Mbụk Eyouwem

Jehovah Ama Enen̄ede Oyụhọ Udọn̄ Oro N̄kenyenede Ndidi Isụn̄utom

Nte Sheila Winfield da conceição obụkde

Isụn̄utom kiet oro okotode Africa edise nnyịn ama asian nnyịn ini kiet ko ete ke kpukpru owo ke efakutom imọ ẹsidara imọ, ẹsinyụn̄ ẹnen̄ede ẹkpan̄ utọn̄ ẹkop eti mbụk Obio Ubọn̄ Abasi. Mma n̄kere nte, ‘Ubaha-e n̄kpanamde utom ke utọ efakutom oro!’ Nneme oro ama anam mi, oro n̄kedide isua 13 ini oro, nnyene udọn̄ ndidi isụn̄utom.

NTE ededi, ubon nnyịn ẹma ẹtọtọn̄ọ ndikpep n̄kpọ mban̄a Jehovah anyan ini mbemiso emi. Usenubọk kiet ke 1939, n̄kparawa iba oro ẹkesịnede n̄kpọ ediye ediye ẹma ẹdikọn̄ usụn̄ufọk nnyịn ke Hemel Hempstead, ke mbọhọ Greater London ke England. Mmọ ẹkedi Mme Ntiense Jehovah. Ami n̄kamana ke 1938, ntre ntịghi ini oro mmọ ẹkedide ufọk nnyịn. Man osio mmọ unyọn̄ọ, Mama ama asian mmọ ke Papa akpama ndikop ikọ mmọ edi ke enye edinyọn̄ edi n̄kanika usụkkiet okoneyo. Idem akakpa Mama didie ntem ndikụt mmọ ẹfiakde ẹdi okoneyo oro! Ke Henry Winfield, ete mi, ama okodụn̄ọrede okụt ke mmọ ẹda san̄asan̄a ke mbubehe ukaraidem ye ufreidụt, enye ama okot mmọ ẹdụk ẹdi ufọk onyụn̄ enyịme ukpepn̄kpọ Bible. Enye ama anam usọp usọp n̄kọri tutu ana baptism. Ke ndusụk isua ẹma ẹkebe, Kathleen eka mi ama ọtọn̄ọ ndikpep Bible n̄ko. Enye ama ana baptism ke 1946.

Ke 1948, mma ntọn̄ọ ndibuana kpukpru ini ke utom edikwọrọ eti mbụk Obio Ubọn̄ Abasi. Mma mfiọk ke mmoyom n̄kanika ubọk man n̄kpekeme nditọt nnennen ibatutom an̄wautom. Ke ini nnyịn ikakamade idem ukpono ukpono, ete ye eka nnyịn ẹma ẹsinọ nnyịn sisi kpukpru Saturday nte okụk ekpatọfọn̄. Mma nsifam sisi mi nnịm ke se ikperede ndisịm isua iba man n̄kpada ndep n̄kanika itọn̄ubọk oro ekememde urua  akan ini oro. Nte ededi, Ray udọeka mi ama esiwak ndidọhọ Papa ọnọ imọ trọ iba, utu ke sisi. Usen kiet enye ama ọsọn̄ọ eyịre ete ẹnọ imọ trọ iba tutu Papa ayat esịt. Ray ama ọtọn̄ọ nditua onyụn̄ ọdọhọ ke imọ ikoyom trọ iba ke ntak ediomi oro imọ ikanamde ye Jehovah. Ke akpatre, Ray ama anam an̄wan̄a ete: “Trọ kiet enyene ekebe etịbe, enye eken enyene mi.” Mmọn̄eyet idatesịt ama asiaha Mama ke enyịn, ndien Papa ama ọsọsọp ọdọhọ ẹnọ enye trọ iba, mma nnyụn̄ n̄kpep nte edide akpan n̄kpọ nditịp okụk nda n̄n̄wam utom Obio Ubọn̄.

