Abasi Enen̄ede Ekere Aban̄a Fi

EDI ndammana n̄kpọ ndiseme n̄kot Abasi ke ini idude ke nnanenyịn. Kamse, enye “omokpon, omonyụn̄ ọsọn̄ odudu: ifiọk esie akan nte owo obụkde.” (Psalm 147:5) Enye enen̄ede ekeme ndin̄wam nnyịn iyọ mme mfịna nnyịn. Ke adianade do, Bible esịn udọn̄ ọnọ nnyịn ete ‘in̄wan̄a esịt nnyịn’ inọ enye. (Psalm 62:8) Ntak ndien ata ediwak owo ẹkerede ke Abasi isibọrọke akam mmimọ? Nte oro owụt ke enye ikereke iban̄a mme owo?

Utu ke ndisọsọp nduọhọ Abasi ke ini etiede nte ke enye inyeneke se anamde, ti ini emi ekedide eyenọwọn̄. Ke ini ete ye eka fo mîkesinọhọ fi kpukpru se okoyomde, ndi akanam ama ọdọhọ ke mmọ imaha fi? Ediwak nditọwọn̄ ẹsidọhọ. Nte ededi, ke afo ama ọkọkọri okpon, afo ama edifiọk ke ẹsiwụt ima ke ediwak usụn̄ ye nte ke ndinam kpukpru se eyenọwọn̄ oyomde inen̄ekede idi ediwụt ima.

Kpasụk ntre, edieke Jehovah mîsibọrọke akam nnyịn kpukpru ini ke usụn̄ oro nnyịn imade, oro iwọrọke ke enye ofofụmi nnyịn. Se idude edi nte ke ediwak usụn̄ ẹdu oro Abasi adade ekere aban̄a kpukpru nnyịn.

‘Nnyịn Idu Uwem ke Enye’

Akpa kan̄a, Abasi anam nnyịn ‘idu uwem inyụn̄ isan̄a inyụn̄ inyene uwem.’ (Utom 17:28) Enye ndinọ nnyịn uwem enen̄ede owụt ima ima usụn̄ oro enye ekerede aban̄a nnyịn!

Ke adianade do, Jehovah ọnọ se nnyịn iyomde man ika iso idu uwem. Nnyịn ikot ite: “Enye anam mbiet etịbe ọnọ ufene, ye ikọn̄ emi owo anamde utom ke esịt, man osio udia ke isọn̄.” (Psalm 104:14) Ke akpanikọ, Andibot nnyịn inọhọ mme n̄kpọ udu uwem kpọt. Edi enye atat ubọk ọnọ nnyịn ‘edịm heaven ye ini eduek, onyụn̄ ọnọ nnyịn udia, anam esịt nnyịn ọyọhọ ye idatesịt.’—Utom 14:17.

Edi, ndusụk owo ẹkeme ndikere, ‘Edieke Abasi amade nnyịn ntre, ntak emi enye ayakde nnyịn ikụt ndutụhọ?’ Ndi afo ọmọfiọk ibọrọ mbụme emi?

Ndi Abasi Edi Ntak?

Mme owo ẹda ekese ndutụhọ oro ẹsisịmde mmọ ẹsọk idem. Ke uwụtn̄kpọ, mme owo ẹtịm ẹfiọk nte ndusụk edinam ẹnen̄erede ẹkama n̄kpọndịk. Edi, mme owo ke ẹnanam oburobụt ido idan̄, ẹn̄wọn̄ n̄kpọsọn̄ mmịn ye n̄kpọsọn̄ ibọk ke idiọk usụn̄, ẹsịn un̄wọn̄ m̀mê ẹn̄wọn̄ sika, ẹbuana ke mme enyene-ndịk mbre mbuba, ẹwat ubomisọn̄ ọsọp akaha, ye ntre ntre eken. Edieke utọ idiọk usụn̄ uwem oro osụn̄ọde ke ndutụhọ, anie edi ntak? Ndi Abasi m̀mê owo oro odude ndisịme uwem? Ikọ Abasi eke odudu spirit ọdọhọ ete: “Ẹkûyak ẹbian̄a mbufo; owo ikemeke ndibian̄a Abasi: se ededi owo ọtọde, oro ke enye edinyụn̄ ọdọk.”—Galatia 6:7.

