Raica sara na lewena

Raica na lewenivola

 VANUA E MAROROI KINA NA KEDA ITUKUTUKU MAKAWA

“Keimami sa Qai Gumatua ga Vakalevu Salavata kei na Loloma”

“Keimami sa Qai Gumatua ga Vakalevu Salavata kei na Loloma”

SA QAI katakata ga na draki ena mataka ni Vakaraubuka ni Seviteba 1922 nira osota yani na vanua ni sarasara na le 8,000. E kacivaka o jeameni ni rawa nira biubiu ni vakacagau tiko na soqo bibi qo, ia era na sega ni vakatarai tale mai loma.

E tekivu na soqo ena sere “Veivakacaucautaki” (Praise Service), oti e gole sara yani ena itutunivunau o Joseph F. Rutherford. Levu era via kila sara ga se cava ena tukuni. So tale era sega ni dabe vakamalua. Era mani kerei mera dabe ra qai vakarorogo. Kena irairai ni se qai tekivu na vunau, se sega ni dua e raica na ivivi ni isulu levu e vesu toka e cake.

E vosa o Brother Rutherford ena ulutaga: “Sa yaco mai na Matanitu ni Kalou.” Rauta ni dua veimama na aua na kena voqa tiko ena vanua ni soqo na bi ni domona, ni vakamacalataka na nodra yaloqaqa na parofita e liu mera parofisaitaka na yaco mai ni Matanitu ni Kalou. Ni sa vakarau cava nona ivunau, e taroga, “O ni vakabauta ni sa tekivu veiliutaki tiko na Tui lagilagi?” Era sauma na vakarorogo nira kailavaka: “Io!”

E kacivaka o Brother Rutherford: “Moni lesu gona ina yalava, o kemuni na luve ni Kalou cecere! Sa veiliutaki na Tui! Oni na tukuna yani e veivanua. Koya gona kacivaka, kacivaka, kacivaka.”

Ena gauna vata qori, e lutu na ivivi sulu e vesu toka e cake qai volai tu kina: “Kacivaka na Tui kei na Matanitu.”

E nanuma lesu o Ray Bopp: “Dua na ka na nodra kurabui na vakarorogo.” E vakamacalataka o Anna Gardner na kena “yavavala na duru ena levu ni vakasausau.” E tukuna o Fred Twarosh: “Dua ga na gauna nodra duri na vakarorogo.” E kaya o Evangelos Scouffas, “E vaka ga e dua na kaukaua e dreti keimami mai na idabedabe me keimami duri, qai lakovata na tonawanawa ni mata i keimami.”

Levu era tiko ena soqo qori era sa kacivaka tiko na itukutuku ni Matanitu ni Kalou. Vaka ga era vakaukauataki mera vakayacora e dua tale na inaki ni Kalou. Tukuna o Ethel Bennecoff ni gauna era lesu kina na Gonevuli ni iVolatabu, “keimami sa qai gumatua ga vakalevu salavata kei na loloma.” O Odessa Tuck e se yabaki 18 ena gauna ya, e kaya ni oti na soqo e gu na lomadra mera ciqoma na veisureti “O cei ena lako?” E kaya: “Au sega ni kila na vanua meu gole kina, se cava meu cakava kei na sala me vakayacori kina. Au kila ga niu via vakataki Aisea, nona tukuna: ‘O yau qo! Moni talai au!’” (Aisea 6:8) E tukuna o Ralph Leffler: “Na siga vakatubuqoroqoro qori e itekitekivu sara ga ni cakacaka lavotaki ni kena kacivaki na itukutuku vinaka ni Matanitu ni Kalou e sa roboti vuravura nikua.”

Sa rauta me dua dina na gauna vakairogorogo ena keda ivolatukutuku na soqo mai Cedar Point, Ohio  ena 1922! E kaya o George Gangas, “Na soqo qori e uqeti au sara ga meu kua ni dau calata na soqo va qori.” Ni vakasamataka lesu, e kaya ni se sega vakadua ni calata e dua. E vola o Julia Wilcox: “Ni tabaki noda ivola na ka me baleti Cedar Point ena 1922, e dau lesu sara ga noqu vakanananu ena gauna ya. Au dau tukuna tu ga, ‘Vinaka vakalevu Jiova nomuni vakatara meu tiko tale ga ena siga ya.”

Me vakataki keda ga nikua, e tiko eso na ka eda dau guilecava dredre me baleta na soqo ni veiwasewase, vakabibi na kena e uqeta na lomada, e vakayaloqaqataki keda, eda lomana kina vakalevu na noda Kalou kei na nona Tui. Nida vakasamataka lesu na gauna qori, e gu tale ga na lomada meda kaya, “Vinaka vakalevu Jiova nomuni vakatara meu tiko tale ga ena siga ya!”