Kan̄a ke emi, Papa ama anam ndutịm ndiwọrọ n̄ka ebiet oro ẹkenen̄erede ẹyom mme anditan̄a Obio Ubọn̄. Ke 1949, enye ama anyam in̄wan̄ esie ye itie oro enye ekesinyamde ntan ye itiat onyụn̄ ọtọn̄ọ utom usiakusụn̄, nte asan̄autom uyọhọ ini Mme Ntiense Jehovah. Mma nna baptism ke September 24, 1950 ndiwụt ke mma nyak idem nnọ Jehovah. Ọtọn̄ọde ke ini oro ka iso, ke ini nduọkodudu ndaeyo, mma nsinam utom usiakusụn̄ ini nduọkodudu (ẹkotde idahaemi usiakusụn̄ unọ un̄wam), ndade hour 100 n̄kwọrọ ikọ ke ọfiọn̄. Edi oro akakam edi ntọn̄ọ. Ikebịghike, ama enen̄ede ọdọn̄ mi ndinam ekese ke nditat utuakibuot akpanikọ.

Ọdọn̄ Mi Ndidi Isụn̄utom

Ke 1951, ẹma ẹdọhọ Papa ọwọrọ aka Bideford ke North Devon ọkọkwọrọ ikọ. Ibịghike ke ima ikesịm do, isụn̄utom oro akanamde utom ke Africa ama edi edise esop nnyịn, nte n̄kobụkde ke ntọn̄ọ. Ke oro ebede, udọn̄ oro n̄kenyenede ndidi isụn̄utom ama otụk kpukpru ubiere mi. Mme andikpep ke ufọkn̄wed ẹma ẹfiọk utịtmbuba mi ẹnyụn̄ ẹnam kpukpru se ẹkekemede man mfre mban̄a enye, ẹkerede ke nyebịne utịtmbuba ererimbot. Nte ededi, ke akpatre usen mi ke ufọkn̄wed, ke ini n̄kakade ọfis mme andikpep man n̄kọkọm mmọ unyọn̄, kiet ke otu mmọ ama ọdọhọ ete: “Amanam etieti! Afo edi n̄kukụre eyen ufọkn̄wed oro enen̄erede enyene utịtmbuba ke uwem. Nnyịn imenịm ke eyesịm utịtmbuba fo.”

Ye unana ubiatini, mma nnyene utom ibio ini, nnyụn̄ n̄kabade ndi asiakusụn̄ ofụri ini ke December 1, 1955. Nte ini akakade, Mama ye nditọeka mi iren ẹma ẹkabade ẹdi mme asiakusụn̄ n̄ko. Kpukpru owo ke ubon nnyịn ẹma ẹnam utom uyọhọ ini ke ediwak isua.

Ndika Ireland

Ke 1956, ẹma ẹdọhọ mi n̄ka n̄kọkwọrọ ikọ ke Ireland. Emi ekedi usio-ukot oro edinamde mi nsịm utịtmbuba mi, emi ekedide utom isụn̄utom. Ke February 1957, ami ye June Napier ye Beryl Barker, n̄kaiferi ẹdide mme asiakusụn̄, ima idibehe ke obio Cork ke usụk usụk Ireland.

Ama ọsọn̄ ndikwọrọ ikọ ke Ireland. Ufọkabasi Roman Catholic ama enen̄ede ọbiọn̄ọ nnyịn. Nnyịn ima isikụt ite ke ufọk m̀mê okụre oro ikodụkde ama enyene usụn̄ oro idisan̄ade iwọrọ, edieke akanade ikpọn̄ ke mbuari. Nnyịn ima isidịp enan̄ukwak nnyịn oyom usụn̄ ọkpọn̄ ufọk oro ikodụkde, edi ẹma ẹsiwak ndikụt ebiet oro ikedịpde mmọ, ẹsinyụn̄ ẹsịbe mme ọkpọ enan̄ukwak m̀mê ẹsion̄o ofụm ke mmọ.

Ini kiet, ke adan̄aemi ami ye Beryl ikodụkde  akwa okụre kiet, nditọwọn̄ ẹma ẹtọn̄ọ ndisụn̄i nnyụn̄ ntomo nnyịn ke itiat. Ntre nnyịn ima iwaha idụk ufọkurua oro ẹsinyamde mmọn̄eba; ufọkurua emi okodu ke ufọk owo. Otu mbon ntịme ẹma ẹtọn̄ọ ndisop idem ke an̄wa ufọkurua oro. Sia Beryl akamade mmọn̄eba, enye ama ọn̄wọn̄ akrasi iba m̀mê ita sụn̄sụn̄, ekerede ke otu mbon ntịme oro ẹyenyọn̄ọ. Mmọ ikọnyọn̄ke. Ekem, akparawa oro edide oku ama odụk edi ufọkurua oro. Sia ekekerede ke idi mme akaisan̄, enye ama ọdọhọ ke ikpama ndida nnyịn nsan̄a n̄wụt n̄kpọ. Nte ededi, enye ekebem iso ada nnyịn odụk ubet en̄wen ke ufọk oro, ndien nte nnyịn iketiede do sụn̄-n̄, enye ama ọbọn̄ akam ọnọ akanieren kiet oro okoyomde ndikpa onyụn̄ eyet enye aran. Ekem, nnyịn ima itiene oku oro iwọrọ ke ufọk oro. Ke ini mbon ntịme oro ẹkekụtde nte inemede nneme ye oku oro, mmọ ẹma ẹdaha ẹnyọn̄ọ.

