Raica sara na lewena

Raica na lewenivola

Nona Vukei Ira na Tacina o Keio

Nona Vukei Ira na Tacina o Keio

E SOTAVA e dua na ituvaki dredre o Keio kei na so tale na lotu vaKarisito ni bera ni cava na imatai ni senitiuri. Era vakatetea tiko eso na mataveitacini na ivakavuvuli lasu mera vakamalumalumutaka kina ra qai tawasea na ivavakoso. (1 Joni 2:18, 19; 2 Joni 7) E dua na turaga na yacana o Tiotirifi e ‘vakaucacataka’ na yapositolo o Joni kei na so tale, e sega ni via kauaitaki ira na ivakatawa dauveilakoyaki, e saga tale ga me uqeti ira eso tale mera muri koya. (3 Joni 9, 10) Qori na ituvaki e yaco tiko ena gauna e volavola kina o Joni vei Keio. E vola qori na yapositolo ni rauta na 98 G.V., e kune ena iVolatabu vaKirisi vaKarisito me “iKatolu ni Joni.”

E yalodina tiko ga ni qaravi Jiova o Keio, se mani dredre sara vakacava na ituvaki e sotava. E yalodina vakacava? Na cava meda vakatotomuri Keio kina nikua? Ena vukei keda kina vakacava na ivola i Joni?

NA IVOLA VUA NA ITOKANI LOMANI

O koya e vola na iKatolu ni Joni e vakatakilai koya ni dua na “qase.” Na vosa qo e kila totolo kina na luvena vakayalo lomani o Keio ni qori ga na yapositolo o Joni. E vakatokai Keio o Joni me “o koya au dau lomana.” E vakanuinui tu o Joni ni bulabula vakayago, vakayalo tale ga o Keio. Totoka dina na rai kei na vosa ni veiuqeti qori!3 Joni 1, 2, 4.

De dua e qase ni ivavakoso o Keio, ia e sega ni vakamatatataki sara qori ena ivola i Joni. E vakacaucautaki koya o Joni ni dau vakaicilitaki ira na mataveitacini, ia e sega ni kilai ira. Qori na sala e vakadinadinataka kina o Joni na nona yalodina o Keio me vaka ga eda dau kilai tani kina na lotu vaKarisito.Vkte. 18:1-8; 1 Tim. 3:2, 3; Joni 5.

Nona vakavinavinakataki Keio o Joni e vakaraitaka nira dau yaco yani ena nona vale na mataveitacini ni bera nira gole ina ivavakoso era lai veisiko kina, ra qai lai talanoataka vei Joni na ka era sotava. Rairai sala qori e rogoca kina o Joni na kedra itukutuku na ivavakoso e volavola tiko kina.

Era dau lai vakaicili ga na mataveitacini era veitosoyaki tiko qo ena nodra vale na tacidra. E dau kilai na burenivulagi ena veika ca, e sega ni vinaka na nodra veiqaravi, na vanua tale ga e takalevu kina na ivalavala dukadukali. O ira gona na  mataveitacini yalomatua, era na dau lai vakaicili ga vei ira na tacidra vakayalo.

“NIRA A LAKO YANI ENA YACA NI KALOU”

E uqeti Keio o Joni me tomana tiko ga nona veikauaitaki, ni tukuna vua na yapositolo me “talaci ira [na gole yani] ena kena ivalavala e vakadonuya na Kalou.” Na nodra dau talaci gona va qo na vulagi ena okati kina na vakarautaki ni ka era gadreva me nodra ikaukau ena nodra ilakolako e tarava. E vakadinadinataki ni cakava qori o Keio vei ira na gole yani e liu nira talanoataka vei Joni na nona dau loloma kei na nona vakabauta.3 Joni 3, 6.

Kena irairai nira daukaulotu na vulagi, era matataki Joni se ra ivakatawa dauveilakoyaki. Se mani cava ga, era dau veilakoyaki na mataveitacini qo ena vuku ni itukutuku vinaka. E kaya o Joni: “Nira a lako yani ena yaca ni Kalou.” (3 Joni 7) E ganiti ira gona na mataveitacini era lewena na ivavakoso vaKarisito mera kauaitaki. Me vaka ga e vola o Joni: “E dodonu meda vakaraitaka na veikauaitaki vei ira qo, meda cakacaka vata ena dina.”3 Joni 8.

VUKEI ENA GAUNA DREDRE

A sega ni vakavinavinakataki Keio wale ga o Joni, a vinakata tale ga me walia e dua na leqa bibi. O Tiotirifi e dua na lotu vaKarisito a sega ni dau kauaitaki ira na mataveitacini era lako yani. E saga sara mada ga me tarova nodra veikauaitaki.3 Joni 9, 10.

