Kpep N̄kpọ To Ikọ Abasi

Nso Idi Obio Ubọn̄ Abasi?

Ibuotikọ emi obụp mme mbụme emi ẹkemede ndidi emesibụp n̄ko, onyụn̄ owụt ebiet emi okpokụtde ibọrọ ke Bible fo. Mme Ntiense Jehovah ẹyema ndinam ibọrọ mbụme emi enen̄ede an̄wan̄a fi.

1. Nso idi Obio Ubọn̄ Abasi?

Obio Ubọn̄ Abasi edi ukara emi odude ke heaven. Enye ayada itie kpukpru ukara emi ẹdude idahaemi onyụn̄ anam ẹnam uduak Abasi ke heaven ye ke isọn̄. Obio Ubọn̄ Abasi ayanam inyene eti ukara emi iyomde.—Kot Daniel 2:44; Matthew 6:9, 10.

Kpukpru obio ẹnyene edidem. Jehovah emek Jesus Eyen esie ete edi Edidem Obio Ubọn̄ imọ.—Kot Luke 1:30-33.

2. Nso inam Jesus edi eti Andikara?

Eyen Abasi edi eti Andikara sia enye ọfọn ido, ọsọn̄ọ ada ke se inende, onyụn̄ ekeme ndin̄wam mme owo. (Matthew 11:28-30) Ke Jesus ama ekeset ke n̄kpa, enye ama ọdọk aka heaven eketie ke ubọk nnasia Jehovah ebet. (Mme Hebrew 10:12, 13) Ekem Abasi ama ọnọ enye odudu nditọn̄ọ ukara ke heaven.—Kot Daniel 7:13, 14.

3. Mmanie ẹditiene Jesus ẹkara?

Mbon emi ẹkotde “ndisana ikọt N̄kon̄n̄kan Abasi” ke Abasi ẹmek ete ẹtiene Jesus ẹkara ke heaven. (Daniel 7:27) Akpa mbon emi ẹkemekde ndidi ndisana ikọt Abasi ẹkedi mme anam-akpanikọ apostle Jesus. Jehovah ke osụk ememek mme anam-akpanikọ iren ye iban emi ẹdisịnede ke otu ndisana ikọt esie. Mmọ ẹdiset ye idem eke spirit ukem nte Jesus.—Kot John 14:1-3; 1 Corinth 15:42-45.

Owo ifan̄ ẹdika heaven? Jesus okokot mmọ “ekpri otuerọn̄.” (Luke 12:32) Owo 144,000 ẹdika heaven ikada ye Jesus ikara isọn̄ emi.—Kot Ediyarade 5:9, 10; 14:1.

 4. Ini ewe ke Obio Ubọn̄ Abasi ọkọtọn̄ọ ndikara?

Jesus ọkọtọn̄ọ ndikara ke 1914. * Enye ama osio Satan ye mme demon esie ọduọn̄ọ ke isọn̄ ke ndondo oro enye ọtọn̄ọde ukara esie. (Ediyarade 12:7-10, 12) Ọtọn̄ọde ke ini oro ke mfịna ubonowo ekenen̄ede okpon. Ekọn̄, unyekisọn̄, akan̄, ndiọi udọn̄ọ emi ẹkemede ndibe owo, ye ubiatibet ẹwụt ke eyo nnyịn emi ọmọn̄ ebe efep. (2 Timothy 3:1-5) Ana kpukpru mbon emi ẹyomde ndidia ufọn Obio Ubọn̄ Abasi ẹkpep ẹfiọk nte ikpetienede Jesus, kpa Edidem Obio Ubọn̄ emi.—Kot Luke 21:7, 10, 11, 31, 34, 35.

5. Nso ke Obio Ubọn̄ Abasi edinam?

Ukwọrọikọ oro ẹkwọrọde mfịn ke ofụri ererimbot edi usụn̄ kiet emi Obio Ubọn̄ Abasi an̄wamde mme owo ke kpukpru idụt ẹkpep n̄kpọ ẹban̄a Abasi. (Matthew 24:14) Enye eyekpeme “akwa otuowo” emi ẹsụkde ibuot ẹnọ Jesus ke ini ẹdisobode idiọk ererimbot emi.—Kot Ediyarade 7:9, 10, 13-17.

Obio Ubọn̄ emi ayanam isọn̄ emi akabade edi Paradise ke ufan̄ isua 1,000. Ekem, Jesus ọyọkpọn̄ ukara ọnọ Ete esie. (1 Corinth 15:24-26) Ndi enyene owo emi afo akpamade ndikwọrọ eti mbụk Obio Ubọn̄ emi nnọ?—Kot Psalm 37:10, 11, 29.

Edieke oyomde ndifiọk n̄kpọ en̄wen, se ibuot 8 ye 9 ke n̄wed Nso ke Bible Enen̄ede Ekpep? emi Mme Ntiense Jehovah ẹsiode.

[Ikọ Idakisọn̄]