Ndika Gilead

Ẹma ẹben̄e idem ndinịm Mbono Uduak Abasi eke Ofụri Ererimbot ke New York ke 1958. Papa ama aduak, ami mma nyom nditiene n̄ka, edi n̄kenyeneke okụk. Ekem eka ete mi ama akpa ke mbuari, akpa ọkpọn̄ bọn 100. Uka ye unyọn̄ọ mbono oro ekedi bọn 96, ntre mma nsọsọp n̄kekpe okụk ubomofụm.

Mbemiso ikadahade, andida ke ibuot n̄kọk itieutom Mme Ntiense Jehovah ke Britain ama edi edise nnyịn onyụn̄ ọdọhọ kpukpru mme akpan asiakusụn̄ oro ẹdikade mbono oro ẹsịn n̄wed eben̄e ubọ ukpep isụn̄utom ke Ufọkn̄wed Enyọn̄-Ukpeme Ukpep Bible eke Gilead. Idem ama akpa mi ndikop emi! Enye ama ọnọ kpukpru owo n̄wed eben̄e edi ikọnọhọ mi. Mma n̄kpri n̄kaha ndika Gilead. Edi mma ndọhọ enye ọnọ mi n̄wed eben̄e, nsian enye ke mma n̄kpọkpọn̄ obio emana mi ndinam utom ke obio en̄wen, ndien ke emi akakam owụt ke nnam utom isụn̄utom. Ke enye ama okokụt ke mmenen̄ede mbiere ndika Gilead, enye ama ọnọ mi n̄wed eben̄e oro. Mma nnen̄ede mbọn̄ akam nte ẹda mi. Abasi ama ọbọrọ akam mi inikiet inikiet, ntre ẹma ẹkot mi ndi Gilead.

Esịt ama enen̄ede enem mi ke ini ẹkesịnde mi enyịn̄ ọkọrọ ye asiakusụn̄ 81 en̄wen, oro ẹtode idụt 14, ndidụk ọyọhọ otu 33 eke Gilead. Ukpep ọfiọn̄ ition oro ama ọsọsọp edisịm utịt. Ke ekperede utịt ufọkn̄wed oro, Brọda Nathan H. Knorr ama ada ofụri hour inan̄ ọnọ edemede-owo-udọn̄ utịn̄ikọ. Enye ama esịn udọn̄ ọnọ mbon oro ẹdikemede nditie ye unana edidọ ndọ ẹnam ntre. (1 Corinth 7:37, 38) Edi enye ama ọdọhọ nnyịn oro ikenyenede udọn̄ ndidọ ndọ ke ini iso ete iwet se iyomde ito owo oro edidotde ndidi nsan̄a ndọ nnyịn. Ekem, ke ini ikụtde owo oro iyomde ndidọ, ida se ikewetde idụn̄ọde ise m̀mê enye odot.

Se n̄koyomde nto owo oro edidide ebe mi ẹma ẹsịne se itienede emi. Enye ekpedi ekemmọ isụn̄utom onyụn̄ ama Jehovah, enen̄ede ọfiọk akpanikọ Bible akan mi, enyịme nditre ndinyene  nditọ mbemiso Armageddon man ika iso ke utom uyọhọ ini, ekeme nditịn̄ Ikọmbakara udọn udọn, onyụn̄ ọsọn̄ọ mi ke isua emana. Mme n̄kpọ emi ẹma ẹnen̄ede ẹn̄wam mi, kpa n̄kaiferi isua 20 oro ekeben̄ede idem ndika idụt oro oyomde usụn̄ n̄kọkwọrọ ikọ.