Era na sega ga ni via lai tiko vei Tiotirifi na lotu vaKarisito yalodina ke rawa mada ga nira lai vakaicili vua. E dau viavia liu ena ivavakoso, e sega ni dokai Joni, qai vakaucacataka na yapositolo kei ira eso tale. E sega mada ga ni vakatokai koya o Joni me qasenivuli lasu, ia e sega ni vakamalumalumu ina veiliutaki ni yapositolo. Na nona via rogo o Tiotirifi kei na nona rai cala e vakatitiqataki kina na nona yalodina. Na ka e cakava qo o Tiotirifi e dusia na nodra dau rawa ni veivakamuai o ira na via rogo qai dokadoka ena ivavakoso. Mani tukuna kina o Joni vei Keio, vei keda tale ga nikua meda: “Kua ni dau vakatotomuria na ka ca.”3 Joni 11.

VUNA LEVU MEDA CAKA VINAKA KINA

E duidui o Timitirio e cavuti koya o Joni me ivakaraitaki vinaka. E vola o Joni: “Era tukuna kece na veitacini na itovo vinaka nei Timitirio . . . O keitou tale ga keitou vakadinadinataka, o kila ni dau dina na ka keitou tukuna.” (3 Joni 12) Rairai e vinakata o Keio me vukei koya o Timitirio, de nona vola na yapositolo na iKatolu ni nona ivola me nona ikau kei na nona vakatutu. De lai solia sara ga vei Keio o Timitirio na ivola. Me vaka ni nona mata o Joni se dua na italatala dauveilakoyaki, de raica o Timitirio na bibi ni ivola e vola o Joni.

Na cava ga me uqeti Keio tale kina o Joni me dau veikauaitaki? Vakacava, e nanuma o Joni ni vinakati me uqeti o Keio me yaloqaqa tiko ga? Vakacava, e leqataka na yapositolo de sega ni via veivakaicilitaki o Keio, ni via biuti ira tani na lotu vaKarisito era dau veikauaitaki o Tiotirifi ena ivavakoso? Se mani cava e yaco, e vakadeitaka o Joni vei Keio ni kaya: “O koya e daucaka vinaka e tovata kei na Kalou.” (3 Joni 11) Qori e dua dina na vuna vinaka meda caka vinaka tiko ga kina.

Vakacava, e uqeti Keio na ivola i Joni me veikauaitaki tiko ga? Macala ga qori ena kena maroroi tu na iKatolu ni Joni ena iVolatabu me uqeti ira tale eso mera “vakatotomuria ga na ka vinaka.”

 KA E VULICI ENA IKATOLU NI JONI

Sa sega tale ni qai cavuti na yaca ni tacida lomani o Keio. Ia na kena mai kilai na kena itukutuku lekaleka qo, eda rawa ni vulica kina eso na ka.

Eda na “dau veikauaitaki” vakacava?

Kena imatai, levu era vaka mera dinau tu vei ira na yalorawarawa era yalodina mera veilakoyaki nira vakatakila vei ira na ka dina. Eso ga na lotu vaKarisito nikua e rawa ni lako vakayawa ena vuku ni itukutuku vinaka. Me vakataki Keio ga, eda rawa ni veitokoni da qai veiuqeti vei ira na ivakatawa dauveilakoyaki kei na watidra. Se da tokoni ira na mataveitacini era veitokiyaki ena noda vanua, se i vanua tani mera lai veiqaravi ena vanua e vinakati kina vakalevu na dautukutuku ni Matanitu. Eda uqeti gona meda “dau veikauaitaki.”Roma 12:13; 1 Tim. 5:9, 10.

Kena ikarua, kua ni kurabuitaka ni so na gauna ena laurai ena ivavakoso nodra tusaqati na veiliutaki. A saqati nona veiliutaki o Joni vaka kina na yapositolo o Paula. (2 Kor. 10:7-12; 12:11-13) Na cava gona meda cakava ke da sotava na leqa va qori ena ivavakoso? E vakaroti Timoci o Paula ni kaya: “E sega ni dodonu me veivala na bobula ni Turaga, me yalomalua ga vei ira kece, me qasenivuli vinaka, me vosota tu ga ni sotava na ka ca, me yalomalua ni vakavulici ira na talaidredre.” Ke da yalomalua ena gauna mada ga eda vakacudrui kina, de dua ena veisautaki ira eso na dau vakalewai keda. Kena ikuri, o Jiova ena rawa ni “vakadonuya mera veivutuni, mera rawata kina na kilaka dodonu ni ka dina.”2 Tim. 2:24, 25.

Kena iKatolu, mera vakavinavinakataki ra qai vakacaucautaki na lotu vaKarisito era yalodina na qaravi Jiova se mani vakacava na nodra tusaqati. E vakayaloqaqataki Keio sara ga na yapositolo o Joni qai vakadeitaka vua ni donu na ka e cakava tiko. O kemuni tale ga na qase ni ivavakoso nikua, moni vakatotomuria na ivakaraitaki nei Joni ena nomuni vakayaloqaqataki ira na mataveitacini mera ‘kua kina ni wawale.’Aisea 40:31; 1 Ces. 5:11.

Ni 219 ga na vosa e volai kina ena vosa vaKirisi, e lekaleka duadua na ivola ni yapositolo o Joni vei Keio ena iVolatabu. E yaga vakalevu vei keda na lotu vaKarisito nikua.