Nnennen Ntak Ndibuọt Idem

N̄WED Korea oro 31 Reasons Why Young People Leave the Church [Ntak 31 Oro Anamde Mme Uyen Ẹkpọn̄ Ufọkabasi] ọsọn̄ọ nte ke ediwak owo ẹtre ndika ufọkabasi koro mmọ mîkemeke ndinyene ibọrọ oro ẹnọde uyụhọ ke mme mbụme mmọ. Ke uwụtn̄kpọ, mmọ ẹsibụp ẹte, ‘Ntak emi mbon oro ẹbuọtde idem ke Abasi ẹkụtde ndutụhọ?’ ndien ‘Ntak emi ikpenyịmede kpukpru se ufọkabasi ekpepde ke ini ediwak ukpepn̄kpọ esie ẹtịmerede owo ẹnyụn̄ ẹdude ke ntuaha?’

Sia ibọrọ oro mme ọkwọrọ ederi mmọ ẹnọde mîyụhọke mmọ, ediwak mmọ ẹsikere ke ibọrọ idụhe ke Bible. Ke ini ọkwọrọ ederi ọnọde ibọrọ oro ọkọn̄ọde akpan akpan ke ekikere idemesie, utịp esidi nte ke emi isin̄wan̄ake owo, edi esikam ananam mme owo ẹsịn Abasi ye Bible.

Oro edi se iketịbede inọ Abel, oro ọkọkọride okpon nte owo Lutheran ke South Africa. Enye eti ete: “Ufọkabasi ekpep nte ke edi Abasi ‘esida’ kpukpru mbon emi ẹkpan̄ade. Edi ikan̄wan̄ake mi ntak emi Abasi ima ‘akpadade’ ete ye eka ọkpọn̄ nditọ mmọ. Ke obio-in̄wan̄ Africa oro n̄kọkọride n̄kpon, nnyịn ikesiwotke eka unen tutu nditọ esie ẹkponi. Edieke enan̄ oyomode, nnyịn ikesiwotke enye tutu enye aman onyụn̄ osio eyen esie ke eba. Ikan̄wan̄ake mi ntak emi ima ima Abasi mîkpowụtke ukem edikere mban̄a emi inọ mme owo.”

Aram, owo Canada, ama enyene ukem eyịghe emi. Enye ọdọhọ ete: “Ete mi akakpa ke ini n̄kedide isua 13. Ke utịn̄ikọ edibụk ete mi, ọwọrọetop ọkwọrọ ederi kiet ama anam an̄wan̄a ete ke Abasi okoyom ete mi akpa man enye okpodu ekpere imọ ke heaven. Enye ọkọdọhọ ete, ‘Abasi esida nti owo ọnyọn̄ koro enye amade ndinen owo.’ Ikan̄wan̄ake mi ntak emi Abasi okpobụkde ibụk ntre.’

 Nte ini akakade, Abel ye Aram ẹma ẹdi ẹdisobo ye Mme Ntiense Jehovah, ẹkpep Bible ye mmọ ndien, ke akpatre, ẹnyene ibọrọ ẹnọ mme mbụme mmọ. Mmọ ẹma ẹkọri ima ẹnọ Abasi ẹnyụn̄ ẹnyene ọkpọsọn̄ mbuọtidem ke enye. Ke akpatre, mmọ ẹma ẹyak idem ẹnọ Jehovah ẹnyụn̄ ẹkabade ẹdi mme anam-akpanikọ asan̄autom esie.

Nnennen Ifiọk —Ukpọhọde Edibuọt Idem ke Abasi

Nso ke nnyịn ikeme ndikpep nto mme ifiọk n̄kpọntịbe emi? Mmọ ẹkpep nnyịn nte ke oyom inyene nnennen ifiọk Bible man ikeme ndibuọt idem ke Abasi. Apostle Paul ama asian mme Christian ke obio Philippi eset ete: “Mmeben̄e ntem nte, ima mbufo akpakam ọdọdiọn̄ awak ke [“nnennen,” NW] ifiọk ye kpukpru ikike.” (Philippi 1:9) Paul mi akada ima ẹnyenede ẹnọ Abasi ye ekemmọ andinịm ke akpanikọ abuan ye nnennen ifiọk Abasi ye ikike uduak esie.