Ndika Brazil

Nnyịn ima ikụre ukpep ke Sunday August 2, 1959 ẹnyụn̄ ẹsian nnyịn efakutom nnyịn. Ẹkenọ mi, Vehanouch Yazedjian, Sarah Greco, Ray ye Inger Hatfield, Sonia Springate, ye Doreen Hines ika Brazil. Esịt ama enen̄ede enem nnyịn. N̄kekere ke ndikụt akai, urụkikọt, eto ọkpọ, ye amanaisọn̄ India do. Edi, n̄kpọ okokpụhọrede didie ntem ke ini n̄kedide ndibehe! Utu ke ikpọ akai Amazon, n̄kokụt ediye akwa obio eyomfịn emi ẹkotde Rio de Janeiro, emi ekedide ibuot obio Brazil ini oro.

Akpa n̄kpọ-ata oro ikosobode ekedi ndikpep usem Portuguese. Ke akpa ọfiọn̄ oro, nnyịn ikada hour 11 kpukpru usen ikpep usem oro. Ke ima ikọkwọrọ ikọ ke Rio de Janeiro inyụn̄ idụn̄ esisịt ini ke n̄kọk itieutom Mme Ntiense Jehovah do, ẹma ẹdọhọ n̄kodụn̄ ke ufọkidụn̄ isụn̄utom ke Piracicaba ke Stet São Paulo, ndien ekem ke ufọkidụn̄ isụn̄utom ke Porto Alegre ke Stet Rio Grande do Sul.

Ekem, ke ntọn̄ọ ntọn̄ọ 1963, ẹma ẹkot mi ndinam utom ke Itieutom Ukabade N̄wed ke n̄kọk itieutom. Floriano Ignez da Conceição, emi ekekpepde nnyịn usem Portuguese ke ini ikedide idibehe, ekese enyịn ke itieutom emi. Enye ọkọbọ akpanikọ ke 1944, ke ini n̄kpọ nte Mme Ntiense 300 ẹkedude ke Brazil, enye okonyụn̄ odụk ọyọhọ otu 22 eke ufọkn̄wed Gilead. Usen kiet ke ndusụk ọfiọn̄ ẹma ẹkebe, Brọda Conceição ama ọdọhọ mbet ke utom usenubọk asuanade ke imọ imenyene se iyomde ndineme ye ami. Ke akpa, esịt ama etịmede mi. Mma n̄kere m̀mê enyene se n̄kanamde ndue. Ke ini n̄kanika udia uwemeyo akamiade, mma mbụp enye m̀mê nso ke enye okoyom ndineme ye ami. Enye ama obụp mi ete, “Ndi ọyọdọ mi?” N̄kekemeke uyo ndisioro. Mma ndọhọ enye ọnọ mi ini n̄kekere mban̄a n̄kpọ emi, nnyụn̄ ndaha usọp usọp n̄ka udia uwemeyo.

Floriano idịghe akpa eyenete oro okobụpde mi ndọ. Nte ededi, tutu esịm ini oro enye okobụpde mi ndọ, n̄kekwe owo ndomokiet oro ekesịmde se n̄koyomde nto owo oro n̄kpamade ndidọ. Mmenịm ke se n̄koyomde nto owo oro n̄kpamade ndidọ ẹma ẹn̄wam mi n̄kûnam idiọk ubiere. Edi isan̄ enye emi ama okpụhọde. Floriano ama esịm kpukpru n̄kpọ oro n̄koyomde nto owo oro n̄kpamade ndidọ! Ntre nnyịn ima idọ ndọ ke May 15, 1965.

Ndiyọ N̄kpọ-Ata Oro Udọn̄ọ Adade Edi

Ami ye Floriano imokop inem ndọ kpa ye mme n̄kpọ-ata oro isobode. Kiet ke otu mmọ edi unana nsọn̄idem Floriano, emi ọkọtọn̄ọde esisịt ini mbemiso idọde ndọ. Ediwak isua ke edem, obufre esie n̄kan̄ ubọk ufien ama enyene mfịna, ndien ke emi, obufre oro ama ọtọn̄ọ ndinen̄ede ntụhọde enye. Ke ntak oro, nnyịn ima ikpọn̄ Bethel ẹnyụn̄ ẹdọhọ nnyịn ikanam utom nte mme akpan asiakusụn̄ ke akwa obio Teresópolis, ke obot obot ikpehe Stet Rio de Janeiro. Nnyịn ikekere ke idaha eyo ebiet emi ayan̄wam enye okop nsọn̄idem.

