Nyew, Jehovah Adasefo a wɔwɔ wiadze ne mfɛndzanan nyina no wɔ mbaa mpempem pii a wɔyɛ asɛmpakafo. Wɔyɛ nyimpadɔm kɛse a wɔrekã Nyankopɔn N’ahendzi ho asɛmpa akyerɛ nkorɔfo. Ndwom 68:11 hyɛɛ mbaa asɛmpakafo yi ho nkɔm dɛ: “[Jehovah] kãa asɛm no; mbaa a wɔdze nsɛmpa no takye no wɔyɛ dɔm kɛse.”

Naaso, dwuma a mbaa asɛmpakafo yi dzi no nntse dɛ dza mbaa asɔfo a wɔwɔ ɔsom afofor mu no dzi no. Nsonsonee kɛse da hɔn ntamu. Ebɛn akwan ahorow do na mbaa asɛmpakafo yi yɛ soronko fi mbaa asɔfo ho?

Ɔsor nkorɔfo a hɔn mu biara kyerɛkyerɛ hɔn. Mbaa asɔfo, nkanka hɔn a wɔwɔ ator Christianfo hɔn som ahorow no mu no dzi ndzɛmba enyim wɔ hɔn asɔr mu na wɔkyerɛkyerɛ hɔn asɔrmba no. Naaso mbaa asɛmpakafo a wɔyɛ Jehovah Adasefo dze, wɔkyerɛkyerɛ hɔn a wonnyi asafo no mu, kyerɛ dɛ nkorɔfo a wɔnye hɔn nnsom a wohyia hɔn aber a wɔreyɛ efiefi asɛnka anaa wɔ beebi fofor.

Adze fofor so a ɔma mbaa asɛmpakafo a wɔyɛ Jehovah Adasefo da nsew fi mbaa asɔfo a wɔwɔ ɔsom afofor mu so nye dwuma a wodzi wɔ asafo no mu. Mbaa asɔfo a wɔwɔ ator Christianfo hɔn som mu nye asɔr ahorow mu no dzi hɔn asɔrmba no do tum, na wɔdze hɔn som mu gyedzi ahorow kyerɛkyerɛ hɔn. Mbaa asɛmpakafo a wɔyɛ Jehovah Adasefo dze, wɔnnkyerɛkyerɛ asafo no aber a mbarimba a woenuma hɔn wɔ hɔ. Mbarimba a woeyi hɔn dɛ wɔnkyerɛkyerɛ nkotsee na wɔkyerɛkyerɛ.​—1 Timothy 3:2; James 3:1.

Bible ma yehu dɛ mbarimba nkotsee na wɔdze ahyɛ hɔn nsa dɛ wɔnhwɛ asafo no do. Hyɛ nhwɛdo a ɔsomafo Paul yɛɛ maa hɛn aber a ɔkyerɛɛw krataa kɛmaa Titus a nna ɔnye no yɛ ɔhwɛfo edwuma yi nsew: “Iyi ntsi na medze wo migyaa Crete, na aahyehyɛ mpanyimfo wɔ kurow biara mu dɛ mbrɛ mehyɛɛ wo” no. Paul dze kaa ho dɛ ɔsɛ dɛ barimba biara a wobeyi no dɛ ɔpanyin no yɛ “obi a no ho nnyi asɛm bi, [na ɔyɛ] ɔyer baako kun.” (Titus 1:​5, 6) Paul dze akwankyerɛ a ɔnye iyi dzi nsɛ maa Timothy wɔ krataa a ɔkyerɛwee kɛmaa no no mu: “Nokwasɛm nye yi, Sɛ obi pɛ ɔhwɛfo-edwuma a, wɔapɛ edwuma pa. Dɛm ntsi ɔsɛ dɛ ɔhwɛfo yɛ obi a no ho nnyi asɛm, ɔyer baako kun, . . . otum kyerɛkyerɛ.”​—1 Timothy 3:​1, 2

Ebɛnadze ntsi na mbarimba nkotsee na wɔma hɔn kwan dɛ wɔnyɛ ɔhwɛfo-edwuma no? Paul kãa dɛ: “Ɔbaa dze, memma no kwan dɛ ɔnkyerɛkyerɛ, anaa ondzi ɔbanyin do tum, na mbom ɔnyɛ komm. Na wodzii kan bɔɔ Adam ansaana wɔrobɔ Eve.” (1 Timothy 2:​12, 13) Ntsi, mbrɛ Nyankopɔn sii bɔɔ ndzɛmba ndzidzido ndzidzido no ma yehu siantsir a ɔdze asodzi ahyɛ mbarimba nsa dɛ wɔnkyerɛkyerɛ na wɔnyɛ ahwɛfo no.

Jehovah n’asɛmpakafo dze, wodzi Jesus Christ a ɔyɛ hɔn kandzifo no nhwɛdo ekyir. Osuanyi Luke kyerɛɛw iyi faa Jesus no som edwuma no ho: “Okoduaduaa nkurow nye nkurobaase kɛkãa Nyankopɔn n’ahenman no n’asɛmpa kyerɛe.” Ekyir yi, Jesus somaa n’ekyirdzi no dɛ hɔn so nkɛyɛ edwuma kor no ara bi: ‘wokoduaduaa nkurow no nyina mu kãa asɛmpa no.’​—Luke 8:1; 9:​2-6.

Ndɛ, Jehovah n’asɛmpakafo​—mbanyin na mbaa​—nyina reyɛ dza Jesus hyɛɛ ho nkɔm yi: “Na ahenman no ho asɛmpa yi, wɔbɛkã wɔ wiadze nyina dze edzi amanaman nyina dase; na nkyii ewiei no bɛba.”​—Matthew 24:14.