Emi owụt ifiọk sia akpa n̄kpọ oro ẹyomde man owo enyene mbuọtidem ke owo edi ndidiọn̄ọ owo oro—adan̄a nte owo enen̄erede ọdiọn̄ọ owo, ntre ke mbuọtidem esie ke idem owo oro editịm okpon. Ukem ntre, oyom ẹnyene nnennen ifiọk man ẹkeme ndibuọt idem ke Abasi. Paul ọkọdọhọ ete: “Ndien mbuọtidem ọwọrọ ete, nnyịn itịm ibụre ifiọk ite iyọbọ se nnyịn idoride enyịn ke esịt, inyụn̄ itịm inịm ite se idịbede owo ke enyịn ododu.” (Mme Hebrew 11:1) Ndibuọt idem ke Abasi ye unana edinyene nnennen ifiọk etie nte ufọk emi ẹdade kad ẹbọp. Ekpri ofụm ekeme ndiberi enye nduọk.

Ndikpep Bible ekeme ndin̄wam fi okụt ibọrọ ọnọ mme utọ mbụme nte enye emi akafịnade Abel ye Aram mi ke anyan ini, Ntak emi mme owo ẹsikpade? Bible anam an̄wan̄a nte ke ‘idiọk-n̄kpọ okoto owo kiet odụk ke ererimbot, n̄kpa onyụn̄ oto ke idiọk-n̄kpọ oro odụk; n̄kpa onyụn̄ ebe esịm kpukpru owo, koro kpukpru owo ẹma ẹnam idiọk-n̄kpọ.’ (Rome 5:12) Mme owo ẹkọri ẹsọn̄ ẹnyụn̄ ẹkpan̄a koro Adam akanamde idiọkn̄kpọ idịghe koro Abasi adade mmọ man mmọ ẹdidu ye imọ. (Genesis 2:16, 17; 3:6, 17-19) N̄ko-n̄ko, Bible owụt ata idotenyịn oro Jehovah Abasi ọnọde. Ebede ke Eyen esie, Jesus Christ, enye ọnọ anamidiọk ubonowo idotenyịn ediset ke n̄kpa.—John 5:28, 29; Utom 24:15.

Man anam nnyịn ifiọk akpanikọ aban̄ade ediset ke n̄kpa, Bible ọdọn̄ọ ediwak uwụtn̄kpọ mme owo oro Jesus akanamde ẹset ke n̄kpa. (Luke 7:11-17; 8:40-56; John 11:17-45) Nte afo okotde mme mbụk Bible emi, domo ndikụt idatesịt oro mme ufan ye ubon mbon oro ẹkenamde ẹset ke n̄kpa ẹkekopde. N̄ko, domo ndikụt nte emi okonụkde mmọ nditoro Abasi nnyụn̄ mbuọt idem ke Jesus.

Nnennen ifiọk aban̄ade Abasi ye mme uduak esie ekeme ndinyene ukem utịp emi ke idem mme owo mfịn. Ini kiet ko, editre ndinyene mme ibọrọ oro ẹnọde uyụhọ ke mme akpan mbụme ama afịna ediwak owo, efịghe, onyụn̄ anam mmọ ẹtuak ukot ẹduọn̄ọ. Edi nte mmọ ẹkekpepde Bible, mmọ ẹma ẹkụt ibọrọ ẹnọ mme mbụme emi, ndien oro ama okpụhọde uwem mmọ ofụri ofụri.

Ima Ẹnyenede ẹnọ Abasi —Akakan Ntak Ndinam N̄kpọ Esie

Ke adan̄aemi oyomde ẹnyene nnennen ifiọk man ẹbuọt idem ke Abasi, oyom n̄kpọ efen efen man owo osụk ibuot anam n̄kpọ esie. Ke ini ẹkebụpde enye se idide n̄kponn̄kan ke ibet Abasi, Jesus ọkọdọhọ ete: “Afo nyụn̄ ma Jehovah Abasi fo ke ofụri esịt fo, ye ke ofụri ukpọn̄ fo, ye ke ofụri ekikere fo, ye ke ofụri odudu fo.” (Mark 12:30) Edieke owo amade Abasi nte Jesus okosiode owụt mi, enye eyenen̄ede enyịme ndisụk ibuot nnam n̄kpọ Esie. Ndi afo amanam oro?

Rachel, emi anamde utom nte isụn̄utom ke ediwak iduọk isua ke Korea, etịn̄ ntak emi enye enyenede mbuọtidem ete: “Mmesikere mban̄a nte Jehovah atatde ubọk ye mme edibotn̄kpọ esie, nte enye esifende ọnọ ikọt esie, ye nte enye oyomde ufọn nnyịn ke ndinam nnyịn ifiọk se Enye oyomde oto nnyịn. Kpukpru n̄kpọ emi ẹsinam nnen̄ede mma Abasi. Ndien ima oro anam nyom ndinam n̄kpọ esie.”