Ke adianade do, mme owo ẹsinam ekemmọ owo ibak. Ke ini idụt kiet ebierede ndin̄wana ekọn̄, ke akpanikọ, idịghe Abasi edi ntak ndutụhọ oro esitode ekọn̄ oro. Ke ini abiatibet an̄wanade ye ekemmọ owo, ndi Abasi edi ntak unan m̀mê n̄kpa oro ekemede ndisụn̄ọ nto oro? Baba! Ke ini akara ukara ufịk efịkde, otụhọrede, onyụn̄ owotde mbon oro enye akarade, nte ikpenyene ndiduọhọ Abasi? Oro ikpowụtke eti ibuot.—Ecclesiastes 8:9, NW.

Nso ndien kaban̄a ediwak miliọn owo oro ẹdide ọkpọikpọi ubuene m̀mê oro ẹtiede biọn̄? Ndi Abasi edi ntak? Baba. Isọn̄ nnyịn ọnọ udia oro awakde ekem kpukpru owo. (Psalm 10:2, 3; 145:16) Mme owo nditre ndideme akpakịp enọ Abasi ukem ukem anam  biọn̄ ye ubuene ẹdu. Ibụk ibụk uwem mme owo inyụn̄ iyakke ẹkọk mfịna emi.

Ata Akpan Ntak

Anie ndien ke ẹkpeduọhọ ke ini owo ọdọn̄ọde m̀mê akpade ke ntak usọn̄? Ndi akpa fi idem ndifiọk ke isụk idịghe Abasi edi ntak? Abasi ikobotke owo man ọsọn̄ onyụn̄ akpa.

Ke ini ekenịmde akpa eren ye n̄wan oro, Adam ye Eve, ke in̄wan̄ Eden, Jehovah ama ọnọ mmọ idotenyịn edidu uwem ke nsinsi ke paradise isọn̄. Nte ededi, enye ekenen̄ede oyom isọn̄ ọyọhọ ye mbon oro ẹdiwụtde esịtekọm ẹban̄a se imọ inọde mmọ. Ntem, enye akanam idotenyịn uwem ini iso mmọ ọkọn̄ọ ke n̄kpọ. Adam ye Eve ẹkpedụn̄ ke Paradise adan̄a nte mmọ ẹkade iso ẹkop uyo ima ima Andibot mmọ.—Genesis 2:17; 3:2, 3, 17-23.

Ke mfụhọ, Adam ye Eve ẹma ẹsọn̄ ibuot. Eve ekemek ndikop uyo Satan kpa Devil. Satan ama abian̄a enye ndien ke nditịm ntịn̄ ọdọhọde ke Abasi ikayakke enye enyene eti n̄kpọ oro enye ekpenyenede. Ntre, enye ama ọtọn̄ọ uwem nda-ke-idem onyụn̄ odomo ‘nditie nte Abasi, mfiọk eti ye idiọk.’ Adam ama etiene enye ọsọn̄ ibuot.—Genesis 3:5, 6.

Ke mmọ ẹma ẹkenam idiọkn̄kpọ emi, Adam ye Eve ẹma ẹwụt ke mmimọ idotke ndidu uwem ke nsinsi. Mmọ ẹma ẹbọ ndiọi utịp idiọkn̄kpọ mmọ. Odudu mmọ ama ọtọn̄ọ ndisụhọde ndien ke akpatre mmọ ẹma ẹkpan̄a. (Genesis 5:5) Nte ededi, nsọn̄ibuot mmọ ama ada ndiọi utịp efen efen edi. Nnyịn ke ibọbọ ufen ke ntak idiọkn̄kpọ Adam ye Eve. Apostle Paul ekewet ete: ‘Idiọk-n̄kpọ okoto owo kiet, Adam, odụk ke ererimbot, n̄kpa onyụn̄ oto ke idiọk-n̄kpọ oro odụk; n̄kpa onyụn̄ ebe esịm kpukpru owo, koro kpukpru owo ẹma ẹnam idiọk-n̄kpọ.’ (Rome 5:12) Ih, ke ntak nsọn̄ibuot Adam ye Eve, idiọkn̄kpọ ye n̄kpa ẹbe nte idiọk udọn̄ọ ẹsịm ofụri ubonowo.

