Da kor bi, nna Jesus rekyerɛkyerɛ, na ɔkaa asɛm bi faa ɔbarimba sikanyi bi na Lazarus ho. (Luke 16:19-31) Asɛm a Jesus kae no mu no, nna osikanyi no na Lazarus gyina hɔ ma nyimpakuw ebien bi: (1) Jewfo nyamesom akandzifo a wɔyɛ ahantan a nna wɔwɔ Jesus n’aber do no (2) hɔn a hɔn asɛm yɛ mbɔbɔr a wɔwɔ akoma pa a wotsiee Jesus n’asɛm no.

Dza yɛrebɛka ho asɛm

•  Ebɛn asɛm na Jesus kae faa osikanyi no na Lazarus ho?

•  Ehwɛ a dɛm asɛm yi sii ankasa?

•  Ehwɛ a dɛm asɛm yi kyerɛ dɛ Hellgya nkyerɛkyerɛ no yɛ nokwar anaa?

•  Asɛm a ɔfa osikanyi no na Lazarus ho no kyerɛ dɛn?

 Jesus kaa mbarimba beenu bi a nsesa kɛse bi baa hɔn asetsena mu ho asɛm wɔ Luke tsir 16.

 Asɛm a Jesus kae no, ma yentwa no tsia: Osikanyi bi tsenaa ase, nna hwee nnhia no. Wɔdze ɔbarimba bi a ɔserɛserɛ adze a wɔfrɛ no Lazarus kɛtsenaa osikanyi yi n’abow ano. Nna Lazarus rohwɛ kwan dɛ wɔdze edziban a ofi osikanyi no pon do bɔtɔ famu no bɛma no ma oeedzi. Ekyir yi, Lazarus wui na abɔfo bɛmaa no do kɔr Abraham ne nkyɛn. Osikanyi no so wui na wosiee no. Mbrɛ Jesus sii kaa mbarimba beenu yi ho asɛm no, annhwɛ a obi bɛka dɛ wowui no nna wɔda ho ara tse ase. Nna osikanyi a oewu no ruhu amandze paa wɔ gya a ɔredzɛw bi mu. Osiandɛ osikanyi no reberɛ ntsi, ɔserɛɛ Abraham dɛ ɔmma Lazarus mfa ne nsatseaba mbɔ nsu mu na ɔmfa nkɔsɔ ne tɛkyerɛma do. Abraham annyɛ dza osikanyi no kae no, na mbom ɔkaa dɛ Lazarus abɛyɛ osikanyi na osikanyi no so abɛyɛ ohianyi. Afei Abraham kaa dɛ ɔka (bɔnsa) kɛse bi da hɔn beenu no ntamu, na obiara runntum nntra nnkɔ ne nyɛnko nkyɛn.

 Oho. Mbom ɔyɛ mfatoho bi a Jesus mae dze kyerɛɛ hɛn biribi. Abemfo pii so gye to mu dɛ ɔyɛ mfatoho. Luther ne Bible a wɔyɛe wɔ afe 1912 mu no, n’etsifi asɛm bi ka dɛ dɛm asɛm yi yɛ mfatoho. Afei so sɛ ehwɛ Catholicfo Jerusalem Bible no mu a, wɔakyerɛw nkyerɛkyerɛmu bi egu ase dɛ “asɛm yi yɛ mfatoho, na hɔn a hɔn edzin wɔ mu no nnyɛ nyimpa a wɔtsenaa ase ankasa.”

 Asɛm a Jesus kae no, ehwɛ a nna ɔrepɛ akyerɛ dɛ sɛ nyimpa wu a ɔkɛtsena beebi fofor anaa? Afei so ehwɛ a nna ɔrepɛ akyerɛ dɛ sɛ binom wu a wɔkɔ Abɔnsamgyamu kohu amandze, na Abraham na Lazarus dze wɔwɔ sor anaa? Adanse pii wɔ hɔ a ɔma yehu dɛ ɔnntse dɛm.

