iKarua ni iVola Vei Ira mai Korinica 12:1-21
12 E dodonu meu sakitaki au. E sega ni yaga, ia meu cavuta mada na raivotu+ kei na veika e vakatakila mai na Turaga.+
2 Au kila e dua na tagane e tisaipeli i Karisito, a kau vakasauri ina ikatolu ni lomalagi ena 14 na yabaki sa oti. Au sega ni kila se a kau vakayago se sega, e kila ga na Kalou.
3 Io, au kila na tagane va ya, au sega ni kila se a yaco qori ena yagona vakayago se sega, e kila ga na Kalou.
4 E kau vakasauri i parataisi, e qai rogoca eso na vosa e sega ni tukuni rawa, e vakatabui me cavuta na tamata.
5 Au na sakitaka na tamata va ya, ia au na sega ni sakitaki au, e rawa ga niu sakitaka na noqu malumalumu.
6 Keu via sakitaki au, au na tukuna ga na ka dina, au na sega ni tukuna na ka e sakasaka. Ia au na sega ni sakitaki au, de qai sivia tale na ka e nanuma e dua me baleti au ni vakatauvatani kei na ka e raica se rogoca vei au,
7 ni sa levu sara na ka e vakatakilai mai.
O koya gona, meu kua ni vakalevulevui au, e votoki au voli e dua na votonikau,+ na agilosi i Setani me vakararawataki au, meu kua kina ni vakalevulevui au.
8 Ena vuku ni tikina qo e vakatolu noqu kerea na Turaga me kauta laivi na votonikau qo.
9 Ia e kaya vei au: “Sa rauti iko vinaka na noqu loloma soli wale, ni na qai taucoko na noqu kaukaua ena nomu malumalumu.”+ Au marautaka gona meu sakitaka na noqu malumalumu, me noqu ivakaruru kina na kaukaua i Karisito me vaka na valelaca.
10 O koya gona, au marau niu malumalumu, niu vosabeci, niu leqa, niu vakacacani, niu sotava na veika dredre ena vuku i Karisito. Niu malumalumu, au sa qai kaukaua.+
11 E bale vei kemuni na noqu sakasaka ni dodonu moni tokoni au. Niu sega sara ga ni lolovira ena dua na ka vei ira na nomuni yapositolo era viavia uasivi, keu okati mada ga meu tamata wale.+
12 O kemuni sara ga oni vakadinadinataka niu yapositolo ena noqu dau vosota,+ ena ivakatakilakila, ena ka veivakurabuitaki, kei na cakamana.+
13 Oni lolovira vakacava ni vakatauvatani kei ira na vo ni ivavakoso? De dua ena noqu sega ni vakaicolacolataki kemuni.+ Ni vosoti au ena vuku ni cala qo.
14 Raica! Qo na ikatolu ni gauna meu vakarau gole yani kina vei kemuni, ia au na sega ni vakaicolacolataki kemuni. Niu sega ni vinakata na nomuni iyau+ au vinakati kemuni ga, ni sega ni dodonu mera maroroi iyau na gone+ ena vukudra na itubutubu, o ira ga na itubutubu ena vukudra na luvedra.
15 O yau, au na marautaka vakalevu meu vakayagataka vei kemuni+ na ka kece e tu vei au. Keu lomani kemuni vakalevu, meu qai lomani vakalailai?
16 Ia au sega ni vakaicolacolataki kemuni.+ Oni se kaya ga niu “veidabui,” niu rawai kemuni ena “ilawaki.”
17 Vakaevei au rawaka vei kemuni ena noqu tala yani eso?
18 Au uqeti Taito me lako yani vei kemuni, au tala tale ga yani e dua na tacida me tomani koya. A sega sara ga ni rawaka vei kemuni o Taito, se vakacava?+ E tautauvata ga na neitou inaki, se vakaevei? E tautauvata ga na ka keitou cakava, se vakaevei?
19 Ena gauna kece qo, oni nanuma ni keitou sauma tiko yani na nomuni veibeitaki? Ena mata ga ni Kalou keitou vosa kina ni keitou imuri i Karisito. Ia kemuni na wekaqu lomani, na ka kece keitou cakava e kena inaki moni vakayaloqaqataki kina.
20 Au leqataka deu yaco yani, au qai raica ni oni sega ni vaka na ka au namaka, se niu sega ni vaka na ka oni namaka, de qai laurai ga na veivala, na vuvu, na veicudruvi, na veiba, na kakase, na vakauvosa, na dokadoka, na tiko yavavala.
21 Niu lesu yani, de dua ena vakamadualaki au e matamuni na noqu Kalou, au na qai tagicaki ira na ivalavala ca e liu ra sega ni veivutunitaka nodra ivalavala dukadukali, nodra veiyacovi tawadodonu,* kei na ivalavala vakasisila* era dau cakava.
iVakamacala e ra
^ Kirisi, por·neiʹa. Raica na iVakamacala ni Vosa.
^ Se “ivalavala vakamadua.” Kirisi, a·selʹgei·a. Raica na iVakamacala ni Vosa.
