BIBLE mber mu no, nna ofihwɛfo hwɛ obi fofor ne fie anaa n’egyapadze bi do. Hebrew na Greek nkasafua a wɔkyerɛɛ ase dɛ “ofihwɛfo” no, ɔtɔ da a, wotum dze gyina hɔ ma ɔhwɛfo anaadɛ ofie panyin.

Aber a nna egyapanyin Jacob ne ba Joseph yɛ akowaa wɔ Egypt no, nna Joseph na ɔyɛ ofihwɛfo wɔ no wura ne fie hɔ. Nokwasɛm nye dɛ, no wura Egyptnyi no dze “dza ɔwɔ nyinara hyɛɛ Joseph ne nsa.” (Gen. 39:2-6) Ekyir yi, aber a Joseph noara so bɛyɛɛ obi a ɔwɔ tum kɛse wɔ Egypt no, ɔpaaw ofihwɛfo wɔ noara ne fie.​—Gen. 44:4.

Jesus n’aber do no, nna nkorɔfo hɔn haban taa wɔ kurow fofor do. Iyi ntsi, nna haban wuranom no paw ahwɛfo ma wɔhwɛ edwuma a apaafo yɛ wɔ haban mu hɔ no do.

Nna woana na wotum paw no dɛ ofihwɛfo? Rome kyerɛwfo bi a ɔtsenaa ase wɔ tsetse Christianfo no hɔn aber do a wɔfrɛ no Columella kãa dɛ, sɛ wobotum apaw akowaa bi dɛ ɔhwɛfo anaa ofihwɛfo a, ɔsɛ dɛ ɔyɛ obi a “oesũa edwuma no ma oehu edwuma no yie.” Ɔsɛ dɛ ɔyɛ obi a “ɔbɔhwɛ ma edwumayɛfo no ayɛ edwuma yie naaso nnyɛ etsirmɔdzen kwan do bi a.” Ɔdze kaa ho dɛ: “Ne nyina mu no, adze tsitsir a nna wɔhwehwɛ fi no hɔ nye dɛ, ɔnnsɛ dɛ ɔyɛ noho dɛ onyim biribiara na mbom ɔwɔ dɛ ɔbrɛ noho adze na osũa ndzɛmba fofor aber biara.”

Nyankopɔn n’Asɛm mu no, wɔdze mbrɛ ofihwɛfo si yɛ n’edwuma no yɛ mfatoho dze kyerɛkyerɛ dwumadzi ahorow bi a ɔkɔ do wɔ Christianfo asafo no mu no. Dɛ nhwɛdo no, ɔsomafo Peter hyɛɛ Christianfo nkuran dɛ wɔmfa hɔn adom akyɛdze ndzi dwuma mfa ‘nsonsom hɔnho, dɛ Nyankopɔn adom do efihwɛfo pa.’​—1 Pet. 4:10.

Jesus nankasa dze ofihwɛfo edwuma no yɛɛ mfatoho wɔ asɛm a wɔayɛ ho kyerɛwtohɔ wɔ Luke 16:1-8 no mu. Bio so, wɔ nkɔnhyɛ a ɔfa asɛnkyerɛdze a ɔbɛda no edzi dɛ Jesus ridzi Hen mu no, ɔmaa n’esuafo no hun dɛ ɔbɛpaw “akowaa nokwafo nye nyansafo” anaa “ofihwɛfo nokwafo.” Dwuma tsitsir a dɛm ofihwɛfo no bedzi nye dɛ ɔbɔkɔ do ama Christ n’ekyirdzifo sunsum afamu edziban wɔ ewiei mber no mu, kyerɛ, Bible mu nkyerɛkyerɛ a wohia nyinara. (Matt. 24:45-47; Luke 12:42) Ofihwɛfo nokwafo no hwɛ siesie nwoma nye dza ɔka ho a ɔhyɛ gyedzi dzen, na ɔdze ma Christ n’ekyirdzifo a wɔwɔ wiadze nyina no. Hɛn enyi sɔ paara dɛ hɛn nsa ka nwoma nye nkyerɛkyerɛ a ɔtsetse dɛm a wɔdze ma hɛn no.