATA, ti fai a vesili anei.

GĀ ʼATA: Na Fakapale Lana Faʼa Kataki (5:22)

I le lakaga leia na māsau ai Francesco ki lona tinana mo ona kauneʼa ki neʼa alā na ʼaga aia o ako, koleā na logoʼi e lātou?
Na fakapale fefeʼaki lana faiga fakamālotoloto?

Lau 2 Timoteo 2:24, 25, ti fai a vesili anei:

Koleā le manatu o lou fāmili mo ou kauneʼa ki neʼa alā e ke ʼaga o ako?
O mulimuli ki vaega anei, e fefeʼaki loa lau tali ki se tasi e fakafesagai atu o tupu ko lau ako le Tosi-Tapu? Koleā lona tupuaga?

6. Fanaki kia Seova

Kā lasi a latātou fakafeofi kia Seova, ti e tou fakafiafiaʼi loa aia. Kae e leʼaise faigaofie tuʼumaʼu a le fai o ni fetogi ke mulimuli ai ki ana fakatotonu. ʼAua na ke lotogaʼegaʼe, ko Seova e fia tokoi atu. Tioʼi le GĀ ʼATA, ti fai a vesili anei.

GĀ ʼATA: E Mafai Ke Fetogi e Seova Lokotou Maʼuli (3:56)

Koā fetogi na fai e Jim ke fakafiafiaʼi ai a Seova?
Koleā na ke ʼaga o logoʼi mei lona isitolia?

Lau Epeleo 11:6, ti fai a vesili anei:

Koleā e fai e Seova kia ‘lātou e afaʼia aia mo le loto kātoa’?
O mulimuli ki le vaega leinei, koleā e logoʼi e Seova i lana tio ki lau faiga makeke o ako le Tosi-Tapu?

E LAGI PATI ATU LOA A ʼIKI: “Koleā e ke ako ai a le Tosi-Tapu?”

Koleā loa lau tali?

MANATU TĀFITO

Ko le ako o le Tosi-Tapu e tokoi atu ke ke maʼuaʼia le maʼuli leʼegato. E ʼaoga ke ke faiga fakamālotoloto. Kāpau e ke fanaki kia Seova, ti e fakapale loa e ia a koe.