Akakan Uyarade Oro Owụtde ke Abasi Ekere Aban̄a Nnyịn

Ndi oro ọwọrọ ke edibotn̄kpọ Abasi edide owo ama abiara taktak? Baba, ndien mi ke nnyịn ikụt akakan uyarade oro owụtde ke Abasi ekere aban̄a nnyịn. Abasi ama ayak ata akamba n̄kpọ atak enye man  ọnọ ufak oro edisiode ubonowo ke idiọkn̄kpọ ye n̄kpa. Ufak oro ekedi mfọnmma uwem Jesus, oro ẹkenọde ke unyịmesịt ke ibuot nnyịn. (Rome 3:24) Apostle John ekewet ete: “Abasi akamama ererimbot ntem, tutu Enye osio ikpọn̄-ikpọn̄ Eyen emi Enye obonde ọnọ, man owo ekededi eke ọbuọtde idem ye Enye okûtak, edi enyene nsinsi uwem.” (John 3:16) Ke ntak n̄wọrọnda ima emi, nnyịn imafiak inyene idotenyịn edidu uwem ke nsinsi. Paul ekewet ọnọ mbon Rome ete: “[Oto] ke ndudue kiet ke ẹbiom kpukpru owo ikpe; kpa ntre n̄ko oto ke utom edinen ido kiet ke ẹnọ mfọn esịm kpukpru owo, ẹtebe mmọ ikpe ke uwem.”—Rome 5:18.

Nnyịn imekeme ndinịm ke akpanikọ nte ke edikem ini Abasi, ndutụhọ m̀mê n̄kpa ididụhe aba ke ekondo Isọn̄. Utu ke oro, mme idaha oro ẹkebemde iso ẹtịn̄ ẹban̄a ke n̄wed Ediyarade ẹyesu. “Sese, ebiet idụn̄ Abasi omodu ye owo. Enye oyonyụn̄ odụn̄ ye mmọ; ndien mmọ ẹyedi ikọt Esie, Abasi ke Idem Esie oyonyụn̄ odu ye mmọ, onyụn̄ edi Abasi mmọ. Enye ọyọkwọhọde kpukpru mmọn̄eyet ke enyịn mmọ efep. N̄kpa idinyụn̄ idụhe aba; eseme ye ntuan̄a ye ubiak idinyụn̄ idụhe aba; koro ebe-iso n̄kpọ ẹma ẹbe ẹfep.” (Ediyarade 21:3, 4) Afo emekeme ndidọhọ, ‘Ami ndidụhe uwem n̄kụt utọ ini oro.’ Nte ededi, afo emekeme ndidu n̄kụt. Ndien idem edieke afo akpade, Abasi ekeme ndinam fi eset. (John 5:28, 29) Se Abasi aduakde ọnọ nnyịn edi oro, ndien se idinyụn̄ itịbede edi oro. Akwan̄a didie ntem ndidọhọ ke Abasi ikereke iban̄a ubonowo!

‘San̄a Kpere Abasi’

Edi n̄kpọ ndọn̄esịt ndifiọk ke Abasi ama anam ndutịm oro editrede ndutụhọ ubonowo ke nsinsi. Nso ndien kaban̄a idahaemi? Nso ke nnyịn ikeme ndinam ke ini owo ima nnyịn akpade m̀mê ke ini eyen nnyịn ọdọn̄ọde? Nte ededi, ikemke kan̄a ini Abasi ndisio udọn̄ọ ye n̄kpa mfep. Bible owụt ke nnyịn inyene ndibet esisịt mbemiso oro etịbede. Edi Abasi ikpọn̄ke nnyịn. Mbet oro James ọkọdọhọ ete: “Ẹsan̄a ẹkpere Abasi, ndien enye ayasan̄a ekpere mbufo.” (James 4:8) Ih, Andibot nnyịn esịn udọn̄ ọnọ nnyịn ete inyene ọkpọkpọ n̄kpet n̄kpet itie ebuana ye imọ, ndien mbon oro ẹnamde emi iditreke ndikụt un̄wam esie idem ke ini mmọ ẹsobode ata n̄kpọsọn̄ idaha.

Didie ke nnyịn ikeme ndisan̄a n̄kpere Abasi? Edidem David ama obụp ukem mbụme emi ke n̄kpọ nte tọsịn isua ita oro ẹkebede, ete: “Jehovah, . . . anie editie ke edisana obot fo?” (Psalm 15:1) David ama ọbọrọ mbụme esie ke ndika iso ndọhọ nte: “Owo eke asan̄ade nte ọfọnde ama, onyụn̄ amade edinen ido, onyụn̄ ọdọhọde akpanikọ ke esịt esie. Owo eke mîdọkke edidọk ke edeme esie; mînyụn̄ inamke ufan esie idiọk.” (Psalm 15:2, 3) Ke nditịm ntịn̄, Jehovah adara mbon oro ẹnamde se Adam ye Eve mîkamaha ndinam. Enye asan̄a ekpere mbon oro ẹnamde uduak esie.—Deuteronomy 6:24, 25; 1 John 5:3.

