E Rawa ni Vakaleqa Vakacava na iYaya Vakalivaliva Nodratou Rai na Luvemu?
Ena rairai dredre vei ira na qase cake mera kila na ivakavakayagataki ni iyaya vakalivaliva me vaka na talevoni se tablet. Ia era kila vinaka qori na gone, nira donuya tu qo na gauna e vakayagataki kina vakalevu.
Qo na ka e laurai vei ira eso na gone era vakayagataka vakalevu na internet . . .
-
era bobula ena nodra iyaya vakalivaliva.
-
era rawai ena veivakasagai ena internet.
-
e rawarawa nodra sara iyaloyalo vakasisila, ke ra sega mada ga ni nakita.
KA MO KILA
ERA NA BOBULA KINA
E dau rawarawa sara meda bobula ena so na ka e tu ena internet, me vaka na qito. E kena inaki sara ga qori, ni tukuni ena ivola Reclaiming Conversation: “Era buli na veiporokaramu (app) era tu ena talevoni meda rawa ni bobula kina.” Na levu ga ni noda sarava na itukutuku ni veivoli era tu kina, na levu tale ga ni nodra rawailavo na daunibisinisi.
VAKASAMATAKA MADA: Eratou dau vakayagataka vakasivia na luvemu na iyaya vakalivaliva? O na vukei ratou vakacava me ratou vakayagataka vinaka na nodratou gauna?—EFESO 5:15, 16.
RAWAI ENA VEIVAKASAGAI
Eso nira vakayagataka na internet era dau cudrucudru, vosavosaca, qai sega ni veinanumi. Qori e rawa ni lai tini ena veivakasagai.
Eso era dau cakava qori nira via vaqara rogo. Se, ni kila e dua ni a sega ni sureti ena dua na pati, ena rawa ni mositi koya qai nanuma nira vakalolomataki koya.
VAKASAMATAKA MADA: E dau vinaka na nodratou itovo na luvemu ni ratou vakayagataka na internet? (Efeso 4:31) Na cava eratou dau cakava nira sega ni sureti ratou eso tale?
SARA IYALOYALO VAKASISILA
Sa rawarawa sara ni saravi na iyaloyalo vakasisila ena internet. Levu na itubutubu era porokaramutaka nodra iyaya vakalivaliva na gone me tarova na iyaloyalo vakasisila, ia eso na gauna e sega ni dau cakacaka na porokaramu qori.
E rawa ni wili me basulawa ke dua e vakauta vua e dua tale na itukutuku se kena itaba veivagarogaroi. Ena so na lawa ni vanua, e rawa nira veilewaitaki na gone era vakauta se sarava na kedra iyaloyalo vakasisila eso tale na gone.
VAKASAMATAKA MADA: O na vukei luvemu vakacava me kua ni rawai ena saravi se vakau itaba vakasisila ena internet?—EFESO 5:3, 4.
KA O RAWA NI CAKAVA
VAKAVULICI LUVEMU
Dina ga nira kila vinaka na gone na ivakavakayagataki ni yaya vakalivaliva, ia se vinakati tiko ga mera vukei. E kaya na ivola Indistractable, ni o ira na gone e tiko na nodra smartphone se tablet ra qai sega ni kila na kena ivakavakayagataki dodonu, e vaka ga “nida viritaki ira i wai ra qai sega tu ni kila na qalo.”
IVAKAVUVULI VAKAIVOLATABU: “Mo vakavulica na gone ena sala me muria, ni qase mai ena sega ni gole tani mai kina.” —VOSA VAKAIBALEBALE 22:6.
Toqa se vola na ka o nanuma mo cakava.
-
Vakamacalataka vei luvequ me vinaka nona itovo ni vakayagataka na internet
-
Vukei luvequ me kua ni yalolailai ke ra sega ni sureti koya eso tale
-
Taqomaki koya ena ka e rawa ni vaka vu leqa vua ena internet
-
Raica wasoma na ka e tu ena nona talevoni
-
Yalana na gauna me vakayagataka kina nona talevoni
-
Kua ni vakayagataka na iyaya vakalivaliva ni vakarau moce
-
Vakatabuya na vakayagataki ni talevoni ena gauna ni kana
Rawa ni o Wilika Tale ga
RA TAROGA NA ITABAGONE
Na Cava e Vauci ena Vakauitukutuku Vakasisila?
O dau vakasaurarataki mo vakauitukutuku vakasisila? E ca na vakauitukutuku vakasisila? Qo beka na wede e sega ni ca?
VAKAWATI & VUVALE
Me Dua na Smartphone nei Luvequ?
Vakasamataka na taro qo mo vakadeitaka kina ke o sa tu vakarau, wili kina o luvemu me dua nona talevoni.
RA TAROGA NA ITABAGONE
Vakacava Keu Vakasagai ena Internet?
Ka mo kila, kei na ka mo cakava mo taqomaki iko kina.
