AKO 2
Ko Ai Le ’Atua?
1. Koleā e tonu ai ke tou ’atolasio ki le ’Atua?
Talie ko le ’Atua mā’oki, ko le Tupu’aga o ne’a fuli. Na le’ai sona kamata’aga tie le’ai sona gato’aga. (Pesalemo 90:2) Ko logo mālilie e ma’ua i le Tosi-Tapu e ’au meiate ia. (1 Timoteo 1:11) O tupu na soli mai e ia a le ma’uli, tie tonu ke tou ’atolasio kiate ia tokatasi. Lau ia Apokalipisi 4:11.
2. E fefe’aki le ’Atua?
E lekiaise tasi kua tio ki le ’Atua, talie e laumālie, ko lona uiga ko se ma’uli tau’aluga ake i ne’a ma’uli fuli i le kele. (Soane 1:18; 4:24) Koia e tou tio ai ki ga’oi mālilie a le ’Atua i ne’a mālilie fuli na aga a ia o fai. Ofaipe fua i la’akau ti mo fa’asiga sē o fakasā ai lona ’alofa mo lona poto, ti ko lona Mafimafi e sā i le atu laulau. Lau ia Loma 1:20.
E mafai ke tou toe iloa ake le ’Atua i le lau o le Tosi-Tapu. E toe fakasā mai e ia le ne’a e loto ki ai mo le ne’a e se loto ki ai, mo lana aga ki le kakai i ano’aga kesekese. Lau ia Pesalemo 103:7-10.
3. E iai se igoa mo le ’Atua?
Na pati Sesu: “Ko lomātou Tamana ei selo ke tapusā lou Suafa.” (Mateo 6:9) E lasi a igoa fakatu’ulaga o le ’Atua kae ko lona suafa fa’i e tasi. Ko lona igoa e to’o i fa’asiga māsau kesekese. Ki le Fakafutuna e pati masani ko “Seova,” ti ko ’iki e pati “Iavē.” Lau ia Esote 3:14, nota i lalo pasina.
E ma’uke a Tosi-Tapu na sa’u ai le suafa o le ’Atua kae fetogi ki le igoa fakatu’ulaga Aliki pe Eteleno. Kae i le kamata’aga, ko le Tosi-Tapu e tu’u ai lona suafa e tu’a fitu afe. Na faka’ilo e Sesu le suafa o le ’Atua i lana māsau ki tagata. Lau ia Soane 17:26.
Kotou tio’i a le ’ata viteo E Iai Ko Ia Se Igoa Mo Le Atua?
4. E tokaga Seova kia tātou?
Ofaipe le tamana ’alofa leinei, ko le ’Atua e faiga ki otātou mālie ke tologa fualoa
Kapau e lasi a mamae, koleā e le’ese tokaga ai a Seova kia tātou? Ko iki e lotou pati e fakasala’i tātou e ia ki le mamae, kae e se mā’oki. Lau ia Saakopo 1:13.
Na soli loa e le ’Atua le loto faitalisa ki le tagata. E se tou fiafia ko ia i lana aga o tuku ke tou filifili le tausi ki le ’Atua? (Sosue 24:15) Kae toka’api na lotou filifili ke lotou fai le veli ki ni’iki, o tupu ai le mamae o le toka’api. E mamae le loto o Seova i lana tio mai ki le lasi o le agaveli. Lau ia Senesi 6:5, 6.
Ko Seova e tokaga kia tātou. E loto ke tou ma’uli fiafia. Kua vave lana aga o puli’i a mamae ti mo lātou alā e fakatupu’ia. Kae e iai le tupu’aga o lana aga o fakataga a mamae i se gā temi to’eto’e. I le Ako 8, e tou ma’u ai loa lona tupu’aga. Lau ia 2 Petelo 2:9; 3:7, 13.
5. E fefe’aki a le tou fakafeofi ki le ’Atua?
Ko Seova e fakaafe ’ia a tātou ke tou fakafeofi kiate ia i le faikole. E tokaga a ia kia tātou takitokatasi. (Pesalemo 65:2; 145:18) E loto fakamolemole. E tokaga ki atātou faiga ke fiafia lona loto, tatau fa’i pe le’aise tou mafai i ni’iki temi. Kae logo ai lotātou uiga ’agasala, kae e mafai ke tou felogoi fakaagatonu mo ia. Lau ia Pesalemo 103:12-14; Saakopo 4:8.
I lana aga o soli kia tātou le ma’uli, e tonu ke tou ’alofa kia Seova o lasi ake i se tasi. (Maleko 12:30) I leia lau aga o ako’i ke ke iloa a ne’a e kole mai ke tou fai, e ke fakasā ’ai lou ’alofa ki le ’Atua tie ke feofi ai kiate ia. Lau ia 1 Timoteo 2:4; 1 Soane 5:3.