Didie ke nnyịn ikeme ndinam uduak Abasi? Nnyịn inyene ndikpep “se ifọnde inyụn̄ inemde Abasi Andinyan̄a nnyịn esịt,” inyụn̄ ibiere ndidu uwem ekekem ye oro. (1 Timothy 2:3) Oro abuana ndinyene nnennen ifiọk Ikọ Abasi, kpa Bible. (John 17:3; 2 Timothy 3:16, 17) Emi oyom se ikande edikot Bible enyọn̄ enyọn̄. Nnyịn inyene ndikpebe mme Jew eke akpa isua ikie ke Beroea oro ẹkekopde ukwọrọikọ Paul. Nnyịn ikot iban̄a mmọ ite: “Mmọ ẹkop ikọ ke edinyịme esịt, ẹnyụn̄ ẹdụn̄ọde n̄wed Abasi ke usen ke usen, ẹte ifiọk m̀mê mme ikọ oro ẹkem ntre.”—Utom 17:11.

Kpasụk ntre mfịn, nditịn̄ enyịn n̄kpep Bible ọyọsọn̄ọ mbuọtidem oro inyenede ke Abasi onyụn̄ an̄wam nnyịn ndinyene n̄kpet n̄kpet itie ebuana ye enye. (Mme Hebrew 11:6) Enye n̄ko ayan̄wam nnyịn ndinen̄ede mfiọk nte Jehovah anamde n̄kpọ ye ubonowo—idịghe ke ufọn ibio ini kpọt, edi akpan akpan ke nsinsi ufọn kpukpru mbon oro ẹnyenede eti esịt.

Kop se ibat ibat Christian oro ẹnyenede n̄kpet n̄kpet itie ebuana ye Abasi ẹtịn̄de. Danielle, emi edide isua 16 ọdọhọ ete: “Mmama Jehovah etieti, ndien mmenyene ekese ndikọm  enye mban̄a. Enye ọnọ mi edima ete ye eka oro ẹtịmde ẹma Enye, ẹnyụn̄ ẹkpepde mi Ikọ Esie.” Christian kiet ke Uruguay ekewet ete: “Esịt mi ọyọhọ ye ekọm, ndien emi anam mi n̄kọm Jehovah ke enye ndiwụt mi mfọnido oro owo mîdotke nnyụn̄ nnyịme ndidi ufan mi.” Abasi adadara idem ata n̄kpri nditọwọn̄. Gabriela, emi edide eyen isua itiaba ọdọhọ ete: “Mmama Abasi n̄kan n̄kpọ ekededi ke ofụri ererimbot! Mmenyene Bible. Mmama ndikpep n̄kpọ mban̄a Abasi ye Eyen esie.”

Mfịn, ediwak miliọn owo ke ofụri ererimbot ẹnen̄ede ẹnyịme ye andiwet psalm emi ọkọdọhọde ete: “Ọfọn mi ndikpere Abasi.” (Psalm 73:28) Ẹn̄wam mmọ ndiyọ mme mfịna oro mmọ ẹsobode idahaemi, ndien mmọ ẹnen̄ede ẹnyene idotenyịn edidu uwem ke nsinsi ke Paradise ke isọn̄. (1 Timothy 4:8) Ntak mûnamke edi utịtmbuba fo ‘ndisan̄a n̄kpere Abasi?’ Ke akpanikọ, ẹn̄wọn̄ọ ẹnọ nnyịn ẹte: “Enye [iyomke] usụn̄ ye baba nnyịn owo kiet.” (Utom 17:27) Ih, Abasi enen̄ede ekere aban̄a fi!

[Mme ndise ke page 5]

Ẹkụt nte Jehovah ekerede aban̄a nnyịn ke ediwak usụn̄

[Ndise ke page 7]

Idem n̄kpri nditọwọn̄ ẹkeme ndisan̄a n̄kpere Abasi

[Mme ndise ke page 7]

Mfịn, Jehovah an̄wam nnyịn ndiyọ mme mfịna. Ke edikem ini, enye eyetre udọn̄ọ ye n̄kpa