 Martha, ebeakpa kiet otode Germany, anam n̄kpọ Jehovah ke isua 48. Enye ọdọhọ ete: “Ntak nnamde n̄kpọ Jehovah? Koro mmade enye. Kpukpru mbubịteyo, mmesinyene nneme ye enye ke akam nnyụn̄ nsian enye nte nnen̄erede n̄kop inemesịt mban̄a kpukpru mme edidiọn̄ esie, akpan akpan uwa ufak.”

Ih, ima oro imade Abasi esinam nnyịn iyom ndinam n̄kpọ esie ke ofụri esịt. Edi didie ke owo esidi edinyene utọ ima oro? Ima oro Abasi amade nnyịn edi n̄kponn̄kan n̄kpọ oro ekemede ndinụk nnyịn ndikọri ntotụn̄ọ esịtekọm nnọ enye. Kop nte Bible etide nnyịn inem inem mi: “Owo eke mîmaha ima ifiọkke Abasi, koro Abasi edi ima. Abasi akada emi ayarade ima emi Enye amade nnyịn, ke emi Enye okosiode edibon Eyen Esie kierakiet ọdọn̄ ke ererimbot, kpan̄ nnyịn ikpodu uwem oto ke Enye. Ima odu ke orụk usụn̄ emi, itoho ke emi nnyịn ikamade Abasi, edi oto ke emi Abasi akamade nnyịn, onyụn̄ osiode Eyen Esie ọdọn̄, ete, edidi usio-isop mme idiọk-n̄kpọ nnyịn.”—1 John 4:8-10.

Ndi omokụt nte ima emi okponde? Kam kere nte usọpmmọn̄ ekpemende fi ndien owo esịn uwem esie ke itiendịk man anyan̄a fi. Ndi ekpefre utọ owo oro, mîdịghe nte ukpenen̄ekede uwụt esịtekọm? Ndi afo ukpenyịmeke ndinam ofụri se ekekeme nnọ enye? Ima oro Abasi okowụtde ke ndinọ Eyen esie, Jesus Christ, nte uwa ufak okpon ke usụn̄ emi mînyeneke udomo. (John 3:16; Rome 8:38, 39) Ke ini ima Abasi otụkde fi esịt, emi oyonụk fi ndima nnyụn̄ nnam n̄kpọ esie ke ofụri esịt.

Mme Edidiọn̄ eke Idahaemi ye eke Ini Iso

Okposụkedi ima oro inyenede inọ Abasi ekpedide akakan ntak ndinam uduak esie, edi n̄kpọ inemesịt ndifiọk nte ke Abasi esinọ mbon oro ẹnamde n̄kpọ ẹnọ enye utịp. Apostle Paul osio emi owụt ete: “Edi ke mbuọtidem mîdụhe, owo ikemeke ndinem Abasi esịt; koro owo eke asan̄ade ekpere Abasi enyene ndinịm ete Enye ododu, onyụn̄ edi Andinọ mmọ emi ẹyomde Enye utịp.”—Mme Hebrew 11:6.

 Abasi esinen̄ede ọdiọn̄ mbon oro ẹmade ẹnyụn̄ ẹsụkde ibuot ẹnọ enye. Ediwak owo ẹnyene nsọn̄idem ke ntak editiene mme edumbet Bible. (Mme N̄ke 23:20, 21; 2 Corinth 7:1) Mme eteutom ẹsinen̄ede ẹbuọt idem ye mbonutom oro ẹdade mme edumbet Bible ẹban̄ade edinam akpanikọ ye edisịn ifịk nnam utom, ẹsịn ke edinam ndien owo isisọpke ndisio mmọ ke utom. (Colossae 3:23) Ke ndibuọt idem ke Jehovah, mme asan̄autom Abasi ẹsinyene ifụre ekikere idem ke ini ẹsobode mme idaha oro ẹtiede idomo idomo. (Mme N̄ke 28:25; Philippi 4:6, 7) Ke akande kpukpru, mmọ ke mbuọtidem ẹdori enyịn ndinyene edidiọn̄ nsinsi uwem ke Paradise isọn̄ oro edide.—Psalm 37:11, 29.

Esitie mbon oro ẹnyenede mme utọ edidiọn̄ Jehovah emi didie ke idem? Jacqueline, Christian kiet ke Canada, etịn̄ esịtekọm oro enye enyenede ọnọ Abasi ete: “Enye esinọ nnyịn mme utọ utịbe utịbe enọ oro kpukpru ini, ndien enye ọnọ nnyịn idotenyịn nsinsi uwem oro mîdikpụhu.” Abel, emi nnyịn ikokopde iban̄a ke ntọn̄ọ, etịn̄ nte etiede enye ke idem ete: “Idotenyịn ndidu nsinsi uwem ke paradise isọn̄ ekedi obufa n̄kpọ ọnọ mi, ndien ami ke mbet enye. Nte ededi, idem ọkpọkọm Paradise ididụhe, okposụk enenem mi ndiwụt ima oro mmade Abasi ebe ke ndinam n̄kpọ esie.”