Ke adianade do, ke December 1965, ẹma ẹsian mi ke kansa ọnọmọ eka mi. Nnyịn ima isiwet kiet eken kpukpru ini, edi n̄kekwe Mama ke isua itiaba. Ntre enye ama ọnọ nnyịn okụk ukpeusụn̄ ete idi England idise imọ. Mbiausọbọ ẹma ẹsiak Mama idem, edi mmọ ikekemeke ndisio kansa oro mfep. Okposụkedi enye ọkọdọn̄ọde idiọk idiọk mîkonyụn̄ ikemeke ndidaha nda, enye okosụk enyenyene udọn̄ ndikwọrọ ikọ. Enye ama enyene ukwak utaip n̄wed ke ubet esie oro ẹkesidade ẹtaip se enye ekesitịn̄de. Enye ama esinyụn̄ ọnọ mbon oro ẹsidide ẹdise enye ibio ibio ikọ ntiense. Enye akakpa ke November 27, 1966. Enye ama ọtọt hour duop oro enye akadade ọkwọrọ ikọ ke ọfiọn̄ oro. Papa ama aka iso ọsọn̄ọ ada anam utom usiakusụn̄ tutu ini emi enye akakpade ke 1979.

Ke Mama ama akakpa, ami ye Floriano ima ifiak inyọn̄ Brazil, ndien mi ke nnyịn isụk idu ikwọrọ ikọ ke Stet Rio de Janeiro. Ke ntọn̄ọ ntọn̄ọ, ẹkedọhọ nnyịn inam utom circuit ke ibuot obio, edi ikanam emi ke esisịt ini koro Floriano  ama afiak ọdọn̄ọ idiọk idiọk. Do, ima ifiak inyọn̄ Teresópolis ikanam utom nte mme akpan asiakusụn̄.

Ke Floriano ama ọkọbọ ubiak ubiak usọbọ ke ediwak isua, ke akpatre mbiausọbọ ẹma ẹdisio obufre n̄kan̄ ubọk ufien oro ekenyenede mfịna ẹfep ke 1974. Ke ini oro, enye ikekemeke ndinam utom nte esenyịn oro etiede ibuot m̀mê nte akpan asiakusụn̄, edi ama esinịm mme ukpepn̄kpọ Bible ye mme owo ke ini oro ẹkesikade ẹkese mbon udọn̄ọ ke ufọkibọk—enye ama enịm ukpepn̄kpọ Bible kiet ke Ikọmbakara ye Bob, akanieren kiet oro otode America. Bob ama ọbọ akpanikọ onyụn̄ ana baptism ke ukperedem. Idem ama ọtọn̄ọ ndisọn̄ Floriano sụn̄sụn̄, ndien enye amaka iso anam utom usiakusụn̄ ofụri ini toto ke ini oro.

Jehovah Ọdiọn̄ Utom Ukwọrọikọ Mi

Mmaka iso ndinam utom nte akpan asiakusụn̄ ke ediwak isua emi ẹbede mi, ndien Jehovah ọmọdiọn̄ utom ukwọrọikọ mi. Mma nnyene utịbe utịbe ifet ndin̄wam se iwakde ibe owo 60 ke obio Teresópolis ẹyak idem mmọ ẹnọ Jehovah. N̄wan oro ekerede Jupira emi n̄kekpepde n̄ko nte ẹkotde n̄wed edi kiet ke otu mmọ. Nte ini akakade, mma n̄kpep n̄kpọ ye ikpọ nditọ esie itiaita. Nte utịp, Jupira ye se iwakde ibe mbonubon ye iman esie 20 ke ẹnam n̄kpọ Jehovah ifịk ifịk mfịn. Kiet edi ebiowo, ita ẹdi mme asan̄autom unamutom, ke adan̄aemi iba ẹdide mme asiakusụn̄.

