Toro Voleka Vua na Kalou

Meda Cakava Noda iTavi Vua na Kalou

O BAU vakasamataka se ‘cava na inaki ni noda bula?’ E vakatara o Jiova meda taroga na taro qori, e vinakata tale ga meda kila na kena isau. Eda vakavinavinaka ni vakatakila qori ena nona Vosa. Meda raica mada na ka e tukuna o Tui Solomoni ena Dauvunau 12:13.

Ni vakasamataki na veika a rawata o Solomoni, a rawa gona ni vakamacala ena sala meda marau kina qai vakainaki na noda bula. E sega ni tukuni rawa na vuku kei na iyau a vakalougatataki kina qai tu vua na lewa vakatui, a rawa kina ni vakadikeva na veika eda dau saga na tamata wili kina na qarai ni iyau kei na rogo. (Dauvunau 2:4-9; 4:4) Ni tukuna na macala ni nona vakadidike, a uqeti vakalou me vola: “Tou rogoca nai tinitini ni ka kecega oqo: Mo rerevaka na Kalou, ka muria na nona vunau: ni sai koya ga oqo nai tavi taucoko ni tamata.” E laurai ena vosa qori na ka vinaka duadua e rawa nida saga na tamata, eda na vakalougatataki tale ga kina vakalevu.

“Rerevaka na Kalou.” Ena rairai sega ni marautaki sara na vakasama qori ena imatai ni gauna e rogoci kina. Ia qori e sega ni rere vakalialia se rere ni domobula. Na mataqali rere e tukuni tiko eke e dau vakaraitaka e dua na gone ni vinakata me vakamarautaki tamana, e sega ni mataqali rere e laurai vua na bobula e rere ni vakacudruya na nona boso ca. E tukuna e dua na ivakamacala ni iVolatabu ni rerevaka na Kalou e dusia “na veivakalagilagi kei na vakarokoroko era vakaraitaka vua na nona tamata, nira lomani koya ra qai dokai koya ni kaukaua qai cecere.” Ni tiko vei keda na rai qori, eda na talairawarawa meda cakava na loma ni Kalou nida lomani koya, eda kila tale ga ni lomani keda. Na noda rerevaka na Kalou e sega ni vakilai tu ga; e laurai sara ga ena ka eda cakava. Ena sala cava?

“Muria na nona ivunau.” Na noda rerevaka na Kalou ena uqeti keda meda talairawarawa vua. E dodonu meda cakava qori ni buli keda o Jiova, e kila na ivakarau ni bula vinaka duadua meda muria me vaka ga na nodra kila na kabani dau buli iyaya na ivakavakayagataki vinaka duadua ni iyaya era bulia. E kauaitaki keda tale ga o Jiova. E vinakata meda marau, e vakavulici keda tale ga meda vinaka kina. (Aisea 48:17) E vola na yapositolo o Joni: “Qo na ibalebale ni noda lomana na Kalou, meda muria na nona ivunau, ia e sega ni icolacola bibi na nona ivunau.” (1 Joni 5:3) Nida talairawarawa vua na Kalou eda vakaraitaka nida lomani koya. E vakarautaka tale ga na nona ivunau ni lomani keda.

“Sai koya ga oqo nai tavi taucoko ni tamata.” E vakabibitaki ena malanivosa qori na vuna meda rerevaka kina na Kalou da qai talairawarawa vua. Qori e noda itavi. E vu ni noda bula o Jiova ni buli keda. (Same 36:9) E dodonu ga meda talairawarawa vua. Nida muria na ivakarau ni bula e vinakata, eda sa vakayacora tiko na noda itavi.

Na cava gona na inaki ni noda bula? Kena isau rawarawa ga: Meda cakava na loma ni Kalou. Qori na sala duadua ga ena vakainaki kina na noda bula. Ke o via kila e levu tale na ka me baleta na inaki i Jiova, kei na ka mo cakava me salavata kina kei na nona inaki na nomu bula, era na marau na iVakadinadina i Jiova mera vukei iko.

Wili iVolatabu e Vakatututaki ena Noveba:

◼ Vosa Vakaibalebale 22-31; Dauvunau 1-12–Sere i Solomoni 1-8