Afo N̄ko Emekeme Ndinyene Ata Mbuọtidem

Bible ọdọhọ ete: “O Jehovah mme udịm, emi ekpede edinen ikpe, odomo nsia ye esịt.” (Jeremiah 11:20) Ih, Jehovah ke odomo se idude nnyịn ke ndịbe ọwọn̄ esịt. Owo kiet kiet ekpenyene ndidụn̄ọde se inamde enye ọbuọt idem ke Abasi. Ekeme ndidi mme ukwan̄ edinịm ke akpanikọ ye mme ukwan̄ ekikere ẹban̄ade Abasi ẹma ẹtịp ẹsịn ke mme idiọk edinam oro ikanamde ke ini edem. Edi nnennen ifiọk Bible ekeme ndida nsịm edinyene eti itie ebuana ye Andibot, kpa Jehovah Abasi.—1 Timothy 2:3, 4.

Ebede ke ndutịm ukpepn̄kpọ Bible mfọn, Mme Ntiense Jehovah ke ẹn̄wam mme owo ndinyene nnennen ifiọk Abasi. (Matthew 28:20) Ediwak mbon oro ẹnyịmede utọ un̄wam oro ẹdi ẹdima Abasi ẹnyụn̄ ẹkọri ata mbuọtidem ke enye. Ebede ke edikpep Bible, mmọ ẹnyene “ata ọniọn̄ ye ukeme ukere n̄kpọ,” emi ẹn̄wamde mmọ ‘ndisan̄a ke ifụre’ ke ndiọk eyo emi. (Mme N̄ke 3:21-23, NW) Ke akande kpukpru, mmọ idahaemi ẹnyene idotenyịn ini iso oro ‘mîdikpụhu edi oro ọsọn̄ọde omụm isọn̄.’ (Mme Hebrew 6:19) Afo n̄ko emekeme ndinyene ata mbuọtidem nnyụn̄ ndara mme edidiọn̄ emi.

[Ekebe ke page 6]

N̄kpọsọn̄ Mbụme Oro Ẹkeyomde Ibọrọ

“Ke ini n̄kọbọde ukpep ibọkusọbọ ke ufọkibọk, mma n̄kụt nti owo ẹmụmde mmụm ubiak ke ntak udọn̄ọ ye oto-obot afanikọn̄. Edieke edide Abasi odu, ntak emi mme n̄kpọ emi ẹtịbede? Ndi ido ukpono edi sụk usụn̄ edinyene ifụre ekikere?”—Akani owo Presbyterian ke Korea.

“Mma nsikere m̀mê ete mi, emi ekedide owo mmịn, akaka hell m̀mê heaven. Mma nsikop ndịk mban̄a mme akpan̄kpa ye ekikere hell ikan̄. Ikan̄wan̄ake mi nte ima ima Abasi akpanamde owo ọkọbọ ndutụhọ ke hell ke nsinsi.”—Akani owo Catholic ke Brazil.

“Nso ke ini iso akama ọnọ isọn̄ ye ubonowo? Didie ke ubonowo ẹdikeme ndidu uwem ke nsinsi? Ubonowo ẹdisan̄a didie ẹnyene ata emem?”—Akani owo Catholic ke Germany.

“Ukpepn̄kpọ edifiak mmana ikesịneke ifiọk inọ mi. Mme unam isituakke ibuot, ntre edieke ke ndusụk ntak ẹnamde fi afiak akamana nte unam man ekpe utịp mme idiọkn̄kpọ fo, afo edisan̄a didie anam emi onyụn̄ anam n̄kọri ke ini edide unam.”—Akani owo Hindu ke South Africa.

“N̄kọkọri n̄kpon ke ubon Confucius, ndien mma nsibuana ke usọrọ edisụk mme ete ete esịt. Nte n̄kesitienede mbri okpokoro uwa ntuak ibuot, mma nsikere m̀mê mme ete ete oro ẹkekpan̄ade ẹma ẹsidia udia oro ẹnyụn̄ ẹkụt nnyịn ituakde ibuot inọ mmọ.”—Akani owo Confucius ke Korea.

Kpukpru mme owo emi ẹma ẹkụt ibọrọ mbụme mmọ ke ini mmọ ẹkekpepde Bible ye Mme Ntiense Jehovah.