Mmekpep ndinyene in̄wan̄-in̄wan̄ edu ke mme owo ẹyema ndibọ akpanikọ. Isan̄ kiet, ke ini n̄kekpepde Bible ye n̄kaiferi ekerede Alzemira, Antônio ebe esie ama ọdọhọ ke imọn̄ inam ikpọ ebua iba ẹdom mi edieke mmen̄wọrọke ke ufọk mmimọ iwiwa. Ke oro ebede, n̄kesisoboke aba ye Alzemira kpukpru ini ibọhọke ke isua itiaba ẹma ẹkebe, ke ini Antônio ekenyịmede mfiak n̄kpep enye n̄kpọ. Kpa ye oro, Antônio ikamaha mi nnyene nneme Bible ye imọ. Nte ededi, usen kiet oro edịm ekedepde, mma n̄kot Antônio editiene abuana ke ukpepn̄kpọ Bible. Ini oro ndien ke n̄kedi ndifiọk ke mfịna esie ekedi ke enye ikekemeke n̄wed ndikot. Tọn̄ọ ke ini oro ka iso, Floriano ye mbon en̄wen ẹma ẹkpep enye Bible ye nte enye ekemede ndikot n̄wed. Mfịn, Alzemira ye Antônio ẹdi mbon oro ẹma ẹkena baptism. Antônio enen̄ede an̄wam esop esinyụn̄ etiene ediwak uyen ọwọrọ an̄wautom.

Mmọ emi ẹdi ifiọkutom ifan̄ oro ikenyenede ke se iwakde ibe isua 20 oro ikọkwọrọde ikọ ke obio Teresópolis. Ke ntọn̄ọ ntọn̄ọ 1988, ẹma ẹnọ nnyịn obufa efakutom—obio Niterói, emi nnyịn ikọkwọrọde ikọ ke isua ition mbemiso ikọwọrọde ika obio Santo Aleixo. Ekem ẹma ẹdọhọ nnyịn iwọrọ ika Esop Japuíba ke ufọt ufọt Stet Rio de Janeiro, ima inyụn̄ inyene ifet nditọn̄ọ Esop Ribeira do.

Ndidu Mmemmem Uwem Oro Ọnọde Uyụhọ

Ke mme isua oro ẹbede mi, ami ye Floriano imenyene ifet ndin̄wam se iwakde ibe owo 300 ẹyak idem mmọ ẹnọ Jehovah. Idahaemi, ndusụk mmọ ẹnam utom ke n̄kọk itieutom, ndusụk ẹdi mme asiakusụn̄, mbiowo, ye mme asan̄autom unamutom. Mmenen̄ede n̄kọm Abasi koro enye ada edisana spirit esie anam nnyịn in̄wam ata ediwak owo.—Mark 10:29, 30.

Edi akpanikọ ke Floriano ọmọyọ idiọk udọn̄ọ. Kpa ye udọn̄ọ esie, enye aka iso ọsọn̄ọ ada, okop idatesịt, onyụn̄ ọbuọt idem ke Jehovah. Enye esiwak ndidọhọ ete: “Idịghe uwem unana mfịna anam owo okop inemesịt mfịn. Inemesịt oto Jehovah ndin̄wam nnyịn iyọ mme mfịna nnyịn.”—Psalm 34:19.

Ke 2003, ẹma ẹkụt kansa ke enyịn mi n̄kan̄ ubọk ufien. Ẹma ẹsiak mi enyịn ẹnyụn̄ ẹsịn enyịn oro ẹnamde ke ubọk, ndien nnyene ndikwọhọde enye ediwak ini kpukpru usen. Kpa ye emi, Jehovah ọnọ mi odudu ndika iso nnam n̄kpọ esie nte akpan asiakusụn̄.

Ke se iban̄ade n̄kpọ obụkidem, ami mmaka iso ndidu mmemmem uwem. Edi, Jehovah ọmọdiọn̄ mi ke utom isụn̄utom mi onyụn̄ anam mi nnyene inyene eke spirit. Se eyenete an̄wan oro edide isụn̄utom eketịn̄de aban̄a utom ukwọrọikọ ke Africa etịm odot ye utom ukwọrọikọ nnyịn mi ke Brazil. Ke akpanikọ, Jehovah enen̄ede oyụhọ udọn̄ oro n̄kenyenede ndidi isụn̄utom!

[Ndise ke page 9]

Ami ye ubon nnyịn ke 1953

[Ndise ke page 9]

Ndinọ ikọ ntiense ke Ireland ke 1957

[Ndise ke page 10]

Ami ye ekemmọ mme isụn̄utom ke Brazil ke 1959. Ọtọn̄ọde ke ufien aka nnasia: Ami, Inger Hatfield, Doreen Hines, ye Sonia Springate

[Ndise ke page 10]

Ami ye ebe mi