 Susu dza odzidzi do yi ho hwɛ:

•   Sɛ nna osikanyi no ruhu amandze wɔ ogya mu ampa a, ehwɛ a nkyɛ ogya no ronnwew nsu a ɔwɔ Lazarus ne nsatseaba ano no anaa?

•   Sɛ nsu no annwew mpo a, ehwɛ a nkyɛ nsu ketseaba dɛm botum ama osikanyi a oruhu amandze wɔ ogya mu no eenya ahotɔ afebɔɔ anaa?

•   Aber a Jesus wɔ asaase do no, ɔkaa dɛ nna obiara nnkɔr sor. Dɛm ntsi ɔbɛyɛ dɛn na Abraham ekopue sor?​—John 3:13.

 Oho. Ɔwɔ mu dɛ iyi nnyɛ asɛm a osii ankasa dze, naaso binom ka dɛ ɔkyerɛ dɛ apapafo bɔkɔ sor, na ndzebɔnyɛfo bɔkɔ Hell anaa Abɔnsamgyamu ekohu amandze. a

 Asɛm a wɔreka yi tɔ asomu anaa? Oho.

 Nkyerɛkyerɛ a ɔfa Abɔnsamgyamu ho nnye dza Bible no ka fa ewufo ho no nnhyia koraa. Nhwɛdo bi nye yi: Bible no nnka dɛ apapafo a woewuwu no nyina regye hɔn enyiwa wɔ sor, anaa ndzebɔnyɛfo ruhu amandze wɔ Abɔnsamgyamu. Mbom Bible no ma yehu pefee dɛ: “Na atseasefo nyim dɛ wobowu ara: na ewufo dze, wonnyim biribiara.”​—Ɔsɛnkafo 9:5.

 Asɛm a Jesus kae no gyina hɔ ma nyimpakuw ebien bi a nna nsesa kɛse bi rebɛba hɔn asetsena mu.

 Nna osikanyi no gyina hɔ ma Jewfo nyamesom akandzifo a “wɔyɛ sikapɛfo” no. (Luke 16:14) Sɛ nna Jesus rekasa a wotsie no, naaso nna wɔmmfa nnyɛ hwee. Nna dɛm nyamesom akandzifo yi dze hɔn a hɔn asɛm yɛ mbɔbɔr no enyim twutwuw famu.​—John 7:49.

 Nna Lazarus gyina hɔ ma hɔn a nna hɔn asɛm yɛ mbɔbɔr a wotsie Jesus n’asɛm naaso nna nyamesom akandzifo no bu hɔn enyimtsia no.

 Nsesa a ɔbaa ekuw ebien no hɔn asetsena mu no, nna ɔso paa.

•   Nna Jewfo nyamesom akandzifo no adwen yɛ hɔn dɛ wɔwɔ Nyankopɔn n’enyim adom. Naaso osiandɛ wɔammfa Jesus ne nkyerɛkyerɛ annyɛ hwee ntsi, Nyankopɔn poow hɔn na ɔanngye hɔn som no annto mu. Dɛm ntsi, nna ɔtse dɛ dza woewuwu wɔ Nyankopɔn n’enyi do. Afei so, nsɛm a Jesus na n’esuafo no kae no maa hɔnho hyehyee hɔn.​—Matthew 23:29, 30;Asomafo Ndwuma 5:29-33.

•   Hɔn a hɔn asɛm yɛ mbɔbɔr a nna hɔn som mu mpanyimfo no ebu hɔn enyi egu hɔn do ber tsentsenntsen no, afei dze nna hɔn na woebenya Nyankopɔn n’enyim adom no. Hɔn mu pii tsiee Kyerɛwnsɛm no mu nsɛm a Jesus kae no, na ɔboaa hɔn paa. Seseiara dze nna kwan bi ebue ama hɔn a wobenya Nyankopɔn n’enyim adom afebɔɔ no.​—John 17:3.